Faamasino

9 Ona alu atu lea o Apimeleko+ le atalii o Ierupaala i tuagane o lona tinā i Sekema, ma faapea atu iā i latou ma le aiga uma o le tamā o lona tinā: 2 “Faamolemole ia outou fesili atu i taʻitaʻi* uma o Sekema, ‘O fea e sili iā te outou, o le pule iā te outou o atalii uma e toʻa 70 o Ierupaala,+ po o le pule iā te outou o se tagata e toʻatasi? Ia outou manatua foʻi, o aʻu nei o o outou ivi ma aano.’”

3 Ona fai atu lea o tuagane o lona tinā o nei upu uma e faatatau iā te ia, a o faalogologo ta‘ita‘i uma o Sekema, ma ua uaʻi atu o latou loto e mulimuli iā Apimeleko, auā ua latou faapea ane: “O lo tatou uso lava ia.” 4 Ona latou avatu lea iā te ia o tupe siliva e 70 mai i le fale* o Paala-perita,+ ua totogi ai e Apimeleko tagata e leai ni mea o faia ma fiasisili, ina ia latou ō ma ia. 5 Mulimuli ane, ona alu atu lea o ia i le aiga o lona tamā i Ofira,+ ma fasiotia ai ona uso+ i luga o le maa e tasi, o atalii o Ierupaala, e toʻa 70 tane. Ae na totoe ai na o Iotama le atalii aupito i itiiti o Ierupaala, auā na lafi o ia.

6 Ona faapotopoto faatasi lea o ta‘ita‘i uma o Sekema ma Petemilo atoa, ma latou tofia Apimeleko e avea ma tupu+ e lata ane i le laau telē, i le poutū lea sa i Sekema.

7 Ina ua latou taʻu atu lenei tala iā Iotama, ona ia alu aʻe loa lea ma tū i le tumutumu o le mauga o Keresema,+ ma alaga leotele atu iā i latou: “Inā faalogologo mai ia iā te aʻu, outou o ta‘ita‘i o Sekema, ona faafofoga mai lea o le Atua iā te outou.

8 “Na ō atu ni laau e faauu se tupu e pule iā i latou. Ua latou fai atu i le laau o le olive, ‘Ia e pule iā i matou.’+ 9 Ae ua fai mai le laau o le olive iā i latou, ‘Po ou te tuua ea loʻu suāuu* lea e latou te faamamaluina ai le Atua ma tagata, ina ia ou falala atu ai i luga o isi laau?’ 10 Ona fai atu lea o laau i le mati, ‘Sau ia e pule iā i matou.’ 11 Ae ua fai mai le mati iā i latou, ‘Po ou te tuua ea loʻu suamalie ma oʻu fua lelei, ina ia ou falala atu ai i luga o isi laau?’ 12 Ona fai atu lea o laau i le vine, ‘Sau ia e pule iā i matou.’ 13 Ona tali mai lea o le vine iā i latou, ‘Po ou te tuua ea loʻu uaina fou e faafiafia ai le Atua ma tagata, ina ia ou falala atu ai i luga o isi laau?’ 14 Mulimuli ane, ona fai atu lea o isi laau uma i le laau tuitui, ‘Sau ia e pule iā i matou.’+ 15 Ua fai atu le laau tuitui i laau, ‘Afai e moni ua outou faauuina aʻu e fai ma tupu iā te outou, inā ō mai ia e faamalumalu i lalo o loʻu paolo. Ae afai e leai, ia alu atu le afi mai i le laau tuitui ma faaumatia ai arasi o Lepanona.’

16 “A o lenei, po ua outou gaoioi ea ma le faamaoni ma le tonu i le filifilia o Apimeleko e fai ma tupu,+ po ua outou agalelei ea iā Ierupaala ma lona aiga, ma po ua outou faia iā te ia e tusa ma mea na ia faia? 17 Ina ua tau loʻu tamā mo outou,+ na lamatia lona ola ina ia laveaʻi ai outou mai i lima o Mitiana.+ 18 A o le asō, ua outou faasagatau i le aiga o loʻu tamā, ina ua outou fasiotia ona atalii, o tane e toʻa 70 i luga o le maa e tasi.+ Ona outou faia lea o Apimeleko le tama a lana teine pologa+ ma tupu o ta‘ita‘i o Sekema, auā o ia o lo outou uso. 19 Ioe, afai e faamaoni ma ua tonu la outou gaoioiga ua faia iā Ierupaala ma lona aiga i le asō, ia olioli la iā Apimeleko, ma ia olioli foʻi o ia iā te outou. 20 Ae afai e leai, ia alu aʻe le afi mai iā Apimeleko ma faaumatia ai ta‘ita‘i o Sekema ma Petemilo,+ ia alu aʻe foʻi le afi mai i ta‘ita‘i o Sekema ma Petemilo ma faaumatia ai Apimeleko.”+

