Ieremia
23 “Oi talofa i leoleo mamoe o ē ua faaumatiaina ma faasalalau solo mamoe ua ou fafagaina!” ua fetalai mai ai Ieova.+
2 O le mea lea ua fetalai mai ai Ieova le Atua o Isaraelu faasaga i leoleo mamoe o loo leoleoina loʻu nuu: “Ua outou faasalalau solo aʻu mamoe; ua outou faataapeape pea i latou, ma ua outou lē ua‘i atu foʻi iā i latou.”+
“O lea, ou te liliu atu ai iā te outou ona o le leaga o a outou mea na fai,” ua fetalai mai ai Ieova.
3 “Ona ou faapotopoto faatasi lea o ē o totoe o aʻu mamoe mai i atunuu uma na ou faataapeape i ai i latou,+ ma ou toe aumaia i latou i lo latou laufanua e aai ai,+ e latou te fanafanau ai ma faatoʻateleina ai.+ 4 Ou te faatūina fo‘i mo i latou o leoleo mamoe e leoleoina lava i latou.+ E lē toe fefefe i latou pe matataʻu, e leai foʻi se tasi e leiloa,” ua fetalai mai ai Ieova.
5 “Faauta! E oo mai aso,” ua fetalai mai ai Ieova, “ou te faatūina ai mo Tavita se tātupu* amiotonu.+ E pule le tupu+ ma gaoioi ma le faautauta, ma faia le faamasinogatonu ma le amiotonu i le nuu.*+ 6 E faaolaina Iuta i ona aso,+ e nonofo foʻi Isaraelu ma le saogalemu.+ O le suafa foʻi lenei e faaigoa ai o ia, o Ieova o la Tatou Amiotonu.”+
7 “Peita‘i, e oo mai aso,” ua fetalai mai ai Ieova, “e latou te lē toe faapea ane ai, ‘E matou te tautō iā Ieova le Atua soifua o lē na aumaia le fanauga a Isaraelu mai i le nuu o Aikupito!’+ 8 ae o le a faapea ane, ‘E matou te tautō iā Ieova le Atua soifua o lē na aumaia ma toe faafo‘isia ē na tupuga mai i le aiga o Isaraelu mai i le nuu o le itu i mātū, ma nuu uma na ou faataapeape i ai i latou,’ ona nonofo ai lea o i latou i lo latou lava laueleele.”+
9 O se fe‘au i perofeta:
Ua momomo loʻu loto i totonu iā te aʻu.
Ua gatete oʻu ivi uma.
Ua pei aʻu o se tagata ua onā,
Ma ua pei foʻi o se tagata ua faatoʻilaloina i le uaina,
Ona o Ieova ma ana afioga paia.
10 Auā ua tumu le nuu i tagata mulilulua;+
Ona o le malaia ua faavauvau ai le nuu+
Ma mamago fanua o le toafa e aai ai lafumanu.+
Ua leaga lava o latou ala, ma ua faia ma le lē tonu la latou pule.
11 “Ua amioleaga* perofeta atoa ma ositaulaga.+
Ua ou iloa foʻi i loʻu lava fale lo latou amioleaga,”+ ua fetalai mai ai Ieova.
Auā ou te faaoo atu iā i latou le malaia,
I le tausaga o le faasalaga,” ua fetalai mai ai Ieova.
13 “Ua ou iloa amioga inosia a perofeta o Samaria.+
Ua uunaʻia e Paala a latou valoaga,
Ma ua latou ta‘ita‘isesē loʻu nuu o Isaraelu.
14 Ua ou vaaia foʻi mea matagā i perofeta o Ierusalema.
Ua latou faia le mulilua+ ma savavali i le pepelo;+
Ua latou faalaeiau* ē e faia mea leaga,
Ma ua latou lē liliuese mai i a latou amioga leaga.
15 O le mea lenei ua fetalai mai ai Ieova o ʻau faasaga i perofeta:
“O lenei, ou te fafaga iā i latou i laau oona,
Ma ou avatu iā i latou vai oona e feinu ai.+
Auā o perofeta o Ierusalema ua māfua ai ona fulitua le nuu uma.”
16 O le mea lenei ua fetalai mai ai Ieova o ʻau:
“Aua tou te faalogo atu i upu a perofeta o ē o loo vavalo atu iā te outou.+
Ua latou faasesēina outou.*
17 Ua latou fai atu pea lava pea i ē e lē faaaloalo mai iā te aʻu,
‘Ua fetalai Ieova: “E oo le filemu iā te outou.”’+
Ua latou faapea atu foʻi iā i latou uma o loo savavali i le maaa o o latou loto,
‘E leai se mala e oo iā te outou.’+
18 O ai ea e tū atu i le faapotopotoga o uō vavalalata a Ieova,
Ina ia vaai ma faalogo ai i lana afioga?
O ai ea foʻi ua uaʻi atu i lana afioga ina ia lagona ai e ia?
19 Faauta! E alu atu ma le maʻemaʻeā le matagi malosi mai iā Ieova;
E pei o se afā mataʻutia e taavili ifo i ulu o ē e amioleaga.+
20 E lē toe liliu le toʻasā o Ieova
Seʻia faia e ia ma faataunuu manatu o lona finagalo.
