O le Tusi Muamua o Nofoaiga a Tupu

5 O atalii nei o Reupena+ le ulumatua a Isaraelu. O ia o le ulumatua, ae ona sa ia faaleagaina le moega o lona tamā,+ na avatu ai lona tofi o le ulumatua i atalii o Iosefa+ le atalii o Isaraelu. O lea ua lē tusia ai le igoa o Reupena i le gafa mo le tofi o le ulumatua. 2 E ui sa sili Iuta+ i ona uso, ma na tupuga mai iā te ia lē e avea ma taʻitaʻi,+ ae na maua e Iosefa le tofi o le ulumatua. 3 O atalii o Reupena le ulumatua a Isaraelu, o Hanoka, o Falu, o Esarona, ma Karame.+ 4 O i latou nei na tupuga mai iā Ioelu: O le atalii o Ioelu o Semaia, o le atalii o Semaia o Koku, o le atalii o Koku o Semi, 5 o le atalii o Semi o Mika, o le atalii o Mika o Reaia, o le atalii o Reaia o Paala, 6 ma o le atalii o Paala o Peera, o lē na ave faapagota e Tilika-pilesa+ le tupu o Asuria; o Peera o se taʻitaʻi o le ituaiga o Reupena. 7 O ona uso ua tusia i le tusi o gafa e tusa ma o latou aiga ma tupuaga, o Ieielu le alii sili, o Sakaria, 8 ma Pela le atalii o Asasa le atalii o Sema le atalii o Ioelu. Na nonofo le aiga o Pela i vaipanoa mai i Aroeru+ e oo atu i Nepo ma Paala-meona.+ 9 Na latou nonofo i le itu i sasaʻe e oo atu i le mea e ui atu ai i le toafa,* i le vaitafe o Eufirate,+ auā ua tele a latou lafumanu i le nuu o Kiliata.+ 10 I aso o Saulo, na latou tau ai ma tagata Hakara, o ē na latou faatoʻilaloina; ona latou nonofo ai lea i faleʻie i le nuu atoa i le itu i sasaʻe o Kiliata.

11 Ae na nonofo le fanauga a Kato e pito mai iā i latou, i le nuu o Vasana e oo atu lava i Saleka.+ 12 I Vasana, o Ioelu le alii sili, o Sefama e lona lua, ma na iai foʻi Iaanai ma Safata. 13 O o latou uso e tusa ai ma aiga o o latou tamā, o Mikaele, o Mesulama, o Seepa, o Iorai, o Iakana, o Sea, ma Eperu, e toʻafitu i latou uma. 14 O atalii nei o Aviaila le atalii o Huri, o le atalii lea o Iaroa, o le atalii lea o Kiliata, o le atalii lea o Mikaele, o le atalii lea o Iesesai, o le atalii lea o Iato, o le atalii lea o Pusa. 15 O Aki le atalii o Apitielu le atalii o Kuni, o le alii sili lea o le aiga o o latou tamā. 16 Na latou nonofo i Kiliata,+ i Vasana+ ma ona tamaʻi aai, ma fanua lafulemu uma o Sarona e oo atu lava i le mea e gata mai ai. 17 O i latou uma nei na tusia o latou igoa i le tusi o gafa i aso o Iotama+ le tupu o Iuta, ma i aso o Ierepoamo*+ le tupu o Isaraelu.

18 Na iai i tagata o Reupena, o tagata Kato, ma le ʻafa o le ituaiga o Manase, ni tagata totoa e toʻa 44,760 i la latou ʻautau, o ē na aveina talipupuni, o pelu, na faaauupegaina foʻi i ʻaufana,* ma na toleniina mo le taua. 19 Na latou tau ma tagata Hakara,+ o Ietura, o Nafiso,+ ma Notapa. 20 Na latou maua le fesoasoani ina ua tau ma i latou, o lea, na tuuina atu ai tagata Hakara ma ē uma na faatasi ma i latou i o latou lima, auā na latou alalaga atu i le Atua mo se fesoasoani i le taua, ma na ia faafofoga i la latou ʻaiʻoi, auā na latou faatuatua iā te ia.+ 21 Na latou faoa foʻi a latou lafumanu, o kamela e 50,000, o mamoe e 250,000, o asini e 2,000, faapea ma tagata e toʻa 100,000. 22 E toʻatele na fasiotia, auā o le Atua moni na tauina le taua.+ Ona latou nonofo ai lea i le laueleele o na tagata seʻia oo i le taimi na ave faapagota ai.+

23 A o le fanauga o le ʻafa o le ituaiga o Manase,+ na nonofo i le nuu e amata mai i Vasana e oo atu i Paala-heremone, ma Senira, ma le mauga o Heremoni.+ E matuā toʻatele foʻi i latou. 24 O alii sili nei o aiga o o latou tamā: o Efara, o Isai, o Elielu, o Aserielu, o Ieremia, o Hotavia, ma Iatielu; o i latou o tagata totoa malolosi ma taʻutaʻua, o alii sili o aiga o o latou tamā. 25 Ae ua latou lē faamaoni i le Atua o o latou augātamā, ma tapua‘i i atua* o tagata o le nuu,+ o ē na faaumatia e le Atua i o latou luma. 26 Ona faatupu lea e le Atua o Isaraelu o le manatu iā Pula le tupu o Asuria+ (e faasino atu, iā Tilika-pilesa+ le tupu o Asuria), o lea na ia ave faapagota ai le ituaiga o Reupena, o le ituaiga o Kato, ma le ʻafa o le ituaiga o Manase, ua avatu i latou i Hala, i Havoli, i Hara, ma le vaitafe o Kosane,+ ua nonofo ai i inā seʻia oo mai i aso nei.