Esoto

1 O lenei, o igoa ia o atalii o Isaraelu na ō atu ma Iakopo i Aikupito; na ō e taʻitasi le tagata ma lona aiga:+ 2 o Reupena, o Simeona, o Levi, o Iuta,+ 3 o Isakara, o Sepulona, o Peniamina, 4 o Tanu, o Nafatali, o Kato, ma Asera.+ 5 E toʻa 70 i latou uma na tupuga mai iā Iakopo,* a o Iosefa sa iai o ia i Aikupito.+ 6 Mulimuli ane, ua maliu Iosefa,+ atoa ma ona uso uma ma lea tupulaga uma. 7 Ua fanafanau le fanauga a Isaraelu,* ua faatoʻateleina ma faatupulaʻia; ua vave ona faatoʻateleina ma ua matuā malolosi i latou, ua faatumulia ai le atunuu iā i latou.+

8 Mulimuli ane, ua soloaʻi ane i le malo o Aikupito se tupu fou, o lē na te lē iloa Iosefa. 9 Ua ia fai atu i ona tagata: “Faauta! Ua sili atu ona toʻatele ma malolosi tagata Isaraelu nai lo o i tatou.+ 10 O lea, seʻi o tatou feutaga‘i ma i latou i se auala faautauta. Auā a leai, o le a faatoʻateleina pea i latou, ma pe a tupu se taua, o le a latou ʻau faatasi ma o tatou fili e tau ma i tatou, ma latou ō ese mai i lenei atunuu.”

11 Ona latou tofia lea o taʻitaʻi e faamalosia i latou e faia galuega mamafa, ina ia faatigāina ai i latou i avega mamafa;+ ua latou fausia aai e fai ma mea e teu ai oloa a Farao, o Pitoma ma Ramese.+ 12 Ae o le tele e latou te faatigāina ai i latou, o le atili foʻi lea ona faatoʻateleina o i latou ma salalau solo i le laueleele, ma ua matuā fefefe ma feita ai i latou ona o le fanauga a Isaraelu.+ 13 O le mea lea ua faapologa+ ai e tagata Aikupito le fanauga a Isaraelu, ma faamalosia i latou e faia galuega mamafa. 14 Ua latou faatigāina i latou i galuega mamafa; ua latou faapologaina i latou i le faia o omea e faapipii ai mea ma piliki, ma faia so o se galuega mamafa i le fanua. Ioe, na latou faileagaina i latou ma faapologaina+ i latou e faia galuega mamafa uma.

15 Mulimuli ane, ua talanoa atu le tupu o Aikupito i faatosaga Eperu, o o la igoa o Sepela ma Puʻa, 16 ua ia faapea atu: “Pe a faatigā o le a fananau fafine Eperu* ma oulua ō atu e fesoasoani e faafanau+ i latou, afai lua te iloa o se tama, ia oulua fasiotia; ae afai o se teine ona faasao lea.” 17 Ae ua matataʻu nei fafine faatosaga i le Atua moni, ma ua la lē faia le mea na fai atu ai le tupu o Aikupito iā i laʻua. Nai lo o lea, ua la faasao+ fanau tama. 18 Mulimuli ane, ua aami e le tupu o Aikupito ia fafine faatosaga ma fesili atu iā i laʻua: “Aiseā ua oulua faasaoina ai fanau tama?” 19 Ua tali mai nei fafine iā Farao: “E lē pei fafine Eperu o fafine Aikupito. E malolosi ma muamua fananau i latou a o leʻi oo atu i ai faatosaga.”

20 Ua agalelei le Atua i fafine faatosaga, ma ua faatoʻateleina pea le nuu ma ua atili malolosi ai i latou. 21 Talu ai ua matataʻu ia fafine faatosaga i le Atua moni, ua ia faamanuia iā i laʻua e ala i le mauaina o ni aiga. 22 Mulimuli ane, ua poloaʻi atu Farao i ona tagata uma: “O pepe tama Eperu uma faatoʻā fananau, ia lafoaʻi i le vaitafe o le Naila, ae ia faasao+ pepe teine uma.”