Ieremia
18 O le afioga lenei a Ieova na oo mai iā Ieremia e faapea: 2 “Inā tulaʻi ia ma alu ifo i le fale o le fai ipu omea,+ ona ou faailoa atu ai lea iā te oe o aʻu upu i inā.”
3 Ona ou alu ifo lea i le fale o le fai ipu omea, ma o loo faia lana galuega i luga o mea taavilivili a le fai ipu omea. 4 Ae o le ipu na faia e le fai ipu omea i le omea, ua faaleagaina i lona lima. Ona ia toe faia ai lea o se isi ipu, e tusa ma le mea ua ia mana‘o i ai.*
5 Ona oo mai lea iā te aʻu o le afioga a Ieova e faapea: 6 “‘Le aiga o Isaraelu e, po ou te lē mafaia ea ona ou faia iā te outou e pei ona faia e lenei fai ipu omea?’ ua fetalai mai ai Ieova. ‘Faauta! le aiga o Isaraelu e, e pei o le omea i le lima o le fai ipu omea, e faapea foʻi outou i loʻu lima.+ 7 O so o se taimi ou te tautala atu ai e faatatau i le liaʻiina, lepetia, ma le faaumatiaina o se atunuu po o se malo,+ 8 ma afai e lafoa‘ia e lenā atunuu ana amioga leaga na ou tautala atu ai, ona toe sui ai lea o loʻu manatu i le malaia na ou manatu e faaoo i ai.+ 9 Ae o so o se taimi ou te tautala atu ai e faatatau i le atiaʻe ma le totōina o se atunuu po o se malo, 10 ma e faia e i latou mea leaga i oʻu luma ma lē faalogo mai i loʻu leo, ona toe sui ai lea o loʻu manatu i mea lelei na ou manatu e faia mo i latou.’
11 “O lenei, inā fai atu ia faamolemole i tagata o Iuta ma ē o loo nonofo i Ierusalema, ‘O le mea lenei ua fetalai mai ai Ieova: “O lea ua ou saunia* se mala ma fafau se mea leaga e faia iā te outou. Faamolemole, inā outou liliuese mai i o outou ala leaga, ma ia suia o outou ala ma a outou amioga.”’”+
12 Ae ua latou faapea mai: “E lē aogā!+ Auā e matou te mulimuli i o matou lava manatu, ma e taʻitasi foʻi i matou ma gaoioi e tusa ma le maaa o lona loto ua leaga.”+
13 O le mea lenei ua fetalai mai ai Ieova:
“Faamolemole, ia outou fesilisili atu i atunuu.
Po o ai ua faalogo i se mea faapenei?
Ua faia e le taupou o Isaraelu se mea e sili ona inosia.+
14 Pe e liusuāvai ea le kiona mai i papa maualuluga o Lepanona?
Pe e mamate ea vai mālūlū o loo tafe mamao mai?
15 Ae ua faagaloina aʻu e loʻu nuu.+
Auā ua latou faia taulaga* i le mea e lē aogā,+
Ma ua latou faatausuai ai tagata i o latou ala, o ala o aso anamua,+
Ma savavali i auala ‘alo e lauleaga ma e lē gatasi,*
16 Ina ia fai lo latou laueleele ma mea e fefefe ai,+
Ma mea e tuufaaili i ai e faavavau.+
O i latou uma e ui ane ai, e taufai pulatoʻa atu ma le fefefe ma lūlū o latou ulu.+
17 E pei o le matagi mai i sasaʻe, ou te faataapeapeina i latou i luma o le fili.
E ū atu foʻi iā i latou loʻu tua, ae e lē o oʻu mata, i le aso o lo latou malaia.”+
18 Ona latou faapea ane lea: “Inā ō mai ia, seʻi o tatou mafaufau i se mea leaga e fai iā Ieremia,+ auā e lē mavae atu le tulafono* mai i o tatou ositaulaga, po o le fautuaga mai i tagata atamamai, po o le upu mai i perofeta. Inā ō mai ia, seʻi o tatou faia ni tala leaga e faatatau iā te ia,* ma aua neʻi uaʻi atu i ana faamatalaga.”
19 Ieova e, ia e liuliualo mai iā te aʻu,
Ma faafofoga mai i faamatalaga a ē e tetee mai iā te aʻu.
20 Pe e toe taui atu ea le lelei i le leaga?
Auā ua latou eli se lua mo aʻu.+
Ia e manatua lo‘u tū i ou luma e tautala atu i mea lelei e faatatau iā i latou,
Ina ia liliuese ai lou toʻasā mai iā i latou.
Tau ina ia avea a latou avā ma fafine ua toesea a latou fanau, ma fafine ua oti a latou tane.+
Tau ina ia fasiotia o latou tamāloloa i le faamaʻi e oti ai,
Ma ia fasia o latou tauleleʻa i le pelu i le taua.+
22 Ia lagona le alaga mai i o latou fale,
Pe a e faaoo faafuaseʻi ifo iā i latou ē e faoa a latou mea.
Auā ua latou eli se lua e puʻea ai aʻu,
Ma ua latou faataatitia ni mailei mo oʻu vae.+
Aua e te ufitia la latou mea sesē,
Ma aua e te soloiesea la latou agasala mai i ou luma.