E tou te malamalama lelei foʻi i ai i le faaiʻuga o aso.
21 Ou te leʻi aauina atu na perofeta, ae ua latou taufetuli.
Ou te leʻi tautala atu foʻi iā i latou, ae ua latou faia valovaloga.+
22 Ae pe ana tutū i latou i le faapotopotoga o aʻu uō vavalalata,
Semanū ua latou faailoa atu i loʻu nuu aʻu upu,
Ma latou faaliliuese i latou mai i o latou ala leaga ma a latou gaoioiga leaga.”+
23 “Po o aʻu ea o se Atua e latalata, ae e lē o se Atua e mamao?” ua fetalai mai ai Ieova.
24 “Pe e mafai ea ona lafi se tagata i se nofoaga lilo, ae ou te lē iloa o ia?”+ ua fetalai mai ai Ieova.
“Po ua lē tumu ea le lagi ma le lalolagi iā te aʻu?”+ ua fetalai mai ai Ieova.
25 “Ua ou faalogo i perofeta o ē ua vavalo ma le pepelo i loʻu igoa, ua faapea atu, ‘Ua fai laʻu miti! Ua fai laʻu miti!’+ 26 O le ā le umi e iai pea lenei mea i loto o le ʻauperofeta, o le vavalo atu i mea pepelo? O i latou o perofeta e taufaaʻoleʻole o latou lava loto.+ 27 Ua latou mafaufau ina ia faagalo e loʻu nuu loʻu igoa e ala i a latou miti ua faamatala atu e le tasi i le isi, e pei foʻi ona faagalo e o latou tamā loʻu igoa ona o Paala.+ 28 O le perofeta ua fai lana miti, ia faamatala atu e ia le miti; ae o lē ua iai laʻu upu, ia tautala atu o ia i laʻu upu ma le faamaoni.”
“E faapefea ona tutusa ʻau mamago o saito ma fatu o le saito?” ua fetalai mai ai Ieova.
29 “Pe e lē pei ea laʻu upu o le afi,”+ ua fetalai mai ai Ieova, “ma e pei fo‘i o le samala e tuʻininii ai le papa?”+
30 “O le mea lea ou te tetee atu ai i perofeta,” ua fetalai mai ai Ieova, “o ē ua gaoia aʻu upu mai i isi perofeta.”+
31 “O le mea lea ou te tetee atu ai i perofeta,” ua fetalai mai ai Ieova, “o ē ua faaaogā o latou laulaufaiva e faapea atu ai, ‘Ua fetalai mai o ia!’”+
32 “O le mea lea ou te tetee atu ai i perofeta o ē e faia miti pepelo,” ua fetalai mai ai Ieova, “o ē ua faamatala atu na miti ma ta‘ita‘isesē ai loʻu nuu ona o a latou pepelo, ma lo latou gugutu.”+
“Ae ou te leʻi aauina atu pe poloaʻia foʻi i latou. O le mea lea e lē aogā ai i latou i lenei nuu,”+ ua fetalai mai ai Ieova.
33 “Afai e fesili mai lenei nuu po o se perofeta po o se ositaulaga iā te oe, e faapea, ‘O le ā le avega* mai iā Ieova?’ ona e tali atu lea iā i latou, “‘O outou na o le avega! Ou te lafoaʻiina lava outou,”+ ua fetalai mai ai Ieova.’ 34 A o le perofeta po o le ositaulaga po o le nuu, o ē e faapea mai, ‘O le avega* mai iā Ieova!’ Ou te liliu atu foʻi i lenā tagata ma lona aiga. 35 O le fesili lenei e taʻitasi outou ma fesili atu ai i lona tuaoi ma lona uso, ‘O le ā le tali mai a Ieova? O le ā foʻi le mea na fetalai mai ai Ieova?’ 36 Ae aua ne‘i outou toe taʻua le avega* mai iā Ieova, auā ua taʻitasi le tagata ma fai lana lava upu ma avega,* ma ua outou suia foʻi afioga a le Atua soifua, o Ieova o ʻau, o lo tatou Atua.
37 “O le mea lenei e te fai atu ai i le perofeta, ‘O le ā le tali na tuuina mai e Ieova iā te oe? O le ā na fetalai mai ai Ieova? 38 Afai foʻi e tou te faapea ane pea, “O le avega* mai iā Ieova!” o le mea lenei ua fetalai mai ai Ieova: “Ona o lo outou fai mai, ‘O le upu lenei o le avega* mai iā Ieova,’ ina ua uma ona ou fai atu iā te outou, ‘Aua tou te faapea ane: “O le avega* mai iā Ieova!”’ 39 faauta! ou te sii a‘e outou ma lafoaʻiina ese mai i oʻu luma, o outou atoa ma le aai na ou avatu iā te outou ma o outou augātamā. 40 Ou te faaee atu foʻi iā te outou le faalumaina e faavavau, ma le māsiasi e faavavau, e lē toe faagaloina lava.”’”+