Isaia
24 Faauta! O loo faagaogaoina e Ieova le atunuu* ma tuulafoaʻiina.+
Ua ia faafaō le atunuu+ ma faataapeapeina ē o loo nonofo ai.+
2 O le a tutusa le mea e oo i tagata uma:
O tagata lautele ma le faitaulaga,
O le auauna ma lona matai,
O le auauna teine ma lona matai fafine,
O lē e faatau mai ma lē e faatau atu oloa,
O le tagata e nonō atu tupe ma lē e aitalafu tupe,
O lē e talia pasene ma lē e totogia le pasene.+
3 O le a matuā faagaogaoina le atunuu;
O le a matuā faoa lava,+
Auā o le mea lea ua fetalai mai ai Ieova.
4 Ua faavauvau* le laueleele;+ o loo mou atu.
Ua mamae le laueleele sa fua mai; o loo mou atu.
Ua vaivai tagata maualuluga o le atunuu.
5 Ua leaga le atunuu ona o ē o loo nonofo ai,+
Auā ua latou lē tausia tulafono,+
Ua latou suia tuutuuga,+
Ma solia le feagaiga e tumau.+
O le mea foʻi lea ua faaitiitia ai le aofaʻi o i latou o loo nonofo i le atunuu,
Ma e toʻaitiiti lava tagata ua totoe.+
7 Ua faavauvau* le uaina fou, ua mamae le vine,+
Ma ua mapuitigā i latou uma sa fiafia o latou loto.+
8 Ua muta musika mālie o le topa;
Ua uma le pisa o ē na matuā fiafia;
Ua muta foʻi musika mālie o le kitara.+
9 E inu a latou uaina e aunoa ma ni pesepesega,
Ua oona foʻi le ʻava malosi iā i latou e feinu ai.
11 Ua latou alalaga atu mo le uaina i ala tetele.
Ua mavae atu le olioli uma;
Ua mou atu le fiafia o le atunuu.+
12 Ua matuā faaleagaina le aai;
Ua nutililiia le faitotoʻa ma ua avea ma faupu‘ega o mea ua faatafunaina.+
13 Auā o le mea lea o le a oo i le atunuu, atoa foʻi ma tagata:
E pei o le sasaina o le laau o le olive,+
E pei foʻi ona iai fuifui vine e totoe pe a uma ona aoaoina vine.+
14 O le a latou leotetele,
E latou te alalaga atu ma le olioli.
O le a latou faalauiloa mai i le sami* le silisili ese o Ieova.+
15 O le mea lea e latou te faamamaluina ai Ieova i le vaipanoa o le malamalama;*+
E latou te faamamaluina foʻi le suafa o Ieova le Atua o Isaraelu i motu o le sami.+
16 Ua tatou faalogo i pesega mai i tuluʻiga o le lalolagi:
“Ia Viia Lē e Amiotonu!”+
Ae ou te fai atu: “Ua fai ifo loʻu malosi, ua fai ifo loʻu malosi!
Oi talofa iā te aʻu! Ua gaoioi lē faamaoni i latou e lē faamaoni;
Ua gaoioi lē faamaoni ē e lē faamaoni, i a latou gaoioiga lē faamaoni.”+
17 O oe lē ua nofo i le atunuu, o le a oo iā te oe le mataʻu tele, o lua, ma mailei.+
18 O so o se tasi e sola mai i le leo o le mea e mataʻu ai, o le a paʻū i le lua,
O so o se tasi foʻi e alu aʻe mai i le lua, e puʻea i le mailei.+
Auā o le a tatalaina pupuni o vai i lugā,
E lūlūina foʻi faavae o le laueleele.
20 Ua tautevateva le atunuu e pei o se tagata onā,
Ma ua maluelue e pei o se tamaʻi fale ona o le matagi.
Ua mamafa lana agasala iā te ia,+
Ma o le a paʻū, ina ia lē toe tulaʻi ai.
21 O lea aso, o le a uaʻi atu ai Ieova i ʻautau i lugā,
Atoa ma tupu o le lalolagi i luga o le lalolagi.
22 O le a faapotopotoina faatasi i latou
E pei ona faapotopotoina o pagota i le lua,
Ma o le a loka i latou i le falepuipui;
Pe a mavae foʻi aso e tele, ona toe uaʻi atu ai lea iā i latou.