O le Tusi Lona Lua o Nofoaiga a Tupu

29 E 25 tausaga o Esekia+ ina ua avea o ia ma tupu, ma e 29 tausaga na ia pule ai mai i Ierusalema. O le igoa o lona tinā o Avia le afafine o Sakaria.+ 2 Na ia faia pea mea ua tonu i le silafaga a Ieova,+ e pei lava ona sa faia e Tavita lona augātamā.+ 3 I le tausaga muamua o lana nofoaiga, i le masina muamua, na ia tatalaina ai faitotoʻa o le fale o Ieova ma toe faaleleia.+ 4 Ona ia aumaia lea o ositaulaga ma le ʻau sa Levī, ma faapotopoto i latou i le itu i sasaʻe o le aai. 5 Ua ia faapea atu iā i latou: “O outou le ʻau sa Levī, inā faalogo mai ia iā te aʻu. Inā outou nofosauni ia mo le tapuaʻiga,+ ma ia faamamā le fale o Ieova le Atua o o outou augātamā, ma ia aveese le mea lē mamā mai i le mea paia.+ 6 Auā ua lē faamaoni o tatou tamā ma ua latou faia mea leaga i le silafaga a Ieova lo tatou Atua.+ Ua latou tuua o ia ma liliuese mai i le faleʻie paia o Ieova, ma ua latou fulitua iā te ia.+ 7 Ua latou tapunia foʻi faitotoʻa o le faapaologa+ ma tapē molī,+ ua latou lē faamūina mea manogi,+ ma ua latou lē ofoina atu foʻi taulaga mū+ i le mea paia i le Atua o Isaraelu. 8 Ona oo mai ai lea o le toʻasā o Ieova iā Iuta ma Ierusalema,+ ma ua ia faaoo mai le mala iā i latou, ma o ē ua vāai ma faalogo i ai, ua latou fefefe, taufaiofo ma faaʻamuʻamu i ai, e pei lava ona vaaia e o outou mata.+ 9 O i inei na paʻuʻū ai o tatou augātamā i le pelu,+ na ave faapagota foʻi o tatou atalii, o tatou afafine, ma a tatou avā ona o lenei mea.+ 10 O lenei, ua naunau loʻu loto e osia se feagaiga ma Ieova le Atua o Isaraelu,+ ina ia liliuese ai lona toʻasā mai iā i tatou. 11 Oʻu tagata e, aua neʻi outou tuua o outou tiute,* auā ua filifilia outou e Ieova e tutū i ona luma e auauna iā te ia,+ ma avea pea ma ana auauna ma ē e faamūina taulaga.”+

12 Ona tutulaʻi lea o le ʻau sa Levī: o Makata le atalii o Amesai ma Ioelu le atalii o Asaraia mai i le fanauga a Koato;+ e mai i le fanauga a Merari,+ o Kiso le atalii o Opeti ma Asaraia le atalii o Ialeelu; e mai i le fanauga a Keresona,+ o Ioaa le atalii o Sima ma Etena le atalii o Ioaa; 13 e mai i le fanauga a Elisafano, o Semiri ma Ieielu; e mai i le fanauga a Asafo,+ o Sakaria ma Matania; 14 e mai i le fanauga a Hemana,+ o Ikielu ma Semi; ma e mai i le fanauga a Iutana,+ o Semaia ma Usialu. 15 Ona latou faapotopoto faatasi lea o latou uso ma ua latou nofosauni mo le tapuaʻiga, ma ō mai e faamamā le fale o Ieova e tusa ai ma le poloaʻiga a le tupu ona o le afioga a Ieova.+ 16 Ona ulu atu lea o ositaulaga i le fale o Ieova, e faamamā ma aumai i fafo mea lē mamā uma na latou maua i le malumalu o Ieova, ma aumai i le lotoā+ o le fale o Ieova. Ona fetagofi lea o le ʻau sa Levī i na mea ma ave i fafo i le vanu o Ketarono.+ 17 Na amata ona latou faamamāina le malumalu i le aso muamua o le uluaʻi masina, ma e oo ane i le aso lona valu o le masina ua latou oo mai i le faapaologa o Ieova.+ Na latou faamamāina le fale o Ieova i aso e valu, ma ua latou faamāeʻa ai i le aso lona 16 o le uluaʻi masina.

18 Ina ua uma, ona latou ulufale mai lea iā Esekia le tupu ma faapea mai iā te ia: “Ua matou faamamāina le fale atoa o Ieova, o le fata faitaulaga o taulaga mū+ ma ona ipu uma,+ ma le laulau o falaoa ua faaputuina*+ ma ona ipu uma. 19 O ipu uma foʻi na aveesea e le tupu o Aasa i le taimi o lana nofoaiga ina ua gaoioi ma le lē faamaoni,+ ua matou saunia ma faapaiaina,+ ma ua i luma o le fata faitaulaga a Ieova.”

