Levitiko

22 Ua fetalai mai pea Ieova iā Mose e faapea: 2 “Ia e fai atu iā Arona ma ona atalii, e ao ona latou faaeteete i le taulimaina o mea paia* a le fanauga a Isaraelu, ma aua neʻi faaleagaina loʻu igoa paia+ i mea ua latou faapaiaina mo aʻu.+ O aʻu o Ieova. 3 Ia e fai atu iā i latou, ‘I o outou tupulaga o loo mulimuli mai, o so o se tasi o a outou fanau e faalatalata mai i mea paia ua faapaia e le fanauga a Isaraelu mo Ieova, a o lē mamā o ia, ia fasiotia lenā tagata ma ia lē toe tū o ia i oʻu luma.+ O aʻu o Ieova. 4 E leai se tane o le fanau a Arona e ʻai i mea paia pe a lepela+ o ia, pe sau le vavale+ mai iā te ia seʻiloga ua mamā o ia,+ po o lē foʻi e paʻi i se tasi ua lē mamā ona ua paʻi i se tagata oti,+ po o se tane ua alu lona sua,+ 5 po o se tane ua paʻi i meaola ua feoaʻi faatasi e lē mamā,+ pe paʻi i se tamāloa e lē mamā ona o so o se māfuaaga, ma e mafai ona lē mamā ai o ia.+ 6 O le tagata e paʻi i so o se tasi o nei mea, e lē mamā o ia seʻia oo i le afiafipō, ma e lē ʻai o ia i so o se mea paia, ae e ao ona tāʻele o ia i le vai.+ 7 E mamā o ia pe a goto le lā, a mavae lea ona ʻai ai lea o ia i nisi o mea paia, auā o lana meaʻai lea.+ 8 Aua neʻi ʻai o ia i le aano o se manu ua maua atu ua mate po o se mea ua saeia e se manu o le vao, ma lē mamā ai o ia.+ O aʻu o Ieova.

9 “‘E ao ona latou tausia la latou matafaioi iā te aʻu, ina ia aua neʻi o latou agasala ona o lea mea, ma feoti ai ona o le agasala auā ua latou faaleagaina ai mea paia. O aʻu o Ieova o lē e faapaiaina i latou.

10 “‘Aua neʻi ʻai se tagata ese* i so o se mea paia.+ Aua foʻi neʻi ʻai se tagata ese e aumau ma se ositaulaga po o se tagata ua faafaigaluega i so o se mea paia. 11 Ae afai e faatau e se ositaulaga se tagata i ana tupe, e mafai ona ia ʻai ai. O pologa foʻi ua fananau mai i tagata ua i lona fale, e mafai ona latou aai i lana meaʻai.+ 12 Afai e faaipoipo le afafine o le ositaulaga i se tagata e lē o se ositaulaga,* e lē mafai ona ʻai o ia i mea ua foaʻi e fai ma mea paia. 13 Ae afai ua oti le tane a le afafine o le ositaulaga, po ua teteʻa ma lana tane ae e leai sana fanau, ma ua toe foʻi o ia i le fale o lona tamā e pei o aso o lona talavou, e mafai ona ʻai o ia i le meaʻai a lona tamā;+ ae aua neʻi ʻai ai lava se tagata ese.*

14 “‘Afai e ʻai ma le lē iloa e se tasi se mea paia, e ao ona ia faaopoopo i ai le tasi vaelima o le tau o le mea paia, ma avatu le mea paia i le ositaulaga.+ 15 E lē tatau ona faaleagaina e ositaulaga mea paia a le fanauga a Isaraelu, ia ua latou foaʻi atu iā Ieova,+ 16 ma māfua ai le faasalaina o tagata ona ua nofosala, i lo latou ʻaina o a latou lava mea paia; auā o aʻu o Ieova o lē ua faapaiaina le nuu.’”

17 Ua fetalai mai pea Ieova iā Mose e faapea: 18 “Ia fai atu iā Arona ma ona atalii, ma le fanauga uma a Isaraelu, ma faapea atu iā i latou, ‘Pe a avatu e se tagata Isaraelu po o sē e aumau i Isaraelu lana taulaga mū+ iā Ieova e faataunuu ai ana tautoga pe faia se taulaga tauofo,+ 19 e ao ona ia avatu se manu poʻa e matuā lelei lava+ mai i le lafu, o tamaʻi mamoe poʻa, po o tamaʻi ʻoti poʻa ina ia talileleia ai outou. 20 Aua tou te avatua so o se manu e faalētonu lona tino,+ auā e lē talileleia outou i se taulaga faapena.

21 “‘Afai e avatu e se tasi se taulaga faifaatasi+ iā Ieova ina ia faia ai se tautoga, po o se taulaga tauofo, e ao ona matuā lelei le manu mai i le lafu povi po o le lafu mamoe, ina ia talileleia ai o ia. Aua neʻi iai se mea e faalētonu i lona tino. 22 Aua neʻi avatua se manu e tauaso, pe gau sona ivi, pe manuʻa, pe lafetogā, pe poʻupoʻua, pe lafā; aua lava neʻi outou avatua ia mea iā Ieova, pe faia ai ni taulaga i luga o le fata faitaulaga mo Ieova. 23 E mafai ona e fai le taulaga tauofo i le povi poʻa po o le mamoe e umī pe puupuu le isi lima po o le isi vae nai lo o le isi, ae e lē talileleia pe afai e faia ai le taulaga o le tautoga. 24 Aua tou te avatua iā Ieova le manu ua faaleagaina, po ua manuʻa, po ua aveese, po ua tipi ese ona fuāmanava, ma aua tou te fai taulaga ai i na manu i lo outou laueleele. 25 Aua fo‘i tou te avatua ia mea mai i le lima o le tagata mai se isi atunuu e fai ma areto a lo outou Atua, auā ua leaga ma faalētonu ia manu. E lē talileleia ai outou.’”

26 Ua toe fetalai mai Ieova iā Mose e faapea: 27 “Afai e fanau mai se povi poʻa po o se tamaʻi mamoe poʻa po o se ʻoti, e ao ona tuu pea i lona tinā mo aso e fitu,+ ae i le aso lona valu ma aso e sosoo ai, e talileleia ai pe a faia le taulaga, o le taulaga lea iā Ieova ua faia i le afi. 28 Aua tou te fasia se povi ma lana tama po o se mamoe ma lana tama i le aso e tasi.+

29 “Afai tou te avatu se taulaga, o se taulaga faafetai iā Ieova,+ e ao ona outou avatu le taulaga ina ia talileleia ai outou. 30 E ao ona ʻai i lenā aso. Aua tou te tuua se mea o le taulaga seʻia oo i le taeao.+ O aʻu o Ieova.

31 “Ia outou tausia ma faia aʻu poloaʻiga.+ O aʻu o Ieova. 32 Aua tou te faaleagaina loʻu igoa paia,+ ma e ao ona faapaiaina aʻu i le fanauga a Isaraelu.+ O aʻu o Ieova o lē o loo faapaiaina outou,+ 33 o lē na aumaia outou mai i le atunuu o Aikupito, e faailoa ai iā te outou o aʻu o lo outou Atua.+ O aʻu o Ieova.”