Esekielu

17 Ua toe oo mai le afioga a Ieova iā te aʻu e faapea: 2 “Le atalii e o le tagata, ia e faamatala se tupua ma taʻu atu se faaupuga masani e faatatau i le aiga o Isaraelu.+ 3 Ia e faapea atu, ‘O le fetalaiga lenei a le Alii Pule Silisili Ese o Ieova: “O le aeto telē,+ e tetelē ona apaʻau, e uumi fulu o ona apaʻau, e tele ona fulu ma e felanulanuaʻi, ua sau i Lepanona+ ma ave le tumutumu o le laau o le arasi.+ 4 Ua ia oto le moemoe o loo i le tumutumu ma avatu i le nuu o ē faia fefaatauaʻiga,* ma tuu ai i se aai o tagata e faia fefaatauaʻiga.+ 5 Ona ia ave lea o ni fatu o le laueleele+ ma tuu i se fanua lafulemu. Ua ia totōina e pei o le laau o le sapasapa i autafa o vai e tele. 6 Ua oo ina tupu aʻe ma avea ma vine lauolaola+ e tupu maulalo, ua falala i totonu ona lālā ma ua sosolo ona aa i ona lalo ifo. Ua oo ina avea ma vine, ua tutupu aʻe tātupu ma oso aʻe foʻi lālā.+

7 “ʻ“Ae ua sau se isi aeto telē,+ e tetelē ona apaʻau ma e iai ona fulu tetelē.+ Ona faasosolo atu lea e le vine o ona aa ma le naunau tele iā te ia, e ese mai i le togālaau lea na totō ai, ma ua faalālā atu ona lālā iā te ia ina ia faasūsū e ia o ia.+ 8 Ae ua uma ona totōina i se fanua lelei e lata i vai e tele, ina ia tutupu mai ai ni lālā ma fua mai ai ni fua, ma avea ai ma vine matagofie.”’+

9 “Ia faapea atu, ‘O le fetalaiga lenei a le Alii Pule Silisili Ese o Ieova: “Po o le a tupu lauolaola ea le vine? Po o le a lē liaʻieseina ea e se tasi ona aa+ ma pala ai ona fua, ma oo ai ina mamae ona tātupu?+ O le a matuā mago lava, ma e lē manaʻomia ai se lima malosi po o ni tagata e toʻatele e liaʻiina ona aa. 10 E ui ua sii le vine ma toe totō i se isi mea, ae po o le a tupu lauolaola ea? Po o le a lē matuā mago ea, pe a agi mai i ai le matagi mai i sasaʻe? O le a mago lava i le togālaau lea o loo tupu aʻe ai.”’”

11 Ua toe oo mai le afioga a Ieova iā te aʻu e faapea: 12 “Faamolemole ia fai atu i le aiga fouvale, ‘Pe e tou te lē iloa ea le uiga o nei mea?’ Ia fai atu, ‘Tagaʻi foʻi! Na sau le tupu o Papelonia i Ierusalema ma ave lona tupu ma ona perenise, ma avatu i latou i Papelonia.+ 13 E lē gata i lea, ua ia osia se feagaiga ma se tasi o fanau a le tupu+ ma faatautō iā te ia.+ Ona ia aveina lea o alii sili o le atunuu,+ 14 ina ia faamaulaloina ai le malo, e lē mafai ona toe malosi, ma e faatoʻā mafai ona tumau pea le malo pe afai e tausia lana feagaiga.+ 15 Ae mulimuli ane, ua fouvale le tupu faasaga iā te ia+ e ala i le aauina atu o ana avefeʻau i Aikupito, ina ia maua mai iā i latou ni solofanua+ ma se ʻautau toʻatele.+ Po o le a taulau manuia o ia? Po o le a sao mai i le faasalaga lē ua faia nei mea? Pe e mafai ona ia solia le feagaiga ma sao mai i le faasalaga?’+

16 “ʻ“Ou te tautō iā te aʻu lava,” ua fetalai mai le Alii Pule Silisili Ese o Ieova le Atua soifua, “o le a oti o ia i Papelonia, i le mea o loo nofo ai le tupu,* o lē na tofia o ia* e fai ma tupu, o lē e ana le tautoga ua ia ʻinoʻino i ai, ma o lē e ana le feagaiga ua ia solia.+ 17 O le a lē aogā le ‘autau toʻatele ma fitafita e toʻatele a Farao i le taua,+ pe a tanuina mea maupuʻepuʻe ma fausia pā e siʻo ai ina ia fasiotia ai le toʻatele. 18 Ua ia ʻinoʻino i le tautoga ma solia le feagaiga. E ui lava na ia tautō* ae ua ia faia lava nei mea uma, ma o le a lē sao lava o ia.”’

19 “‘O lea, o le fetalaiga lenei a le Alii Pule Silisili Ese o Ieova le Atua soifua: “Ou te tautō iā te aʻu lava, ou te taui atu lava iā te ia e tusa ma laʻu tautoga na ia ʻinoʻino i ai, ma laʻu feagaiga+ na ia solia. 20 O le a ou lafo laʻu upega i ona luga, ma o le a maua o ia i laʻu upega e tuli ai manu.+ O le a ou aumaia foʻi o ia i Papelonia, ma o le a faia la ma faamasinoga i inā, ona o lona lē faamaoni iā te aʻu.+ 21 O le a feoti i le pelu tagata uma ua fesolasolataʻi solo o ana ʻautau, ma o le a faasalalau solo i itu uma* ē e totoe.+ O le a outou iloa ai o aʻu lava o Ieova, ua ou fai atu ai.”’+

22 “‘O le fetalaiga lenei a le Alii Pule Silisili Ese o Ieova: “O le a ou ave se moemoe mai i le tumutumu o le laau maualuga o le arasi+ ma totō, ou te tau mai se moemoe fou+ mai i le tumutumu o ona lālā, ma o le a ou totōina i se mauga e sili ona maualuga.+ 23 O le a ou totōina i se mauga maualuga o Isaraelu; o le a tutupu ona lālā ma fua mai ni fua, ma avea ma laau o le arasi e matagofie. O le a ofaga i ai manulele eseese uma ma nonofo ai i le paolo o ona lālā. 24 O le a iloa ai e laau uma o le fanua, o aʻu o Ieova, ua ou faamaulaloina le laau maualuga ma faaeaina le laau maulalo;+ ua ou faamago le laau lanu meamata ma faia le laau ua mago ina ia fuga mai.+ O aʻu o Ieova, ua ou fai atu ma faia lea mea.”’”