O le Tusi Lona Lua o Tupu
2 Ina ua finagalo Ieova e ave aʻe Elia+ i se asiosio i le lagi,+ ona tuua lea e Elia ma Elisaia+ o Kilikala.+ 2 Ua fai atu Elia iā Elisaia: “Inā nofo ia i inei, auā ua auina aʻu e Ieova e alu atu i Peteli.” Ae ua fai mai Elisaia: “Ou te tautō iā Ieova le Atua soifua faapea ma oe, ou te lē tuua lava oe.” Ona la ō ifo lea i Peteli.+ 3 Ua ō mai iā Elisaia atalii o le ʻauperofeta* na i Peteli, ua faapea mai iā te ia: “Po ua e iloa ea o le asō e aveese ai e Ieova lou matai mai i le avea ma ou taʻitaʻi?”+ Ona ia fai atu lea: “O lea ua ou iloa. Ae aua le pisa.”
4 Ona fai atu lea o Elia iā te ia: “Elisaia e, faamolemole nofo atu ia i inei, auā ua auina atu aʻu e Ieova i Ieriko.”+ Ae ua fai mai o ia: “Ou te tautō iā Ieova le Atua soifua faapea ma oe, ou te lē tuua lava oe.” Ona la ō ai lea i Ieriko. 5 Ona faalatalata mai lea iā Elisaia o atalii o le ʻauperofeta na i Ieriko, ua faapea mai iā te ia: “Po ua e iloa ea o le asō e aveese ai e Ieova lou matai mai i le avea ma ou taʻitaʻi?” Ona ia fai atu lea: “O lea ua ou iloa. Ae aua le pisa.”
6 Ona fai atu lea o Elia iā te ia: “Seʻi e nofo atu ia i inei, auā ua auina atu aʻu e Ieova i Ioritana.” Ae ua fai mai o ia: “Ou te tautō iā Ieova le Atua soifua faapea ma oe, ou te lē tuua lava oe.” Ona la ō ai lea. 7 Na ō fo‘i tagata e toʻa 50, o atalii ia o le ʻauperofeta, ua tutū ma vaavaai mamao atu a o la tutū i tafatafa o le vaitafe o Ioritana. 8 Ona tago lea o Elia i lona ofu tele,+ ua taata‘ai ma tā ai le vai, ona vaeluaina ai lea ma ua la savavali i le ilitivai mātūtū.+
9 Ina ua la oo atu i le isi itu, ona fai atu lea o Elia iā Elisaia: “Ia e fai mai iā te aʻu i se mea ou te faia mo oe, a o leʻi aveeseina aʻu mai iā te oe.” Ona faapea mai lea o Elisaia: “Faamolemole, ia faaluaina+ mai lou agaga+ iā te aʻu.” 10 Ona ia fai atu lea: “Ua e talosaga mai i se mea faigatā. Afai e te iloa mai aʻu pe a aveeseina a‘u mai iā te oe, ona faapea lea ona faia iā te oe; ae afai e leai, ona lē faia lea faapea.”
11 A o savavali i laʻua ma talatalanoa, ae ua faafuase‘i ona iai se kariota afi ma solofanua afi,+ ua tuueseese ai i laʻua; ona alu aʻe ai lea o Elia i se asiosio i le lagi.+ 12 A o vaavaai atu Elisaia, ua alaga atu o ia: “Loʻu tamā e, loʻu tamā e, o le kariota tau a Isaraelu ma ona tagata tiʻetiʻe solofanua!”+ Ina ua lē toe iloa atu o ia e Elisaia, ona tago lea o Elisaia i ona ofu ma saeluaina.+ 13 Ua mavae lenā, ona ia tago lea i le ofu tele+ o Elia na paʻū ese mai iā te ia, ua toe foʻi ma tū i tafatafa o le auvai o Ioritana. 14 Ona ia ave lea o le ofu tele o Elia na paʻū ese mai iā te ia ma tā ai le vai, ua faapea ane: “O fea o iai Ieova le Atua o Elia?” Ina ua tā e Elisaia le vai, ona vaeluaina ai lea ma ua alu atu o ia i le isi itu vai.+
15 Ina ua iloa mamao atu o ia e atalii o le ʻauperofeta o ē sa iai i Ieriko, ona latou faapea ane lea: “Ua i luga o Elisaia le agaga o Elia.”+ Ona latou ō atu lea e faafetaiaʻi o ia, ma ua latou ifo toʻele iā te ia. 16 Ua latou fai mai iā te ia: “O loo faatasi ma au auauna o tagata totoa e toʻa 50. Faamolemole, ia tuu atu i latou e ō e saʻili lou matai. Atonu na siitia aʻe o ia e le agaga o Ieova, ma lafo i luga o se mauga po o se vanu.”+ Ae ua fai atu o ia: “Aua ne‘i aauina atu i latou.” 17 Peita‘i, ua latou tauanau pea o ia seʻia oo ina mā o ia, ona ia fai atu lea: “Inā aauina atu ia.” Ona latou aauina atu lea o tagata e toʻa 50, ua latou saʻili pea mo aso e tolu ae e leʻi maua o ia. 18 Ina ua latou toe foʻi mai iā te ia, o loo nofo o ia i Ieriko.+ Ona ia fai atu lea iā i latou: “Po ou te leʻi fai atu ea e aua tou te ō?”
19 Mulimuli ane, ua fai mai tagata o le aai iā Elisaia: “Vaai! o lea ua lelei le tulaga o le aai,+ e pei lava ona vaai atu i ai lo matou matai; ae e leaga le vai, ma ua lē fua mai* le laueleele.” 20 Ona ia fai atu lea: “Inā aumai ia iā te aʻu se tamaʻi ipu fou, ma tuu i ai se masima i totonu.” Ona latou aumaia lea iā te ia. 21 Ona alu lea o ia i le mata o le vai ma lafo i ai le masima,+ ma faapea atu: “O le mea lenei ua fetalai mai ai Ieova, ‘Ou te faamamāina lenei vai. E lē toe oti ai se isi, ma e lē toe māfua ai ona lē fananau* fafine.’” 22 Ua mamā foʻi le vai seʻia oo mai i le aso nei, e tusa ai ma le upu na fai atu ai Elisaia.
23 Ua alu aʻe o ia mai i inā e agaʻi atu i Peteli. A o alu aʻe o ia i lona ala, na ō mai ai ni tamaiti mai i le aai ma ula iā te ia,+ ua latou fai mai pea iā te ia: “Le ulu tula e, alu aʻe ia! Le ulu tula e, alu aʻe ia!” 24 Ona faliu lea o ia i tua ma vaai atu iā i latou, ma ua ia fetuuina i latou i le suafa o Ieova. Ona ō mai lea o pea fafine+ e lua mai i le vaomatua, ua saeia tamaiti e toʻa 42 mai i nei tamaiti.+ 25 Ua alu atu pea o ia mai i inā e agaʻi atu i le mauga o Karamelu,+ ona toe foʻi atu lea mai i inā i Samaria.