21 Ona sola lea o Iotama+ ma alu atu i Pere, ua nofo ai i inā ona o Apimeleko lona uso.

22 Na pule* Apimeleko iā Isaraelu mo le tolu tausaga. 23 Ona faatupu lea e le Atua o le feitaga‘i* i le vā o Apimeleko ma ta‘ita‘i o Sekema, ua latou faaʻoleʻole foʻi iā Apimeleko. 24 O lenei mea na taui ai faiga sauā na faia i atalii e toʻa 70 o Ierupaala. Na toe taui ai Apimeleko ma ta‘ita‘i o Sekema mo le toto o uso o Apimeleko. Na fasiotia i latou+ e Apimeleko ma na fesoasoani ta‘ita‘i o Sekema iā te ia. 25 Ua tuu foʻi e ta‘ita‘i o Sekema ni tane e lamalama iā te ia i tumutumu o mauga, ma ua latou faoa mea mai i so o se tasi e ui ane i le auala. Mulimuli ane, ua taʻu atu lenei mea iā Apimeleko.

26 Ua ō mai Kaala le atalii o Epete ma ona uso ua ui atu i Sekema,+ ona faatuatua ai lea o ta‘ita‘i o Sekema iā te ia. 27 Ua latou ō atu i le fanua, ma tau mai vine i o latou togāvine ma soli ai, ma faia se tausamiga. Ona latou ō atu lea i le fale o lo latou atua,+ ua aai ma feinu, ma fetuu iā Apimeleko. 28 Ona faapea atu lea o Kaala le atalii o Epete: “O ai ea Apimeleko, ma o ai foʻi Sekema e tatou te auauna ai iā te ia? Pe e lē o ia ea o le atalii o Ierupaala,+ ma e na te leʻi tofia ea foʻi Sepula e pule? Ia outou auauna i tagata Hamoro, le tamā o Sekema! Ae aiseā e tatou te auauna ai iā Apimeleko? 29 Pe ana mulimuli mai nei tagata iā te aʻu, semanū ua ou aveesea Apimeleko.” Ua ia fai atu foʻi iā Apimeleko: “Inā faato‘atele ia lau ʻautau ma sau e ta te tau.”

30 Ina ua faalogo Sepula le perenise o le aai i upu a Kaala le atalii o Epete, ona matuā ita ai lea o ia. 31 Ua ia aauina atu faalilolilo* avefeʻau iā Apimeleko, ua faapea atu: “Faauta! Ua ō mai Kaala le atalii o Epete ma ona uso i Sekema, ma ua latou faaoso le aai e tetee atu iā te oe. 32 O lea, inā ō aʻe ia i le pō, o oe ma tagata ua iā te oe, ma lalafi i le fanua. 33 Pe a oso aʻe le lā i le taeao, ia e alapō ma osofa‘i le aai; pe a faasagatau mai o ia ma ona tagata iā te oe, ia e faia so o se mea e faato‘ilalo ai o ia.”*

34 Ona ō a‘e lea i le pō o Apimeleko ma tagata uma o iā te ia, ua lalafi ma faatalitali e osofa‘i Sekema i ʻautau e fā. 35 Ina ua alu atu Kaala le atalii o Epete ma tū i le faitotoʻa o le aai, ona tutū mai lea o Apimeleko ma tagata ua iā te ia mai i le mea na lalafi ai. 36 Ina ua vaai atu Kaala i tagata, ona ia fai atu lea iā Sepula: “Faauta! O tagata la e ō ifo mai i tumutumu o mauga.” Ae ua fai mai Sepula iā te ia: “O ataata o mauga e pei o ni tagata la e te vaai atu i ai.”

37 Ona toe fai atu lea o Kaala: “Faauta! O tagata la e ō ifo mai i le ogatotonu o le nuu, ma o loo ui mai le tasi ʻautau i tafatafa o le laau telē o Meoneni.” 38 Ua tali mai Sepula iā te ia: “O fea au upu na e mimita mai ai, ‘O ai ea Apimeleko e matou te auauna ai iā te ia?’+ Pe e lē o tagata ea ia na e teena? Inā alu atu ia ma tau ma i latou.”

