O le Tusi Muamua o Samuelu

25 Ua maliu Samuelu;+ ona faapotopoto faatasi lea o Isaraelu uma, ua taufaitagitu‘i ona o ia, ua latou tanu foʻi iā te ia i lona fale i Rama.+ Ona tulaʻi lea o Tavita ma alu ifo i le toafa o Parana.

2 Sa iai le tasi tagata i Meona,+ sa galue o ia i Karamelu.*+ E matuā mau‘oa le tagata; sa iā te ia mamoe e 3,000 ma ʻoti e 1,000, ma na ia sele fulufulu o ana mamoe i Karamelu. 3 O Napalu+ le igoa o le tagata, a o Apikaila+ le igoa o lana avā. O ia o se avā e matuā faautauta ma lalelei, a o le tane o se tagata e ʻinaʻinā ma e leaga foʻi ana mea e fai,+ e mai i le aiga o Kalepo.+ 4 Ua faalogo Tavita a o iai i le toafa, o loo sele e Napalu fulufulu o ana mamoe. 5 Ona aauina atu lea e Tavita o tauleleʻa e toʻasefulu, ua faapea atu Tavita iā i latou: “Inā ō aʻe ia i Karamelu, ma ia outou ō atu iā Napalu, ma fesili atu iā te ia i loʻu igoa, po o ā mai o ia. 6 Tou te faapea atu, ‘Ia soifua oe ma ia e manuia,* ia manuia lou aiga, ma ia manuia foʻi mea uma ua iā te oe. 7 Ua ou faalogo o loo sele fulufulu o au mamoe. Sa faatasi au leoleo mamoe ma i matou. Matou te leʻi faia se mea leaga iā i latou,+ ma e leʻi iai foʻi sa latou mea na leiloa i aso uma na iai i latou i Karamelu. 8 Ia e fesili i ou tauleleʻa, ona latou taʻu atu lea iā te oe. Tau ina ia e manatu mai i oʻu tauleleʻa, auā o se taimi fiafia* lea ua latou ō atu ai. Faamolemole, seʻi e foaʻi ane so o se mea o loo i lou lima+ i au auauna ma lou atalii o Tavita.’”

9 Ua ō atu tauleleʻa o Tavita ma fai atu iā Napalu na upu uma i le igoa o Tavita. Ina ua uma, 10 ona tali mai lea o Napalu i auauna a Tavita e faapea: “O ai Tavita, o ai foʻi le atalii o Iese? E toʻatele auauna i aso nei ua sosola ese mai i o latou matai.+ 11 Po ou te avatu ea aʻu meaʻai, o vai, ma aano o manu ua fasia mo ē e seleina fulufulu o aʻu mamoe, ma foaʻi atu i tagata ou te lē iloa po o fea e ō mai ai?”

12 Ona toe fo‘i mai lea o tauleleʻa o Tavita, ma taʻu mai iā te ia o nei upu uma. 13 Ona fai atu loa lea o Tavita i ona tagata: “Ia taʻitasi le tagata ma fusi i lana pelu!”+ Ona taʻitasi lea o i latou ma fusi i lana pelu, ua fusi foʻi e Tavita lana pelu, ma e tusa ma le toʻa 400 tagata ua mulimuli atu iā Tavita, ae e toʻa 200 tagata na faamuli i a latou mea.

14 O le taimi lea, ua taʻu atu e le tasi o auauna iā Apikaila le avā a Napalu e faapea: “Faauta! na aauina mai e Tavita avefeʻau mai le toafa e faamanuia i lo tatou matai, ae na ia soona avaavau atu iā i latou.+ 15 Na matuā agalelei mai na tagata iā i matou. E latou te leʻi faia se mea leaga iā i matou, ma e leai foʻi sa matou mea e tasi na leiloa i aso uma na matou iai faatasi ma i latou i le fanua.+ 16 Sa pei i latou o se pā na siʻosiʻomia ai i matou i le ao ma le pō, i aso uma na matou iai ma i latou a o leoleoina le lafu mamoe. 17 O lenei, ia e vaai po o le ā se mea e te faia, auā o le a oo mai puapuaga i lo tatou matai ma lona aiga uma,+ o ia foʻi o le tagata e lē aogā,+ e maʻimau le taimi e talanoa atu i ai.”

18 Ona ave faavave lea e Apikaila+ o falaoa lapotopoto e 200, o fagu uaina lapopoʻa e lua, o mamoe ua saunia e lima, o sea* o saito tunu e lima, o keke vine e 100, o keke o mati mamago e 200, ma ua ia faaee i luga o asini.+ 19 Ona ia fai atu lea i ana auauna: “Ia muamua atu iā te aʻu. O lea ou te mulimuli atu iā te outou.” Ae e na te leʻi taʻuina atu se mea i lana tane o Napalu.

20 A o tiʻetiʻe o ia i le asini ma alu ifo faalilolilo i le mauga, vaai! o loo ō ifo Tavita ma ona tagata aga‘i i le mea o loo alu atu ai o ia, ma ua fetaiaʻi o ia ma i latou. 21 Ae ua faapea ifo Tavita: “E leai se mea na ou leoleoina ai fua mea uma a lenei tagata i le toafa. E leai se mea e tasi na leiloa o ana mea uma,+ a o lenei ua ia taui mai iā te aʻu le lelei i le leaga.+ 22 Ia matuā faasala e le Atua fili o Tavita,* pe afai ou te faasao se tasi o tagata o Napalu,* seʻia oo i le taeao.”

