O le Tusi Lona Lua o Nofoaiga a Tupu

31 Ina ua latou faamāeʻaina nei mea uma, ona ō atu ai lea o Isaraelu uma sa iai i inā i aai o Iuta, ma ua latou tu‘ininii poutū paia,+ talepe i lalo pou paia,*+ ma talepe i lalo mea maualuluga+ ma fata faitaulaga+ i Iuta uma ma Peniamina, faapea Efaraima ma Manase,+ seʻia oo ina latou faatamaʻia atoatoa na mea. Ona toe foʻi atu lea o le fanauga uma a Isaraelu i o latou aai, e taʻitoʻatasi i lona lava tofi.

2 Ona faamaopoopo lea e Esekia o ositaulaga ma le ʻau sa Levī i o latou vaega,+ ina ia mafai ona latou faatinoina o latou tofiga i le auaunaga.+ Na latou ofoina atu taulaga mū ma taulaga faifaatasi; na latou auauna ma avatu le faafetai, ma vivii atu a o iai i totonu o faitotoʻa o lotoā* a Ieova.+ 3 Na avatu se vaega o oloa a le tupu lava ia mo taulaga mū,+ e aofia ai taulaga mū o le taeao ma le afiafi,+ faapea taulaga mū mo Sapati,+ o masina faatoʻā vaaia,+ ma tausamiga,+ e tusa ai ma mea ua tusia i le Tulafono a Ieova.

4 Ua ia faatonuina foʻi le nuu na nonofo i Ierusalema, ina ia aumai mea e tatau mo ositaulaga ma le ʻau sa Levī,+ ina ia latou pipiimau atu ai pea* i le tulafono a Ieova. 5 O le taimi lava na avatu ai le faatonuga, na aumaia ai loa e le fanauga a Isaraelu le matuā tele o uluaʻi fua o saito, o uaina fou, o suāuu,+ o meli, ma fua uma o le laueleele;+ ua latou aumaia le sefuluaʻi o mea uma, ua matuā tele lava.+ 6 Na aumaia foʻi e le fanauga a Isaraelu ma Iuta o ē o loo nonofo i aai o Iuta, le sefuluaʻi o povi, o mamoe, ma le sefuluaʻi o mea paia+ ua faapaiaina mo Ieova lo latou Atua. Ua latou aumaia nei mea ma tuu i faaputuga e tele. 7 O le masina lona tolu+ na amata ai ona tuu a latou foa‘i i faaputuga, ma na māeʻa i le masina lona fitu.+ 8 Ina ua ō mai Esekia ma perenise ma vāai i faaputuga, ona latou vivii atu lea iā Ieova ma faamanuia i lona nuu o Isaraelu.

9 Ua fesili atu Esekia i ositaulaga ma le ‘au sa Levī e faatatau i faaputuga, 10 ma ua faapea mai iā te ia Asaraia le ositaulaga sili mai i le aiga o Satoka: “E mai i le taimi na amata ai ona latou aumaia foaʻi tauofo i le fale o Ieova,+ ua aai le nuu, ua maoona, ma ua tele foʻi mea ua totoe, auā ua faamanuia Ieova i lona nuu, ma ua totoe nei mea e tele.”+

11 Ona fai atu lea o Esekia iā i latou ina ia sauniuni potu teuoloa*+ i le fale o Ieova, ona latou saunia ai lea. 12 Ua latou aumaia pea ma le faamaoni foaʻi tauofo, o sefuluaʻi,+ ma mea paia; ua tofia foʻi Konania le sa Levī e avea ma pule e vaavaaia nei mea, ma na pito atu iā te ia lona uso o Semi. 13 O Ikielu, o Asesau, o Nakata, o Asaelu, o Ierimota, o Ieosapa, o Elielu, o Isemakia, o Makata, ma Penaia, o i latou o taʻimua e fesoasoani iā Konania ma lona uso o Semi, e tusa ai ma le faatonuga a le tupu o Esekia; a o Asaraia na vaavaaia le fale o le Atua moni. 14 A o Kori le atalii o Iemina, o le sa Levī na leoleoina le faitotoʻa i le itu i sasaʻe,+ na ia vaavaaia taulaga tauofo+ a le Atua moni, ma tufatufa atu mea e sili ona paia+ ma foaʻi na faia iā Ieova.+ 15 Na ia vaavaaia foʻi Etena, o Meneamina, o Iesua, o Semaia, o Amaria, ma Sekania, o ē na i aai o ositaulaga+ i o latou tofiga maufaatuatuaina, ina ia tufatufaina atu ma le tutusa mea i o latou uso o loo i vaega,+ o ē e sili ma ē iti. 16 E lē gata i lea, na latou tufatufaina atu nei mea i ē o loo tusia i le tusi o gafa, o tane ia na ō mai i aso taʻitasi e auauna i le fale o Ieova ma faia tiute o o latou vaega, faapea o latou atalii e amata mai i le tolu tausaga ma matutua atu.

17 O ositaulaga ma le ʻau sa Levī e 20 tausaga ma matutua atu,+ na lesitalaina i le tusi o gafa e tusa ai ma aiga o o latou tamā,+ ma e tusa ai ma tiute o a latou vaega.+ 18 Na aofia i le tusi o gafa a latou fanau, o a latou avā, ma tagata uma o o latou aiga. (Na latou faamautinoa e mamā i latou, talu ai na tofia i latou e faatino galuega paia.) 19 Na aofia foʻi i le tusi o gafa le fanauga a Arona, o ositaulaga ia na nonofo i fanua e aai ai lafumanu o loo siʻomia ai o latou aai.+ I na aai uma, na tofia ai ni tane e tufatufaina atu meaʻai i ositaulaga ma ē uma o loo tusia i le tusi o gafa o le ʻau sa Levī.

20 O mea ia na faia e Esekia i Iuta uma, ma ua ia faia pea le mea ua lelei, ua tonu, ma faamaoni i luma o Ieova lona Atua. 21 O galuega uma foʻi na ia faia ina ia saʻili ai i lona Atua, e tusa pe e fesoota‘i atu i le auaunaga i le fale o le Atua moni,+ po o le Tulafono ma le poloaʻiga, na ia faia lava ma lona lotoatoa ma na taulau manuia ai o ia.