Ieremia

19 O le mea lenei ua fetalai mai ai Ieova: “Ia e alu ma faatau mai se fagu omea mai i se fai ipu omea.+ Ia e ave nisi o toeaina o le nuu, ma nisi o toeaina o le ʻauositaulaga, 2 ma ia alu atu i le vanu o Hinoma,*+ o loo i le mea e ui atu ai i le Faitotoʻa o Taʻega Ipu Omea. O i inā e te folafola atu ai upu ou te fai atu ai iā te oe. 3 Ia e faapea atu, ‘O outou tupu o Iuta ma ē o loo nonofo i Ierusalema, inā faalogo mai ia i le afioga a Ieova. O le mea lenei ua fetalai mai ai Ieova o ʻau, o le Atua o Isaraelu:

“ʻ“O le a ou aumaia le malaia i lenei mea, ma e faateʻia ai taliga o se tasi e faalogo i ai. 4 Auā ua latou tuulafoa‘ia aʻu+ ma faia lenei nofoaga ina ia lē toe iloa.+ Ua latou faia ai taulaga i isi atua e le‘i iloa e i latou, o o latou augātamā, ma tupu o Iuta, ma ua latou faatumu lenei mea i le toto o ē e lē sala.+ 5 Ua latou faia mea maualuluga iā Paala ina ia susunu ai o latou atalii i le afi e fai ma taulaga mū iā Paala,+ o le mea ou te leʻi poloaʻi pe fai atu ai, ma e leʻi alu aʻe foʻi i loʻu loto.”’*+

6 “ʻ“O le mea lea, faauta! o le a oo mai aso,” ua fetalai mai ai Ieova, “e lē toe taʻua ai lenei nofoaga o Tofeta po o le vanu o Hinoma,* ae o le vanu o le Fasiotiga.+ 7 Ou te faalēaogāina fuafuaga a Iuta ma Ierusalema i lenei mea, ou te tuuina atu i latou ina ia paʻuʻū i le pelu i luma o o latou fili, ma lima o i latou o loo saʻili e fasiotia i latou. Ou te tuuina atu o latou tino oti e fai ma meaʻai a manufelelei o le lagi ma manu o le fanua.+ 8 Ou te faia fo‘i lenei aai ma mea e fefefe ai ma mea e tuufaaili ai. O i latou uma e ui ane ai, e taufai pulatoʻa atu ma le fefefe, ma tuufaaili ai i ona mala uma.+ 9 Ou te tuuina atu i latou e aai i tino o o latou atalii ma o latou afafine, e taʻitasi foʻi i latou ma ʻai i le tino o lona uso a tagata, ona o omiga ma mafatiaga ina ua si‘omia i latou e o latou fili, ma ē o loo saʻili ina ia fasiotia i latou.”’+

10 “Ona e nutililii lea o le fagu i luma o tagata o loo ō faatasi ma oe, 11 ma fai atu iā i latou, ‘O le mea lenei ua fetalai mai ai Ieova o ʻau: “E faapea foʻi ona ou nutililiia o lenei nuu ma lenei aai, e pei ona nutililii e se tasi le ipu a le fai ipu omea ina ia lē mafai ona toe faia; e tatanu foʻi i latou i Tofeta seʻia lē toe iai se mea e tatanu ai i latou.”’+

12 “Ua fetalai mai Ieova: ‘E faapea foʻi ona ou faia i lenei mea ma tagata o loo nonofo ai, ou te faia lenei aai e pei o Tofeta. 13 E avea foʻi fale o Ierusalema ma fale o tupu o Iuta ma mea e lē mamā e pei o Tofeta,+ ioe, o fale uma o o latou taualuga na latou faia ai taulaga i ʻau uma o le lagi,+ ma liligi atu ai taulaga i meainu i isi atua.’”+

14 Ina ua fo‘i mai Ieremia mai i Tofeta lea na auina atu i ai o ia e Ieova e vavalo ai, na tū o ia i le lotoā o le fale o Ieova ma faapea atu i le nuu uma: 15 “O le mea lenei ua fetalai mai ai Ieova o ʻau, o le Atua o Isaraelu, ‘Faauta, ou te aumaia i lenei aai ma ona aai uma, o mala uma na ou fai atu ai faasaga iā te ia, auā ua latou matuā mumusu e* usiusitaʻi i aʻu upu.’”+