O le Tusi Lona Lua o Nofoaiga a Tupu
14 Ona taoto lea o Avia faatasi ma ona augātamā, ua latou tanu foʻi o ia i le Aai a Tavita;+ ma ua avea Asa lona atalii ma tupu e sui iā te ia. Na filemu le nuu mo tausaga e sefulu i aso o Asa.
2 Ua faia e Asa le mea lelei ma tonu i le silafaga a Ieova lona Atua. 3 Ua ia aveesea fata faitaulaga ese+ ma mea maualuluga, ma talepe i lalo poutū paia+ ma tuu i lalo pou paia.*+ 4 Ua ia fai atu foʻi iā Iuta e saʻili iā Ieova le Atua o o latou augātamā, ma ia tausia le Tulafono ma ana poloaʻiga uma. 5 Ua ia aveesea mai i aai uma o Iuta mea maualuluga ma fata faitaulaga e faamū ai mea manogi,+ ma o lana nofoaiga na filemu ai pea le malo. 6 Ua ia fausia aai malupuipuia i Iuta,+ auā na filemu le nuu ma e leʻi iai se taua na sii atu iā te ia i na tausaga, auā na foaʻi mai e Ieova le mapusaga iā te ia.+ 7 Ua ia fai atu iā Iuta: “Seʻi o tatou fausia nei aai ma siʻo i pā ma ʻolo,+ ma faitotoʻa* ma faamau. Auā ua avanoa le laueleele mo i tatou, talu ai ua tatou saʻili iā Ieova lo tatou Atua. Na tatou saʻili, ona ia foaʻi mai lea iā i tatou o le mapusaga i itu uma.” Ua latou fausia aai ma ua taulau manuia.+
8 Na iai se ʻautau a Asa o tane e toʻa 300,000 mai i Iuta, na faaauupegaina i talipupuni tetele ma tao. E mai iā Peniamina foʻi o tagata totoa malolosi e toʻa 280,000, e aveina talita* ma ua faaauupegaina i ʻaufana.*+
9 Mulimuli ane, ona alu atu lea o Sera le tagata Aitiope e siitaua atu iā i latou, ma le ʻautau e 1,000,000 tane ma kariota e 300.+ Ina ua oo atu o ia i Maresa,+ 10 ona alu atu lea o Asa e tau ma ia, ma ua faapotopoto faatasi i latou e tau i le vanu o Sefata i Maresa. 11 Ona valaau lea o Asa iā Ieova lona Atua,+ ua faapea atu: “Ieova e, e leai se mea e faigatā iā te oe, e tusa pe e toʻatele pe e leai se malosi+ o ē o loo e fesoasoani mai i ai. Ieova e, lo matou Atua, ia e fesoasoani mai iā i matou, auā e matou te faalagolago atu iā te oe,+ o lou suafa foʻi ua matou ō mai ai e tau ma lenei motu o tagata.+ Ieova e, o oe o lo matou Atua. Aua neʻi manumalo tagata faatauvaa iā te oe.”+
12 Ona faatoʻilaloina lea e Ieova o tagata Aitiope i luma o Asa ma luma o Iuta, ma ua sosola ai tagata Aitiope.+ 13 Ua tuliloa i latou e Asa ma le nuu e oo atu lava i Kira,+ ma ua faaauau ona paʻuʻū tagata Aitiope se‘ia oo ina lē toe iai se tasi o i latou e ola, auā ua faaumatia i latou e Ieova ma lana ʻautau. Mulimuli ane, ona latou ave lea o le vete* e matuā tele lava. 14 Ua latou lepeti foʻi aai uma na siʻomia ai Kira, auā na faatumulia na aai i le mataʻu iā Ieova; na latou faoa mea mai i aai uma, auā e tele mea na iai i na aai. 15 Na latou lepeti foʻi faleʻie o i latou e iai lafumanu, ma faoa le matuā tele o lafumanu ma kamela, ona latou toe foʻi mai lea i Ierusalema.