O le Tusi Lona Lua i le Faapotopotoga i Korinito

6 I le galulue faatasi ma ia,+ ua matou ʻaiʻoi atu ai foʻi iā te outou e aua neʻi talia le agalelei faifua o le Atua, ma misia ai lona fuafuaga.+ 2 Auā ua ia faapea mai: “I le taimi e talileleia ai, na ou faalogo ai iā te oe, ma i le aso o le faaolataga, na ou fesoasoani ai iā te oe.”+ Faauta! O le taimi tonu lenei e talileleia ai. Faauta! O le aso lenei o le faaolataga.

3 Ua matou lē faia se mea e tausuai ai isi, ina ia aua neʻi taʻuleagaina la matou faiva;+ 4 ae ua matou faailoa atu i matou o ni auauna a le Atua i mea uma lava,+ e ala i le tumau i le tele o mea, i puapuaga, i le leai o ni mea, i faigatā,+ 5 i le sasaina, i le faafalepuipuiina,+ i fevesiaʻiga, i galuega fitā, i le lē moe i pō, i nisi taimi e leai ni meaʻai;+ 6 i le amio mamā, i le poto, i le onosaʻi,+ i le agalelei,+ i le agaga paia, i le alofa e lē faatagāfai,+ 7 i le tautala i le upu moni, i le mana o le Atua;+ e ala i auupega o le amiotonu+ i le lima taumatau* ma le lima tauagavale,* 8 e ala i le faamamaluina ma le faalumaina, e ala i le taʻuleagaina ma le taʻuleleia. Ua manatu tagata iā i matou e pei o ni ē e taufaasesē ae e faamaoni i matou, 9 e pei e lē iloa ae ua lauiloa i matou, e pei a feoti ae faauta! o loo ola i matou,+ e pei ua faasalaina* ae e leʻi tuuina atu i matou i le oti,+ 10 e pei e faanoanoa ae o loo olioli, e pei e matitiva ae ua matou faatamaoaigaina le toʻatele, e pei e leai ni mea ae o loo maua mea uma.+

11 O outou Korinito e, ua matou tautatala saʻo atu iā te outou, ma ua faalautele atu o matou loto iā te outou. 12 E matou te lē o taofiofia lo matou alofa iā te outou,+ a o outou lava ua taofiofia le faaalia mai o lo outou alofa faapelepele iā i matou. 13 O lea, ou te tautala atu ai iā te outou e pei ona ou tautala i le fanau, ia outou faia e pei ona matou faia, ia faalautele foʻi o outou loto.+

14 Ia aua neʻi outou amo faalēgatasi ma ē e lē talitonu.+ Auā e faapefea ona faatasi le amiotonu ma le amioleaga?+ E faapefea ona mafuta le malamalama ma le pōuliuli?+ 15 E faapefea foʻi ona malilie faatasi o Keriso ma Pelialo?*+ E faapefea ona tofusia faatasi le tagata talitonu* ma lē ua lē talitonu?+ 16 E faapefea foʻi ona feagai le malumalu o le Atua ma tupua?+ Auā o i tatou o le malumalu o le Atua soifua;+ e pei ona fetalai mai le Atua: “Ou te nofo faatasi ma i latou+ ma savavali faatasi ma i latou, e avea aʻu ma o latou Atua, e fai foʻi i latou ma oʻu tagata.”+ 17 “‘O le mea lea, ia ō ese ai mai iā i latou, ma ia outou vavaeese,’ ua fetalai mai ai Ieova,* ‘ma aua tou te toe papaʻi atu i se mea e lē mamā’”;+ “‘ona ou talia ai lea o outou.’”+ 18 “‘E avea foʻi aʻu ma o outou tamā,+ ma e fai outou ma oʻu atalii ma oʻu afafine,’+ ua fetalai mai ai Ieova* o Lē e ona le malosi uma lava.”