20 Ua tulaʻi i le taeaopō le tupu o Esekia ma faapotopoto faatasi perenise o le aai, ua ō aʻe i le fale o Ieova. 21 Ua latou ō mai ma aumai povi poʻa e fitu, o mamoe poʻa e fitu, o tamaʻi mamoe poʻa e fitu, ma ʻoti poʻa e fitu e fai ma taulaga o agasala mo le malo, le malumalu, ma Iuta.+ Ona ia fai atu lea i ositaulaga, o le fanauga a Arona, e ofo atu na manu i luga o le fata faitaulaga a Ieova. 22 Ona latou fasi lea o povi+ ma ua avatu e ositaulaga le toto ma sausau i luga o le fata faitaulaga;+ ua latou fasia foʻi mamoe poʻa ma sausau le toto i luga o le fata faitaulaga, ma ua latou fasia tamaʻi mamoe poʻa ma sausau le toto i luga o le fata faitaulaga. 23 Ona latou aumaia lea o ʻoti poʻa o le taulaga o agasala i luma o le tupu ma le faapotopotoga, ma faaee i ai o latou lima. 24 Ua fasi e ositaulaga ʻoti poʻa ma faia ai le taulaga o agasala. Ua latou sausau le toto i luga o le fata faitaulaga, e fai ma togisala mo Isaraelu uma, auā ua fai atu le tupu e fai le taulaga mū ma le taulaga o agasala mo Isaraelu uma.

25 O le taimi lenā na tofia ai e Esekia le ʻau sa Levī i le fale o Ieova, faatasi ma sumepalo, o meafaifaaili e iai uaua, ma kitara+ e tusa ma le poloaʻiga a Tavita+ ma Kato+ o lē e faamatalaina faaaliga a le tupu, ma Natano+ le perofeta, auā o le poloaʻiga lenā a Ieova e ala i ana perofeta. 26 Ua tutū le ʻau sa Levī ma meafaifaaili a Tavita, faapea le ʻauositaulaga faatasi ma pū.+

27 Ona fai atu lea o Esekia e ofo atu le taulaga mū i luga o le fata faitaulaga.+ Ina ua amata ona faia le taulaga mū, ona amata foʻi lea o le pese iā Ieova ma le tāina o meafaifaaili a Tavita le tupu o Isaraelu, faatasi ai ma le iliina o pū. 28 Ona ifo lea o le faapotopotoga uma a o usuina le pese ma ili pū; na faaauau ona faia nei mea uma seʻia māeʻa ona faia le taulaga mū. 29 Ina ua māeʻa ona latou ofoina atu le taulaga mū, ona punonou lea ma faapaʻuʻū faō le tupu ma i latou uma sa faatasi ma ia. 30 Ua fai atu le tupu o Esekia ma perenise i le ʻau sa Levī, e vivii atu iā Ieova i upu o le pese a Tavita+ ma Asafo+ o lē e faamatalaina faaaliga. Ona latou ofoina atu lea o viiga ma le matuā olioli, ua latou punonou ma ifo.

31 Ona fai atu lea o Esekia: “O lenei ua vavaeeseina outou mo Ieova, o lea, inā faalatalata mai ia, ma aumai taulaga ma taulaga faafetai i le fale o Ieova.” Ona aumai lea e le faapotopotoga o taulaga ma taulaga faafetai, ua aumaia foʻi e tagata uma taulaga mū ma le lotomalilie.+ 32 O le aofaʻiga o taulaga mū na aumaia e le faapotopotoga, e 70 povi, e 100 mamoe poʻa, ma tamaʻi mamoe poʻa e 200, o mea uma ia sa fai ai le taulaga mū iā Ieova;+ 33 ma o le taulaga paia, e 600 povi ma mamoe e 3,000. 34 Ae e leʻi lava ositaulaga e saeina paʻu o manu o taulaga mū uma, o lea na fesoasoani ai iā i latou o latou uso o le ʻau sa Levī+ seʻia māeʻa le galuega, ma seʻia uma ona faapaiaina e ositaulaga i latou lava,+ auā na sili atu ona naunau* le ʻau sa Levī e faapaia i latou lava, nai lo o ositaulaga. 35 Ua matuā tele foʻi taulaga mū+ faatasi ma gaʻo o taulaga faifaatasi,+ ma taulaga i meainu mo taulaga mū.+ Ona toe faaauau* lea o le auaunaga o le fale o Ieova. 36 Ua olioli Esekia ma le nuu uma ona o mea na saunia e le Atua moni mo lona nuu,+ auā na tutupu faafuaseʻi nei mea uma.