Esoto

38 Ua ia faia le fata faitaulaga e fai ai taulaga mū i le laau o le setima. Ua fai faatafafā, e lima kupita* le umi, e lima kupita le lautele, ma e tolu kupita lona maualuga.+ 2 Ua ia faia ona seu i ona tulimanu e fā. Ua faia ona seu i le mea na faia ai le fata faitaulaga. Ona ia ufiufi lea i le ʻapamemea.+ 3 Ua ia faia o mea uma e faaaogā i le fata faitaulaga, o ʻapa, o suō, o ipu faaofuofu, o tui, ma salefu. Ua ia faia o ia mea uma i le ʻapamemea. 4 Ua ia faia foʻi se lagolago valavala mo le fata faitaulaga i le ʻapamemea i lalo o le augutu, ma ua oo i le ogatotonu o le fata faitaulaga. 5 Ua ia tunu ma fai ai mama e fā ma ua tuu i tulimanu e fā o le fata faitaulaga e lata ane i le lagolago valavala e faia i le ‘apamemea, e fai ma mea e lagolago ai amo. 6 Mulimuli ane ua ia faia amo mo le fata faitaulaga i laau o le setima, ma ufiufi i le ʻapamemea. 7 Ona ia sulu lea o amo i mama i itu o le fata faitaulaga ina ia amo ai. Ua ia faia le fata faitaulaga e foliga o se pusa laupapa e pū totonu.

8 Ua ia faia le faatanoa+ ma lona tulaga i le ʻapamemea; ua ia faaaogā faata* a fafine o ē na faatulaga e auauna i le faitotoʻa o le faleʻie o le feiloaʻiga.

9 Ona ia faia lea o le lotoā.+ Ua iai i le lotoā ni ʻie tautau ua faia i le ʻie lino ua lelei ona milo ona filo, i le itu i saute e faasaga i saute, ma e 100 kupita le uumi.+ 10 E 20 ona poutū ma e 20 fo‘i ona lagolago e faia i ʻapamemea, ma o pine ma sooga o poutū ua faia i le siliva. 11 E faapea foʻi i le itu i mātū, e 100 kupita le uumi o ʻie tautau. E ʻapamemea ona poutū e 20 ma ona lagolago e 20. O pine ma sooga o poutū ua faia i le siliva. 12 A o le itu i sisifo e 50 kupita le uumi o ‘ie tautau. E sefulu ona poutū ma lagolago e sefulu, ma o pine ma sooga o poutū ua faia i le siliva. 13 Ae o le lautele o le itu i sasaʻe e 50 kupita, i le mea e oso aʻe ai le lā. 14 E 15 kupita le uumi o ʻie tautau i le tasi itu o le faitotoʻa o le lotoā, faatasi ma poutū e tolu ma lagolago e tolu. 15 E 15 kupita foʻi le uumi o ʻie tautau i le isi itu o le faitotoʻa o le lotoā, faatasi ma poutū e tolu ma lagolago e tolu. 16 O ʻie tautau uma ua faataamilo i le lotoā, ua faia i ʻie lino ua lelei ona milo. 17 O lagolago o poutū ua faia i le ʻapamemea, o pine ma sooga o poutū ua faia i le siliva, o tumutumu ua ufiufi i le siliva, ma e siliva foʻi mea e sosoo ai poutū uma o le lotoā.+

18 O le ʻie pupuni o le faitotoʻa o le lotoā ua lalaga i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo. E 20 kupita lona umi ma e 5 kupita le maualuga, e tutusa lona maualuga ma ʻie tautau o le lotoā.+ 19 E ʻapamemea ona poutū e fā ma ona lagolago e fā. E siliva ona pine ma sooga, ma ua ufiufi o latou tumutumu i le siliva. 20 E ʻapamemea pine uma o le faleʻie paia, ma pine o le lotoā lea o loo faataamilo ai.+

21 O mea nei o le faitauga o mea o le faleʻie paia, o le faleʻie paia ua iai le atolaau o le feagaiga,*+ lea na faitauina ona o le poloaʻiga a Mose, o le tiute tauave lea a le ʻau sa Levī+ i le taʻitaʻiga a Itamaro,+ le atalii o Arona le ositaulaga. 22 Ua faia e Pesaleli+ le atalii o Auri, le atalii o Huro mai i le ituaiga o Iuta, o mea uma na poloaʻi mai ai Ieova iā Mose. 23 Ua faatasi ma ia o Oliavu+ le atalii o Aisamako mai i le ituaiga o Tanu, o se tufuga, ma o se tagata e suʻi teuteu, o sē foʻi e lalaga i filo lanu moana, i fulufulu mamoe lanu violē, i mea ua vali mūmū sesega, ma ʻie lino lelei.

24 O auro uma na faaaogā i le galuega atoa o le mea paia, e tutusa ma le aofaʻiga o auro o le taulaga lūlū,+ e 29 taleni* ma e 730 sekeli* e tusa ma le fua masani o le mea paia.* 25 O le siliva mai i ē na lesitalaina i le faapotopotoga, e 100 taleni ma sekeli e 1,775 e tusa ma le fua masani o le mea paia.* 26 O le ʻafa o le sekeli mo le tagata e toʻatasi, o le ʻafa o le sekeli lea e tusa ma le fua masani o le mea paia,* mo tagata taʻitoʻatasi ua aofia i ē ua lesitalaina e 20 tausaga agaʻi i luga le matutua,+ e 603,550 le aofaʻiga.+

27 E 100 taleni siliva na faaaogā e tunu ma fai ai lagolago o le mea paia ma lagolago o le ʻie puipui; e 100 lagolago na faia i taleni e 100, e tasi le taleni i le lagolago e tasi.+ 28 O sekeli foʻi e 1,775 na ia faia ai o pine mo poutū, ma ufiufi ai tumutumu o poutū ma sosoo faatasi ai.

29 O ʻapamemea o le taulaga* e 70 taleni ma sekeli e 2,400. 30 Ona ia faia ai lea o lagolago o le faitotoʻa o le faleʻie o le feiloaʻiga, o le fata faitaulaga ʻapamemea ma lona lagolago valavala ʻapamemea, o mea uma e faaaogā mo le fata faitaulaga, 31 o lagolago e faataamilo i le lotoā, o lagolago o le faitotoʻa o le lotoā, o pine uma o le faleʻie paia, ma pine uma+ e faataamilo i le lotoā.