O le Tusi Lona Lua o Nofoaiga a Tupu

1 Ua maua pea e Solomona le atalii o Tavita le malosi i lona malo, ua faatasi foʻi Ieova ma ia ma faateleina pea lona mamalu.+

2 Ua aami e Solomona Isaraelu uma, o taʻitaʻi o le taʻitoʻaafe ma le taʻitoʻaselau, o faamasino, ma taʻitaʻi uma o Isaraelu, o alii sili o aiga o tamā. 3 Ona ō atu lea o Solomona ma le faapotopotoga uma i le mea maualuga i Kipeona,+ auā o i inā sa iai le faleʻie o le feiloaʻiga a le Atua moni, lea na fausia e Mose le auauna a Ieova i le toafa.* 4 Peitaʻi, na ave aʻe e Tavita le Atolaau a le Atua moni mai i Kiriata-iarima,+ ma ave i le mea na saunia e Tavita e tuu ai; na ia faatūina se faleʻie i Ierusalema e tuu ai.+ 5 O le fata faitaulaga ʻapamemea+ fo‘i na fausia e Pesaleli+ le atalii o Auri, le atalii o Huro, na tuu i luma o le faleʻie paia o Ieova; ma na ō atu Solomona ma le faapotopotoga ma tatalo ai i luma.* 6 Na faia e Solomona taulaga i inā i luma o Ieova, i luga o le fata faitaulaga ʻapamemea+ sa i le faleʻie o le feiloaʻiga, ma na ia ofoina atu ai taulaga mū e 1,000.

7 I le pō lenā, na faaali mai ai le Atua iā Solomona ma fetalai mai iā te ia: “Inā talosaga mai ia i se mea ou te avatua iā te oe.”+ 8 Ona faapea atu lea o Solomona i le Atua: “Na e matuā alofa faamaoni iā Tavita+ loʻu tamā, ma ua e fai foʻi aʻu ma tupu e sui iā te ia.+ 9 O lenei, Ieova e, le Atua, ia faataunuuina lau folafolaga na fai mai iā Tavita loʻu tamā,+ auā o oe na faia aʻu ma tupu i lenei nuu e matuā toʻatele, e pei o le efuefu o le eleele.+ 10 Ia e foaʻi mai iā te aʻu le atamai ma le poto+ ina ia ou taʻitaʻia ai lenei nuu,* auā o ai ea e mafai ona faamasinoina lou nuu ua matuā toʻatele?”+

11 Ona fetalai mai lea o le Atua iā Solomona: “Talu ai ua naunau lou loto i lenei mea ma ua e lē talosaga mai mo le tamaoaiga, o ʻoa, ma le mamalu, pe ia faaumatia i latou o ē e ita iā te oe, ua e lē talosaga mai foʻi ina ia faafualoa lou ola,* ae ua e talosaga mai mo le atamai ma le poto e faamasinoina ai loʻu nuu ua ou faia ai oe ma tupu,+ 12 o le a ou foaʻiina atu ai le atamai ma le poto iā te oe; ou te foaʻiina atu foʻi iā te oe le tamaoaiga, o ʻoa, ma le mamalu, e leʻi iai i se tupu na muamua atu iā te oe, e lē iai foʻi i ē o le a mulimuli mai iā te oe.”+

13 Ona sau lea o Solomona i Ierusalema mai i le mea maualuga sa i Kipeona,+ mai i luma o le faleʻie o le feiloaʻiga; ma ua pule o ia i Isaraelu. 14 Ua faapotopoto mai pea e Solomona o kariota ma solofanua,* ua iā te ia o kariota e 1,400 ma solofanua*+ e 12,000, ua ia tuu foʻi na mea i aai o kariota+ e latalata ane i le tupu i Ierusalema.+ 15 Ua faia e le tupu o mea siliva ma mea auro i Ierusalema ia matuā tele lava e pei o maa,+ ua ia faia foʻi laupapa arasi ia matuā tele lava e pei o laau o le sukamoru i Sefila.*+ 16 Na aumaia solofanua a Solomona mai i Aikupito,+ ma na faatau mai e le ʻaufaatauʻoa a le tupu le tele o solofanua* i se tau faatulagaina.+ 17 E 600 sekeli siliva le tau o le kariota e tasi na faatauina mai ai i Aikupito, ae e 150 sekeli siliva le tau o le solofanua; ona latou toe faatauina atu lea i tupu uma o tagata Hetī ma tupu o Suria.