O le Tusi Lona Lua o Nofoaiga a Tupu

5 Ona māeʻa ai lea o galuega uma na faia e le tupu o Solomona mo le fale o Ieova.+ Ona aumaia lea e Solomona o mea na faapaiaina e lona tamā o Tavita,+ ma tuufaatasi siliva, o auro, ma ipu uma i potu teuoloa o le fale o le Atua moni.+ 2 Ua faapotopoto mai e Solomona o toeaina o Isaraelu, o taʻitaʻi uma o ituaiga, ma alii sili o aiga o tamā o le fanauga a Isaraelu. Ua latou ō mai i Ierusalema ina ia ave aʻe le atolaau o le feagaiga a Ieova mai i le Aai a Tavita,+ o Siona lea.+ 3 Ua faapotopoto tane uma o Isaraelu i luma o le tupu, i le tausamiga* na faia i le masina lona fitu.+

4 Ua ō mai toeaina uma o Isaraelu, ma ua ave aʻe e sa Levī le Atolaau.+ 5 Ua latou ave aʻe le Atolaau, o le faleʻie o le feiloaʻiga,+ ma ipu paia uma sa i le faleʻie. Ua ave aʻe e le ʻauositaulaga ma sa Levī* na mea uma. 6 Ua iai i luma o le Atolaau le tupu o Solomona ma le faapotopotoga uma o Isaraelu, o ē na poloaʻia e faapotopoto mai iā te ia. Ua faia taulaga i mamoe ma povi+ e lē mafaitaulia ona o le tele. 7 Ua ave aʻe e ositaulaga le atolaau o le feagaiga a Ieova i le mea e tuu ai, i le potu pito i totonu o le fale, o le Mea e Sili Ona Paia, i lalo ifo o apaʻau o kerupi.+ 8 Auā ua faaloloa atu apaʻau o kerupi i luga o le mea o iai le Atolaau, ina ia faamalumalu ifo kerupi mai i luga, i le Atolaau ma ona amo.+ 9 Ae ua uumi amo, ua iloa atu pito o amo mai i le Mea Paia lea e i luma o le potu pito i totonu, ae e lē iloa atu mai i fafo. Ua iai pea i inā seʻia oo mai i aso nei. 10 E leai se mea sa i totonu o le Atolaau, seʻi vaganā ai papamaa e lua na tuuina ai i totonu e Mose i Horepa,+ ina ua osia e Ieova le feagaiga+ ma le fanauga a Isaraelu, a o latou ō ese mai i Aikupito.+

11 Ina ua ō mai i fafo ositaulaga mai i le mea paia, (auā o ositaulaga uma na iai na faapaiaina i latou,+ e tusa po o le ā le vaega na iai),+ 12 o loo tutū i le itu i sasaʻe o le fata faitaulaga tagata sa Levī uma o ē e pepese,+ e mai i le aiga o Asafo,+ o Hemana,+ o Iutana,+ o o latou atalii ma o latou uso, ma o loo latou oofu i ʻie lelei, o loo iai foʻi a latou sumepalo,* o meafaifaaili e iai uaua, ma kitara;* sa faatasi foʻi ma i latou o ositaulaga e toʻa 120 o ē na ilia pū.+ 13 Na avatu faatasi e i latou e ilia pū ma ē e pepese o viiga ma le faafetai iā Ieova, ma ua sii aʻe le leo o pū, o sumepalo, ma isi meafaifaaili e tā ai pese, e viia ai Ieova “auā e lelei o ia; e tumau e faavavau lona alofa faamaoni.”+ O le taimi lava lenā na faatumuina ai le fale o Ieova i le ao.+ 14 Ua lē mafai ona tutū ai i inā ositaulaga e auauna ona o le ao, auā ua tumu le fale o le Atua moni+ i le mamalu o Ieova.