O le Tusi Muamua o Samuelu
11 Ua alu aʻe Naasa le tagata Amonī+ e siitaua atu iā Iapese+ i Kiliata. Ona fai mai lea o tagata uma o Iapese iā Naasa: “Ia e osia se feagaiga* ma i matou, ma o le a matou auauna atu iā te oe.” 2 Ona fai atu lea o Naasa le tagata Amonī iā i latou: “Ou te osia se feagaiga ma outou, pe afai e saliesea o outou mata taumatau ma ou faalumaina ai Isaraelu uma.” 3 Ua fai mai toeaina o Iapese iā te ia: “Ia tuu mai iā i matou ni aso se fitu, ina ia matou aauina atu ai ni avefeʻau i le nuu uma o Isaraelu. Afai e leai sē e faaola iā i matou, ona matou ō atu lea iā te oe.” 4 Ua ō atu avefeʻau i Kipea+ le nuu o Saulo, ma faamatala atu ia upu i tagata o le nuu, ona fetagisi leotetele ai lea o le nuu uma.
5 Ua sau Saulo mai i le fanua o loo mulimuli mai i le lafu povi, ua faapea atu Saulo: “O le ā ea le mea ua tupu i le nuu ua fetagisi ai?” Ona latou faamatala mai lea iā te ia o upu a tagata Iapese. 6 Ina ua faalogo Saulo i nei upu, ona osofia lea o ia e le agaga o le Atua,+ ma ua matuā ita lava o ia. 7 Ona ave lea e ia o povi poʻa e lua, ua vaevae i vaega ma aauina atu i le nuu uma o Isaraelu i lima o avefeʻau, o ē na faapea atu: “O se tasi e lē mulimuli atu iā Saulo ma Samuelu, o le a faapenei ona faia i ana povi!” Ona matataʻu ai lea o le nuu ona o Ieova, ma latou ō atu ai ma le lotogatasi.* 8 Ua ia faitauina i latou i Piseka, ma o le aofaʻi o le fanauga a Isaraelu e toʻa 300,000, a o tagata o Iuta e toʻa 30,000. 9 Ona latou fai atu lea i avefeʻau na ō mai: “O le mea lenei e tou te fai atu ai i tagata o Iapese i Kiliata, ‘O taeao e tou te maua ai le faaolataga, pe a oo ina vevela le lā.’” Ona ō lea o avefeʻau ma taʻu atu i tagata o Iapese, ma ua latou olioli ai. 10 Ua faapea mai tagata Iapese iā Naasa: “O taeao e matou te ō atu ai iā te outou, ona outou faia lea iā i matou e tusa ma mea uma ua outou manatu i ai.”+
11 I le aso na sosoo ai, na tofia ai e Saulo tagata i ni ʻautau se tolu; ua latou ō atu i le ogatotonu o le togālauapi i le leoleoga o le taeao,* ma fasia tagata Amonī+ seʻia oo ina vevela le aso. O tagata fo‘i na totoe, ua faataapeapeina ina ia lē toe faatasi se to‘alua o i latou. 12 Ona fai mai lea o le nuu iā Samuelu: “O ai ea ua faapea ane, ‘Pe e fai Saulo ma tupu iā i matou?’+ Inā tuu mai ia o ia tagata seʻi o matou fasiotia i latou.” 13 Ae ua fai atu Saulo: “E lē tatau ona fasiotia se tagata i le asō,+ auā o le aso nei ua laveaʻia ai Isaraelu e Ieova.”
14 Mulimuli ane, ona fai atu lea o Samuelu i le nuu: “Ō mai ia seʻi o tatou ō i Kilikala,+ ina ia toe faamaonia le tofi o le tupu.”+ 15 Ona ō lea o le nuu uma i Kilikala, ua latou faia foʻi Saulo ma tupu i luma o Ieova i Kilikala. Ua latou faia taulaga faifaatasi i inā i luma o Ieova,+ ma ua matuā olioli ai Saulo ma tagata uma o Isaraelu.+