39 Ona alu atu lea o Kaala, ua muamua atu i ta‘ita‘i o Sekema, ma ua tau ma Apimeleko. 40 Ua tuliloa o ia e Apimeleko, ma ua sola Kaala mai iā te ia; ua paʻuʻū foʻi le toʻatele o tagata ua fasia, e oo lava i luma o le faitotoʻa o le aai.

41 Ua nofo pea Apimeleko i Aruma, ma ua tuliesea e Sepula+ o Kaala ma ona uso mai i Sekema. 42 I le aso na sosoo ai, ona ō atu ai lea o tagata i le fanua, ma ua taʻu atu iā Apimeleko. 43 Ona ia ave lea o tagata ma vaevaeina i latou i ʻautau e tolu, ma lalafi e faatalitali i le fanua. Ina ua vaai atu o ia o loo ō mai tagata mai i le aai, ona ia osofa‘i lea ma fasiotia i latou. 44 Ua osofa‘i atu Apimeleko ma ʻautau sa iā te ia, ina ia latou tutū ai i le faitotoʻa o le aai, a o isi ʻautau e lua ua osofa‘i atu i ē uma sa i le fanua, ma latou fasiotia i latou. 45 Na tau Apimeleko ma tagata o le aai i lenā aso atoa, ma faatoʻilalo i le aai. Na ia fasiotia foʻi tagata na iai, ua ia lepeti i lalo le aai+ ma lūlū i ai le masima.

46 Ina ua faalogo i ai ta‘ita‘i uma o le ʻolo o Sekema, ona ō atu loa lea i le potu e lalafi ai* i le fale* o Eli-perita.+ 47 Ina ua taʻu atu iā Apimeleko ua faapotopoto faatasi ta‘ita‘i uma o le ʻolo o Sekema, 48 ona ō a‘e lea o Apimeleko ma tagata uma sa iā te ia i le mauga o Salemone. Ona tago lea o Apimeleko i le to‘i, ua tā i lalo se lālā laau, ma sii aʻe i luga i ona tauʻau, ma faapea atu i tagata na iā te ia: “O le mea na tou vāai mai o oʻu faia, ia vave ona outou faia faapea!” 49 Ona tā lea i lalo e tagata uma o lālā, ma mulimuli atu iā Apimeleko. Ua latou tuuina lālā e faataamilo i le potu o loo lalafi ai, ona susunu ai lea i le afi, ma ua feoti ai foʻi tagata uma o le ʻolo o Sekema, e tusa ma le toʻa 1,000 o tane ma fafine.

50 Ua alu Apimeleko i Tipesa; ua ia tolauapi e siitaua iā Tipesa ma ua ia faatoʻilalo i ai. 51 Sa iai se ʻolo malosi i le ogatotonu o le aai, o i inā na sosola i ai tane ma fafine uma ma ta‘ita‘i uma o le aai, ona latou tapuni lea o le ʻolo ma feʻaʻei i le tumutumu. 52 Ua alu aʻe Apimeleko i le ʻolo ina ia osofa‘i. Ua ia faalatalata atu i le faitotoʻa o le ʻolo ina ia susunu i le afi. 53 Ona lafo ifo lea e se tasi o fafine se maa e olo ai saito i le ulu o Apimeleko, ma ta‘e ai lona atigipoo.+ 54 Ona ia vave valaau atu lea i le auauna o loo aveina ana auupega, ma faapea atu: “Seʻi lau pelu ma fasioti ai iā te aʻu, ina neʻi o latou faapea ane e uiga iā te aʻu, ‘Na fasiotia o ia e se fafine.’” Ona tutu‘i lea o ia e lana auauna i le pelu, ma ua oti ai.

55 Ina ua vāai tagata Isaraelu ua oti Apimeleko, ona toe fo‘i lea o i latou uma i o latou aiga. 56 Ua taui atu e le Atua le leaga na faia e Apimeleko i lona tamā, i le fasiotia o ona uso e toʻa 70.+ 57 Ua toe taui atu foʻi e le Atua i tagata Sekema mea leaga uma i o latou lava ulu. O lea, ua oo ai iā i latou le fetuu a Iotama+ le atalii o Ierupaala.+