Sakaria
13 “O lea aso, e eli ai se vaieli mo le aiga o Tavita ma ē o loo nonofo i Ierusalema, ina ia faamamā ai a latou agasala ma mea leaga.+
2 “O lea aso,” ua fetalai mai ai Ieova o ʻau, “ou te tineia ai igoa o tupua i le atunuu,+ ma e lē toe manatua ia mea; ou te aveesea foʻi perofeta+ ma le agaga e lē mamā mai i le atunuu. 3 Afai foʻi e toe faia e se tagata se valoaga, ona fai atu lea o lona tamā ma lona tinā iā te ia, o ē na fanaua o ia, ‘E te lē ola, auā ua e tautala i mea pepelo i le suafa o Ieova.’ E ao i lona tamā ma lona tinā o ē na fanaua o ia, ona tutuʻi iā te ia ona o lana valoaga.+
4 “O lea aso, e taʻitasi ai perofeta ma māsiasi i lana faaaliga pe a faia lana valoaga; ma e latou te lē ofuina ni ofu faapitoa ua faia i fulufulu o manu+ ina ia taufaasesē ai. 5 Ona ia faapea mai lea, ‘E lē o aʻu o se perofeta. O aʻu o le tagata e galueaʻiina le laueleele, auā na faatauina aʻu e se tagata e fai ma pologa talu mai loʻu tauleʻaleʻa.’ 6 Pe a fesili atu foʻi se tasi iā te ia, ‘O ā nei manuʻa e i le vā o ou tauʻau?’* e tali mai o ia, ‘O manu‘a na ou lavea ai i le fale o aʻu uō.’”*
7 “Le pelu e, ala mai ia e faasagatau i loʻu leoleo mamoe,+
Ia faasagatau foʻi i le tamāloa ua ma uō,” ua fetalai mai ai Ieova o ʻau.
“Ia taia le leoleo mamoe,+ ma ia faataapeape le lafu;*+
Ona ou toe faafoʻi atu ai lea o loʻu lima i ē e faatauvaa.”
8 “I le atunuu atoa,” ua fetalai mai ai Ieova,
“O le a faaumatia ona vaega e lua ma fano* ai;
Ae o le vaega lona tolu o le a faatotoe i le atunuu.
9 Ou te faaui ane le vaega lona tolu i le afi;
Ma ou faamamāina i latou e pei ona faamamāina o le siliva,
Ma tofotofoina i latou e pei ona tofotofoina o le auro.+
E latou te valaau i loʻu igoa,
Ma ou te tali atu iā i latou.
Ou te fai ane, ‘O loʻu nuu lenei,’+
Ma e latou te fai mai, ‘O Ieova lo matou Atua.’”