Esoto

31 Ua toe fetalai mai Ieova iā Mose e faapea: 2 “Faauta! ua ou filifilia* Pesaleli+ le atalii o Auri, o le atalii o Huro mai i le ituaiga o Iuta.+ 3 Ou te faatumuina o ia i le agaga o le Atua, ina ia maua e ia le atamai, le malamalama, ma le poto e faia ai galuega eseese uma, 4 i le tusiaina ma le tomai o ata, i le faia o galuega i auro, o siliva, ma ʻapamemea, 5 i le vaneina o maa ina ia faamau ai,+ ma galue i laau ina ia faia ai galuega eseese.+ 6 Ua ou tofia fo‘i e fesoasoani iā te ia o Oliavu+ le atalii o Aisamako, mai i le ituaiga o Tanu, ma ua ou tuu foʻi le atamai i loto o ē uma e tomai,* ina ia latou faia o mea uma ua ou poloaʻi atu ai iā te oe:+ 7 o le faleʻie o le feiloaʻiga,+ o le atolaau o le feagaiga*+ ma le ufiufi+ o loo i ona luga, o mea uma e faaaogā i le faleʻie, 8 o le laulau+ ma mea uma e faaaogā ai, o le tuugāmolī o le auro māoʻi ma mea uma e faaaogā ai,+ o le fata faitaulaga e faamū ai mea manogi,+ 9 o le fata faitaulaga e fai ai taulaga mū+ ma mea uma e faaaogā ai, o le faatanoa ma lona tulaga,+ 10 o ofu ua lelei ona lalagaina, o ofu paia mo Arona le ositaulaga, o ofu o ona atalii o ē e auauna o ni ositaulaga,+ 11 o le suāuu e faauu ai, ma le mea manogi lelei e mū mo le mea paia.+ E latou te faia o mea uma ua ou poloaʻi atu ai iā te oe.”

12 Ua fetalai atili mai Ieova iā Mose: 13 “Ia fai atu i le fanauga a Isaraelu ma ia faapea atu, ‘Ia outou tausia lava oʻu sapati,+ auā o le faailoga lea i le vā o aʻu ma outou i o outou tupulaga o loo mulimuli mai, ina ia outou iloa ai o aʻu o Ieova, o lē o loo faapaiaina outou. 14 E ao ona outou tausia le Sapati, auā o se mea paia lea iā te outou.+ E fasiotia lava se tasi e na te solia le sapati. Afai e iai se tasi e na te faia ni galuega i lea aso, ia fasiotia lava o ia.+ 15 E ono aso e faia ai galuega, a o le aso lona fitu, o le aso sapati lea e matuā mālōlō ai.+ O se mea paia lea iā Ieova. E fasiotia lava se tasi e na te faia ni galuega i le aso Sapati. 16 E ao i le fanauga a Isaraelu ona tausia le Sapati, ma e ao ona tausia pea le Sapati e o latou tupulaga uma o loo mulimuli mai. O se feagaiga tumau lea. 17 O le faailoga tumau lenei i le vā o aʻu ma le fanauga a Isaraelu,+ auā e ono aso na faia ai e Ieova le lagi ma le lalolagi, a o le aso lona fitu ua mālōlō ai o ia ma faamalieina i ana galuega.’”+

18 Ua uma atu ana fetalaiga iā Mose i le mauga o Sinai, ona ia avatu lea iā Mose o papamaa e lua o le Molimau,+ o papamaa na tusia e le aao* o le Atua.+