O le Tusi Lona Lua o Nofoaiga a Tupu

7 Ina ua uma le tatalo a Solomona,+ ona alu ifo lea o le afi mai i le lagi+ ma faamūina ai le taulaga mū ma taulaga, ma ua tumu le fale i le mamalu o Ieova.+ 2 Ua lē mafai ona ulufale atu ositaulaga i le fale o Ieova, auā ua tumu le fale o Ieova i le mamalu o Ieova.+ 3 Na vaavaai atu fo‘i le fanauga uma a Isaraelu ina ua alu ifo le afi, ma ua iai le mamalu o Ieova i le fale, ona latou faapaʻuʻū faō lea ma ifo toʻele i luga o le paepae, ua ifo atu ma faafetai atu iā Ieova, “auā e lelei o ia; e tumau e faavavau lona alofa faamaoni.”

4 Ua ofo atu e le tupu ma le nuu uma taulaga i luma o Ieova.+ 5 Ua ofo atu e le tupu o Solomona taulaga i povi e 22,000, ma mamoe e 120,000. O lea, ua faapaia ai e le tupu ma le nuu uma le fale o le Atua moni.+ 6 Ua tutū ositaulaga i tulaga o o latou tiute, faapea foʻi le ʻau sa Levī o ē na iai meafaifaaili e fai ai pesega iā Ieova.+ (Na faia e le tupu o Tavita nei meafaifaaili e faafetai ai iā Ieova, “auā e tumau e faavavau lona alofa faamaoni,” pe a ofo atu e Tavita viiga ma i latou.*) Ua ili leotele e ositaulaga o pū+ i o latou luma, a o laulaututū Isaraelu uma.

7 Ona faapaia lea e Solomona o le ogatotonu o le lotoā sa i luma o le fale o Ieova, auā o i inā na ia ofoina ai taulaga mū+ ma gaʻo o taulaga faifaatasi, auā na lē ofi taulaga mū, o taulaga i meaʻai,*+ ma gaʻo,+ i le fata faitaulaga ʻapamemea+ na faia e Solomona. 8 Ona faia lea i lenā taimi e Solomona ma Isaraelu uma o se tausamiga mo aso e fitu,+ o se faapotopotoga na matuā toʻatele lava, e ō mai e amata mai i Lepo-amato* e alu ifo i le ālia* o Aikupito.+ 9 Ae na latou faia se fonotaga paia i le aso lona valu,*+ auā na latou faapaiaina le fata faitaulaga mo aso e fitu, ma faia le tausamiga mo aso e fitu. 10 I le aso lona 23 o le masina e fitu, na ia tuu atu ai le nuu e ō i o latou fale, ua olioli+ ma fiafia o latou loto i mea lelei na faia e Ieova iā Tavita, o Solomona, ma lona nuu o Isaraelu.+

11 Ua uma ona faia e Solomona le fale o Ieova ma le fale o le tupu;+ ma na taulau mea uma na loto i ai Solomona e fai mo le fale o Ieova, ma lona lava fale.+ 12 Ona faaali mai lea o Ieova iā Solomona+ i le pō, ma fetalai mai iā te ia: “Ua ou faalogo i lau tatalo, ma ua ou filifilia lenei mea mo aʻu e fai ma fale e fai ai taulaga.+ 13 Pe a ou pupuni le lagi ma ua leai se timu, pe a ou poloaʻi atu i sē ina ia ʻaina laau o le fanua, ma pe a ou auina atu le faamaʻi i loʻu nuu, 14 ma ua faamaulalo loʻu nuu+ o ē ua taʻua ai loʻu igoa,+ ma tatalo, ma saʻili mai iā te aʻu, ma liliuese mai i o latou ala leaga,+ ona ou faalogo atu ai lea mai i le lagi ma faamagalo a latou agasala, ou te faamālōlōina foʻi lo latou laueleele.+ 15 O lenei, o le a vaavaai oʻu mata ma faalogo oʻu taliga i le tatalo e faia i lenei mea.+ 16 Ua ou filifilia ma faapaiaina lenei fale ina ia tuu ai loʻu igoa i aso uma lava,+ ma e lē aunoa ona faasaga i ai oʻu mata ma loʻu loto i inā.+

17 “Afai foʻi e te savali i oʻu luma e pei ona savali o Tavita lou tamā, ma faia e tusa ma mea uma na ou poloaʻi atu ai iā te oe, ma e tausia aʻu tulafono ma iʻuga o aʻu faamasinoga,+ 18 ona ou faatumauina lea o le nofoālii o lou malo,+ e pei ona ou osia ai le feagaiga ma Tavita lou tamā,+ e faapea, ‘E lē motu lou gafa mai i le nofoālii o Isaraelu.’+ 19 Ae afai tou te liliuese ma tuua aʻu poloaʻiga ma aʻu tulafono na ou tuu atu i o outou luma, ma outou ō atu ma auauna i isi atua ma ifo atu i ai,+ 20 ou te liaʻieseina Isaraelu mai i loʻu laueleele na ou foaʻi atu iā i latou.+ Ou te lafoa‘ia ese foʻi mai i o‘u luma le fale na ou faapaiaina mo loʻu igoa, e avea foʻi o se mea inosia* ma e tauemu i ai nuu uma lava.+ 21 E avea foʻi lenei fale ma faaputuga o mea ua faatafunaina. O i latou uma e ui ane ai o le a taufaiofo+ ma faapea ane, ‘Aiseā ua faia ai faapea e Ieova lenei laueleele ma lenei fale?’+ 22 Ona latou faapea ane lea, ‘Auā ua latou tuua Ieova+ le Atua o o latou augātamā, o lē na aumaia i latou mai i le nuu o Aikupito,+ ma ua latou pipii atu i isi atua, ua ifo atu i ai ma auauna i ai.+ O le mea lea ua ia aumaia ai nei mala uma iā i latou.’”+