Salamo

I le faatonu o le ʻaufaimusika. O le pese a Tavita.

20 Tau ina ia tali mai Ieova iā te oe i le aso o le puapuaga.

Tau ina ia puipuia foʻi oe i le suafa o le Atua o Iakopo.+

2 Tau ina ia auina mai e ia le fesoasoani mo oe mai i le mea paia+

Ma tausia oe mai i Siona.+

3 Tau ina ia manatua e ia au taulaga uma;

Tau ina ia talia fiafia e ia* lau taulaga mū. (Selā)

4 Tau ina ia foaʻi mai e ia iā te oe o mea o naunau i ai lou loto,+

Ma faataunuuina e ia au fuafuaga uma.

5 E matou te alalaga ma le olioli ona o au galuega o le faaolataga;+

E sii aʻe a matou tagāvai i le suafa o lo matou Atua.+

Tau ina ia faataunuuina e Ieova o au talosaga uma.

6 O lenei, ua ou iloa e faaolaina e Ieova o lē ua ia faauuina.+

E na te tali mai iā te ia mai i lona lagi paia

I le faaolataga tele* a lona aao taumatau.+

7 E faalagolago nisi i kariota, ae e faalagolago isi i solofanua,+

Ae e tatou te valaau i le suafa o Ieova lo tatou Atua.+

8 Ua faatoʻilaloina ma ua paʻuʻū i latou,

Ae ua tatou tutū i luga ma toe faafoʻisia i tatou.+

9 Ieova e, ia e faaolaina le tupu!+

E tali mai o ia i le aso e matou te valaau atu ai mo le fesoasoani.+