23 Ina ua iloa atu e Apikaila Tavita, ona ia alu ifo faatopetope lea mai i le asini ma faapaʻū faō i luma o Tavita, ma ifo i le eleele. 24 Ua ia faapaʻū i ona vae ma faapea mai: “Loʻu alii e, ia i luga iā te aʻu lenei sesē; seʻi e tuu mai lau auauna teine e tautala atu iā te oe, ma seʻi e faafofoga mai i upu a lau auauna teine. 25 Faamolemole, aua neʻi uaʻi atu loʻu alii i lenei tagata lē aogā o Napalu,+ auā e faapei o lona igoa, e faapena lava o ia. O Napalu* lona igoa, e valea lava o ia. A o aʻu lau auauna teine, ou te leʻi iloa tauleleʻa a loʻu alii na e aauina atu. 26 O lenei loʻu alii e, ou te tautō iā Ieova le Atua soifua faapea ma oe, o Ieova ua taofia oe+ mai i lou nofosala i le toto,+ ma lou tauimasui atu* i lou lava lima. O lea, ia pei o Napalu ou fili, ma i latou uma e saʻili e agaleaga i loʻu alii. 27 O lenei foʻi, o le meaalofa*+ lenei ua aumai e lau auauna teine i loʻu alii, ia avatu i tauleleʻa o loo mulimuli mai i loʻu alii.+ 28 Faamolemole, ia e faamagalo le solitulafono a lau auauna teine, auā e faia lava e Ieova mo loʻu alii se aiga e tumau,+ auā o loo tau e loʻu alii taua a Ieova,+ ma e leʻi maua foʻi se mea leaga iā te oe i ou aso uma.+ 29 Pe a tulaʻi mai se tagata e tulituliloa iā te oe ma saʻili ina ia faaumatia lou ola, e puipuia lava e Ieova lou Atua le ola o loʻu alii, e pei ona puipuia e se tasi o mea tāua i se ato; a o le ola o ou fili, e sasau atu e ia e pei o se maa mai i le maatā. 30 Pe a faia e Ieova i loʻu alii o mea lelei uma ua ia folafola mai, ma tofia oe e avea ma taʻitaʻi o Isaraelu,+ 31 o le a e lē toe salamō* mulimuli ane, ona ua e sasaa fua le toto o le tagata e lē sala, ma e tauimasui atu*+ i lou lava lima. Pe a faia e Ieova le mea lelei i loʻu alii, ia e manatua mai lau auauna teine.”

32 Ona fai atu lea o Tavita iā Apikaila: “Ia viia Ieova le Atua o Isaraelu, o lē na auina mai oe i le aso nei e faafetaiaʻi iā te aʻu! 33 Faafetai i lou mafaufau lelei! Tau ina ia faamanuiaina oe ona o lou taofia o aʻu i lenei aso mai i le nofosala i le toto,+ ma tauimasui atu* i loʻu lava lima. 34 Auā ou te tautō iā Ieova le Atua soifua o Isaraelu, ma o lē na taofia aʻu mai i le faia o se mea leaga iā te oe,+ pe ana e lē faavavevave e faafetaiaʻi iā te aʻu,+ semanū e oo atu taeao ua leai se tagata o Napalu*+ o totoe.” 35 Ona talia lea e Tavita o mea na ia aumaia iā te ia, ma faapea atu: “Inā alu ia ma le filemu i lou fale. Vaai, ua ou faalogo atu i au upu, ma o le a ou faia e tusa ma lau talosaga.”

36 Mulimuli ane, ona toe foʻi atu lea o Apikaila iā Napalu, a o faia e Napalu se faigaʻai i lona fale e pei o le faigaʻai a se tupu; ua fiafia le loto o Napalu, ma ua matuā onā foʻi o ia. Ae ua lē taʻuina atu e Apikaila iā te ia se mea e tasi, seʻia oo ina malama aʻe le taeao. 37 Ua oo i le taeao ma ua teʻa le onā o Napalu, ona taʻu atu lea e lana avā o nei mea uma iā te ia. Ona tau pē ai lea o lona fatu, ma ua pei ai o ia o se maa. 38 Mulimuli ane, ina ua mavae le pe ā ma le sefulu aso, ona taia lea e Ieova o Napalu ma ua oti ai.

39 Ua faalogo Tavita ua oti Napalu, ona ia faapea ane lea: “Ia viia Ieova o lē na ia faia le faamasinoga+ i faifaiga a Napalu+ ma taofia lana auauna mai i le faia o se mea leaga,+ ma ua faafoʻi atu e Ieova le leaga o Napalu i lona lava ulu!” Ona auina atu lea e Tavita o le feʻau e faamalamalama iā Apikaila ina ia fai o ia ma ana avā. 40 Ua ō atu auauna a Tavita iā Apikaila i Karamelu ma faapea atu iā te ia: “Ua aauina mai i matou e Tavita iā te oe ina ia fai oe ma ana avā.” 41 Ona tulaʻi loa lea o Apikaila, ua ifo i le eleele ma faapea mai: “O lau pologa lenei, ia fai ma auauna e fufuluina vae+ o auauna a loʻu alii.” 42 Ua faavave ona tulaʻi o Apikaila,+ ua tiʻetiʻe i le asini, ua savavali atu foʻi ana auauna teine e toʻalima e mulimuli atu iā te ia; ua latou ō faatasi ma avefeʻau a Tavita, ma ua avea o ia ma ana avā.

43 Na faaipoipo atu foʻi Tavita iā Ainoama+ mai i Isereelu;+ ua avea uma nei fafine e toʻalua ma ana avā.+

44 Ae ua avatu e Saulo Mekala lona afafine,+ o le avā a Tavita, e fai ma avā a Paleti+ le atalii o Laisa, o le tagata Kali.