O le Tusi Muamua o Nofoaiga a Tupu

18 Mulimuli ane, ua tau Tavita ma Filisitia ma ua ia faatoʻilaloina i latou, ona faoa lea e Tavita o Kata+ ma ona tamaʻi aai mai i lima o Filisitia.+ 2 Ua ia faato‘ilaloina Moapi,+ ma ua avea foʻi tagata Moapi ma auauna a Tavita, ma ua latou aumaia meaalofa+ iā te ia.

3 Ua faatoʻilaloina foʻi e Tavita o Atatesa+ le tupu o Sopa,+ e lata i Amato,+ a o alu atu Atatesa e faatū lana pule i vaipanoa o le vaitafe o Eufirate.+ 4 Ua puʻea e Tavita mai iā te ia o kariota e 1,000, o tagata tiʻetiʻe solofanua e toʻa 7,000, ma fitafita e savavali e toʻa 20,000;+ ua faapipili foʻi e Tavita solofanua e tosoina kariota,+ ae ua ia faatotoe na o le 100. 5 Ina ua ō mai Suria o Tamaseko e fesoasoani iā Atatesa le tupu o Sopa, ona fasia lea e Tavita o tagata Suria e toʻa 22,000.+ 6 Ona tuu lea e Tavita o leoleoga i Suria o Tamaseko; na avea foʻi tagata Suria ma auauna a Tavita ma na latou aumaia meaalofa iā te ia. Na foaʻi atu e Ieova le manumalo* iā Tavita i mea uma na ia fealuaʻi ai.+ 7 Ua ave foʻi e Tavita o talita auro lapotopoto sa iai i auauna a Atatesa, ma aumai i Ierusalema. 8 Ua ave foʻi e Tavita o ʻapamemea e matuā tele lava, mai i Tipeata ma Kuna, o aai o Atatesa. O na mea, na faia ai e Solomona le faatanoa vai ʻapamemea telē,+ o poutū, ma ipu ʻapamemea.+

9 Ina ua faalogo Tou le tupu o Amato, ua faatoʻilaloina e Tavita le ʻautau uma a Atatesa+ le tupu o Sopa,+ 10 ona ia auina mai loa lea o lona atalii o Aturamo i le tupu o Tavita e fesili mai po o ā mai o ia, ma faamālō mai iā te ia ona o lona tau faasaga iā Atatesa, ma faatoʻilaloina o ia (auā na masani ona tau Atatesa faasaga iā Tou); sa ia aumaia fo‘i mea eseese uma e faia i auro, o siliva, ma ʻapamemea. 11 Na faapaiaina e le tupu o Tavita nei mea iā Ieova,+ faatasi ai ma siliva ma auro na ia aumaia mai i nuu uma: e mai i Etoma ma Moapi, ma e mai i tagata Amonī,+ o tagata Filisitia,+ ma tagata Amaleka.+

12 A o Apisai+ le tama a Seruia,+ na ia fasia tagata Etoma e toʻa 18,000 i le vanu o Masima.+ 13 Na ia tuu leoleoga i Etoma, ma ua avea foʻi tagata uma o Etoma ma auauna a Tavita.+ Na foaʻi atu e Ieova le manumalo* iā Tavita i mea uma na ia fealuaʻi ai.+ 14 Na faaauau ona fai Tavita ma tupu i Isaraelu uma;+ ma na ia faia pea le faamasinogatonu ma le amiotonu mo lona nuu uma.+ 15 Na pule Ioapo le tama a Seruia i le ʻautau,+ o Iosefatu+ le atalii o Ailuta na faia faamaumauga, 16 o Satoka le atalii o Akitopo ma Aimeleka le atalii o Aviata na avea ma ositaulaga, ae na avea Savesa ma failautusi. 17 Na pule foʻi Penaia le atalii o Ioiata i tagata Kereti+ ma tagata Peleti.+ Ae o atalii o Tavita na avea ma alii autū e sosoo atu i le tupu.