Amosa
3 “Le fanauga a Isaraelu e, inā faalogo mai ia i upu nei a Ieova e faatatau iā te outou, e faatatau i le aiga atoa na ou aumaia mai i le atunuu o Aikupito, e faapea:
2 ‘Ua na o outou ua ou iloa mai i aiga uma o le lalolagi.+
O le mea lea o le a ou faasala ai outou ona o a outou mea sesē uma.+
3 Pe e savavali faatasi ea se toʻalua, pe seʻi vaganā ua malilie e feiloaʻi muamua?*
4 Pe e tagi leotele ea se leona i le vaomatua pe a leai se manu e na te puʻea?
Pe e gū ea se tamaʻi leona* mai i le mea e nofo ai, pe afai e na te leʻi puʻea se mea?
5 Pe e paʻū ea se manulele i se mailei i luga o le laueleele, pe afai e leai se mailei mo ia?*
Pe e fiti aʻe ea se mailei mai i le laueleele, pe afai e leʻi puʻea ai se mea?
6 Pe a ilia se pū i le aai, pe e lē gatete ai ea tagata?
Pe a tupu se malaia i le aai, pe e lē o Ieova ea na māfua ai?
7 Auā e lē faia lava e le Alii Pule Silisili Ese o Ieova se mea,
Seʻi vaganā ua ia faaali atu ana mataupu faalilolilo* i ana auauna le ʻauperofeta.+
8 Ua tagi leotele le leona!+ O ai ea sē e lē fefe ai?
Ua fetalai le Alii Pule Silisili Ese o Ieova! O ai sē e lē vavalo?’+
9 ‘Ia outou faasilasila atu i luga o ʻolo malolosi o Asetota
Ma ʻolo malolosi i le atunuu o Aikupito.
Ia faapea atu: “Ia faapotopoto mai i mauga o Samaria;+
Ia vaai i le vāvāō i ona lotolotoi,
Ma faiga taufaasesē o loo iai iā te ia.+
10 Auā ua latou lē iloa fai le mea ua tonu,” ua fetalai mai ai Ieova,
“O i latou na ua faaputu faiga sauā ma le faaumatiaga i o latou ʻolo malolosi.”’
11 O lea, o le fetalaiga lenei a le Alii Pule Silisili Ese o Ieova,
‘O le a siʻomia e se fili le laueleele,+
O le a ia aveesea mai iā te oe lou malosi,
O le a vetea foʻi ou ʻolo malolosi.’+
12 O le fetalaiga lenei a Ieova,
‘E pei ona seʻi ese e le leoleo mamoe mai i le gutu o le leona o ni vae se lua ma se fasi taliga,
E faapea foʻi ona seʻi ese mai i le fanauga a Isaraelu,
O i latou o loo nonofo i Samaria i moega mananaia ma sofa lelei.’*+
13 ‘Ia outou faalogo ma lapataʻi atu* i le aiga o Iakopo,’ ua fetalai mai ai le Alii Pule Silisili Ese o Ieova le Atua o ʻau.
14 ‘Auā o le aso ou te faasalaina ai Isaraelu ona o ana fouvalega* uma,+
Ou te faaumatia ai foʻi fata faitaulaga o Peteli;+
E aveesea foʻi seu o le fata faitaulaga, ma paʻuʻū ai i le eleele.+
15 Ou te lepetia le fale mo le tau mālūlū atoa ma le fale mo le tau māfanafana.’