Salamo

136 Ia faafetai atu iā Ieova, auā e lelei o ia;+

E tumau e faavavau lona alofa faamaoni.+

 2 Ia faafetai atu i le Atua o atua,+

Auā e tumau e faavavau lona alofa faamaoni.

 3 Ia faafetai atu i le Alii o alii,

Auā e tumau e faavavau lona alofa faamaoni.

 4 E na o ia lava e faia mea e matuā ofoofogia,+

Auā e tumau e faavavau lona alofa faamaoni.+

 5 Na ia faia le lagi i le poto,+

Auā e tumau e faavavau lona alofa faamaoni.

 6 Na ia fofola le lalolagi i luga aʻe o vai,+

Auā e tumau e faavavau lona alofa faamaoni.

 7 Na ia faia malamalama tetele,+

Auā e tumau e faavavau lona alofa faamaoni,

 8 O le lā e pule i le ao,+

Auā e tumau e faavavau lona alofa faamaoni,

 9 O le masina ma fetu e pule i le pō,+

Auā e tumau e faavavau lona alofa faamaoni.

10 Na ia fasia ulumatua a Aikupito,+

Auā e tumau e faavavau lona alofa faamaoni.

11 Na ia aumaia Isaraelu mai i Aikupito,+

Auā e tumau e faavavau lona alofa faamaoni,

12 E ala i le aao malosi+ ma le aao faaloaloa,

Auā e tumau e faavavau lona alofa faamaoni.

13 Na ia vaeluaina* le Sami Ulaula,+

Auā e tumau e faavavau lona alofa faamaoni.

14 Na ia faaui ane ai Isaraelu i totonu,+

Auā e tumau e faavavau lona alofa faamaoni.

15 Na ia lafoina Farao ma lana ʻautau i totonu o le Sami Ulaula,+

Auā e tumau e faavavau lona alofa faamaoni.

16 Na ia ta‘ita‘ia lona nuu i le toafa,+

Auā e tumau e faavavau lona alofa faamaoni.

17 Na ia fasia tupu sili,+

Auā e tumau e faavavau lona alofa faamaoni.

18 Na ia fasiotia tupu malolosi,

Auā e tumau e faavavau lona alofa faamaoni,

19 O Sekono+ le tupu o tagata Amorī,

Auā e tumau e faavavau lona alofa faamaoni,

20 Ma Oko+ le tupu o Vasana,

Auā e tumau e faavavau lona alofa faamaoni.

21 Na ia aumai lo latou laueleele e fai ma tofi,+

Auā e tumau e faavavau lona alofa faamaoni,

22 O le tofi lea o Isaraelu lana auauna,

Auā e tumau e faavavau lona alofa faamaoni.

23 Na ia manatuaina i tatou ina ua faamaulaloina i tatou,+

Auā e tumau e faavavau lona alofa faamaoni.+

24 Na ia lavea‘ia pea i tatou mai i o tatou fili,+

Auā e tumau e faavavau lona alofa faamaoni.

25 E na te foaʻiina atu meaʻai i meaola uma,+

Auā e tumau e faavavau lona alofa faamaoni.

26 Ia faafetai atu i le Atua o le lagi,

Auā e tumau e faavavau lona alofa faamaoni.