O le Tusi Lona Lua o Tupu
22 E valu tausaga o Iosia+ ina ua fai o ia ma tupu, ma e 31 tausaga na pule ai o ia mai i Ierusalema.+ O le igoa o lona tinā o Ietita le afafine o Ataia mai i Posekata.+ 2 Na ia faia mea ua tonu i le silafaga a Ieova ma savali i ala uma o Tavita lona augātamā,+ e leʻi liliuese foʻi o ia i le itu taumatau po o le itu tauagavale.
3 O le tausaga lona 18 o le nofoaiga a le tupu o Iosia, na ia auina atu ai Safana le failautusi le atalii o Asalaia, le atalii o Mesulama, i le fale o Ieova+ ma faapea atu iā te ia: 4 “Ia e alu aʻe iā Hilikia+ le ositaulaga sili, ina ia ao mai e ia tupe uma ua aumaia i le fale o Ieova,+ o loo aoina e leoleo faitoto‘a mai i le nuu.+ 5 Ia avatu tupe i ē ua tofia e vaavaaia le galuega i le fale o Ieova, ina ia o latou avatu iā i latou o le a galulue e faaleleia mea ua faaleagaina* o le fale o Ieova,+ 6 o le ʻautufuga, o le ʻaukamuta, o ē e ati maa; ma ia latou faaaogā tupe e faatau mai ai laupapa ma maa ua tipiina e faaleleia ai le fale.+ 7 Ae aua neʻi faamasinosino iā i latou e tuuina atu i ai tupe, auā e maufaatuatuaina i latou.”+
8 Mulimuli ane, ona fai atu lea o Hilikia le ositaulaga sili iā Safana le failautusi:+ “Ua ou maua le tusi o le Tulafono+ i le fale o Ieova.” Ona avatu lea e Hilikia le tusi iā Safana, ma ua ia faitau i ai.+ 9 Ona sau ai lea o Safana le failautusi i le tupu, ma faapea mai iā te ia: “Ua aoina* e au auauna tupe na maua i le fale, ma ua latou tuuina atu i ē ua tofia e vaavaaia le galuega i le fale o Ieova.”+ 10 Ua fai mai fo‘i Safana le failautusi i le tupu e faapea: “E iai se tusi+ na aumai e Hilikia le ositaulaga iā te aʻu.” Ona faitau atu lea e Safana o le tusi i luma o le tupu.
11 Ina ua faalogo le tupu i upu o le tusi o le Tulafono, ona ia saeia loa lea o ona ofu.+ 12 Ua poloaʻi atu le tupu iā Hilikia le ositaulaga, o Aikamo+ le atalii o Safana, o Akapora le atalii o Mekaio, o Safana le failautusi, ma Asaia le auauna a le tupu e faapea: 13 “Inā ō ia ma fesili atu iā Ieova mo aʻu, ma le nuu, atoa ma Iuta uma, e faatatau i upu o lenei tusi na maua; auā ua matuā tele le toʻasā o Ieova iā i tatou,+ auā e leʻi usiusita‘i o tatou augātamā i upu o lenei tusi. E latou te leʻi faia mea uma o loo tusia ai e faatatau iā i tatou.”
14 Ona ō atu lea o Hilikia le ositaulaga, o Aikamo, o Akapora, o Safana, ma Asaia iā Ulata le perofeta fafine.+ O ia o le avā a Saluma o lē e vaavaaia ofu,* o le atalii o Tikeva, le atalii o Areasa, ma sa nofo Ulata i Ierusalema i le itumalo lona lua; ona latou talanoa atu lea iā te ia i inā.+ 15 Ua fai mai Ulata iā i latou: “O le mea lenei ua fetalai mai ai Ieova le Atua o Isaraelu, ‘Ia outou fai atu i le tagata na aauina mai outou iā te aʻu: 16 “O le mea lenei ua fetalai mai ai Ieova, ‘O le a ou faaoo atu puapuaga i luga o lenei nuu ma ē o loo nonofo ai, e pei lava o upu uma o le tusi na faitauina e le tupu o Iuta.+ 17 Talu ai ua latou tuua aʻu, ma faamū taulaga i isi atua+ ina ia o latou faatigā ai iā te aʻu i galuega uma a o latou lima,+ o le a matuā mumū aʻe ai loʻu ita i lenei nuu, ma e lē toe tineia lava.’”+ 18 Ae o le mea lenei e tou te fai atu ai i le tupu o Iuta o lē na aauina mai outou e fesili iā Ieova, “O le mea lenei ua fetalai mai ai Ieova le Atua o Isaraelu e tusa ma upu na e faalogo i ai: 19 ‘Talu ai ua e agamalu ma ua e faamaulalo+ i luma o Ieova, i lou faalogo i mea ua ou fai atu ai e faasaga i lenei nuu ma ē o loo nonofo ai, o le a oo se mala iā i latou ma o le a avea ma mea e fefefe ai, ma ua e saeia ai ou ofu+ ma e tagi i oʻu luma, o lea ua ou faalogo ai iā te oe, ua fetalai mai ai Ieova. 20 O le mea lea ou te tuufaatasia ai oe ma ou augātamā,* o le a tanu fo‘i oe ma le filemu i lou tuugamau, ma e te lē vaai i puapuaga uma ou te aumaia i lenei nuu.’”’” Ona latou taʻu mai lea o le tali i le tupu.