O le Tusi Lona Lua o Nofoaiga a Tupu

28 E 20 tausaga o Aasa+ ina ua fai o ia ma tupu, ma e 16 tausaga na ia pule ai mai i Ierusalema. E na te leʻi faia le mea ua tonu i le silafaga a Ieova, e pei ona sa faia e Tavita lona augātamā.+ 2 Nai lo o lea, na savali o ia i ala o tupu o Isaraelu,+ ma na ia faia foʻi tupua uʻamea+ o Paala. 3 Na ia faamū foʻi taulaga i le vanu o Hinoma,* ma susunu ona atalii i le afi,+ e tusa ai ma mea inosia na faia e nuu ese+ na tuliesea e Ieova mai i luma o le fanauga a Isaraelu. 4 Na ia faia pea taulaga ma faamū taulaga i mea maualuluga,+ ma luga o aʻega, ma lalo ifo o laau lauolaola uma.+

5 Ona tuuina atu lea o ia e Ieova lona Atua i lima o le tupu o Suria,+ ma ua latou faato‘ilalo o ia ma ave faapagota le toʻatele o tagata ma avatu i Tamaseko.+ Na tuuina atu fo‘i o ia e le Atua i lima o le tupu o Isaraelu, ma ua fasia foʻi o ia ma ona tagata e le tupu o Isaraelu i le fasi tele. 6 Auā na fasiotia e Peka+ le atalii o Remalia, o tagata totoa e toʻa 120,000 i Iuta i le aso e tasi, ona ua latou tuua Ieova le Atua o o latou augātamā.+ 7 Ua fasiotia foʻi e Sekari le tagata toa mai i Efaraima, o Maaseia le atalii o le tupu, o Aserikama o lē na vaavaaia le aiga, ma Elekana o lē na pito atu i le tupu. 8 Ua ave faapagota foʻi e le fanauga a Isaraelu o latou uso e toʻa 200,000, o fafine, o atalii, ma afafine; ma ua latou faoa mai iā i latou le tele o le vete, ma avatu i Samaria.+

9 Sa iai i inā se perofeta a Ieova, o lona igoa o Oteta. Ua alu atu o ia i luma o le ʻautau lea ua ō mai i Samaria, ma faapea atu iā i latou: “Faauta! Talu ai ua toʻasā Ieova le Atua o o outou augātamā iā Iuta, ua ia tuuina mai ai i latou i o outou lima,+ ma ua outou fasiotia i latou i lo outou ita tele, ma ua silafia mai fo‘i e le Atua. 10 O lenei, ua outou manatu e fai le fanauga a Iuta ma Ierusalema ma a outou auauna tane ma auauna fafine.+ Peitaʻi, pe tou te lē o nofosala ea foʻi iā Ieova lo outou Atua? 11 O lenei, ia outou faalogo mai iā te aʻu ma ia toe faafoʻi atu ē ua outou aumaia faapagota mai i o outou uso, auā ua matuā toʻasā Ieova iā te outou.”

12 Ona ō mai lea o nisi o alii sili o le fanauga a Efaraima, o Asaraia le atalii o Iokana, o Perekia le atalii o Meselemota, o Iesekia le atalii o Saluma, ma Amase le atalii o Atalai, ma tetee atu iā i latou na ō mai mai i le taua, 13 ua latou faapea atu: “Aua neʻi outou aumaia i inei tagata na outou aumaia faapagota, auā o le a tatou nofosala ai iā Ieova. O le mea ua outou manatu e fai, o le a faaopoopo ai i a tatou agasala ma lo tatou nofosala, auā ua matuā nofosala i tatou, ua matuā toʻasā foʻi le Atua iā Isaraelu.” 14 Ona tuu atu lea e fitafita ua faaauupegaina o pagota ma mea na faoa,+ i perenise ma le faapotopotoga uma. 15 Ona tutulaʻi lea o tagata na tofia ma latou ave pagota, ma avatu i ē ua lē lavalavā ni ofu mai i le vete. Ua latou faaofu iā i latou ma avatu i ai seevae, o meaʻai, o vai ma suāuu e uu ai o latou tino. O so o se tasi foʻi na vaivai ua latou faatiʻetiʻe i asini, ma avatu i latou i o latou uso i Ieriko, o le aai o laau pama. Ona latou toe foʻi atu lea i Samaria.

16 O le taimi lenā, na talosaga atu ai le tupu o Aasa i tupu o Asuria mo se fesoasoani.+ 17 Ona toe ō mai foʻi lea o tagata Etoma, ua latou osofaʻia Iuta ma ave faapagota i latou. 18 Ua osofaʻia foʻi e Filisitia+ aai o Sefila*+ ma Nekepi* i Iuta, ma ua latou faoa ai Pete-semesa,+ o Ailona,+ o Kiterota, o Suka ma ona tamaʻi aai, o Timenata+ ma ona tamaʻi aai, ma Kimeso ma ona tamaʻi aai; ona latou nonofo ai lea i inā. 19 Ae ua faamaulalo e Ieova Iuta ona o Aasa le tupu o Isaraelu, auā ua ia faataga amioga leaga e faia i Iuta, ma ua iʻu ai i le matuā lē faamaoni iā Ieova.

20 Mulimuli ane, ona siitaua mai lea iā te ia o Tilika-pilesa+ le tupu o Asuria, ua faatigā+ iā te ia nai lo o le fesoasoani iā te ia. 21 Auā ua ave e Aasa mea mai i le fale o Ieova, o le fale o le tupu,+ ma fale o perenise, ua ia faia ai le meaalofa mo le tupu o Asuria; ae e leʻi fesoasoani lea gaoioiga iā te ia. 22 I taimi foʻi na mafatia ai le tupu o Aasa, na atili ai ona ia gaoioi ma le lē faamaoni iā Ieova. 23 Ua ia fai taulaga i atua o Tamaseko+ ia na faatoʻilaloina o ia,+ ma ua ia faapea ane: “Talu ai o loo fesoasoani atua o tupu o Suria iā i latou, o lea la, o le a ou fai taulaga iā i latou ina ia latou fesoasoani mai ai iā te aʻu.”+ Ae ua avea atua o Tamaseko ma mea e malaia ai o ia faapea ma Isaraelu uma. 24 Ua aoaoina foʻi e Aasa o ipu o le fale o le Atua moni, ma ta‘ei ipu o le fale o le Atua moni,+ ua ia tapunia foʻi faitotoʻa o le fale o Ieova,+ ma faia mo ia lava o fata faitaulaga i itu uma o Ierusalema. 25 Ua ia faia foʻi i aai uma o Iuta, o mea maualuluga e faamū ai taulaga i isi atua,+ ma ua ia faatigā ai iā Ieova le Atua o ona augātamā.

26 A o lona olaga uma, o mea uma na ia faia mai i le amataga seʻia oo i le faaiʻuga, ua tusia ia i le Tusi o Tupu o Iuta ma Isaraelu.+ 27 Ona taoto lea o Aasa faatasi ma ona augātamā, ma ua latou tanu o ia i le aai i Ierusalema, ae latou te leʻi aumaia o ia i fanuatanu o tupu o Isaraelu.+ Ona avea lea o Esekia lona atalii ma tupu e sui iā te ia.