O le Tusi Lona Lua o Tupu

16 O le tausaga lona 17 o le nofoaiga a Peka le atalii o Remalia, na fai ai ma tupu Aasa+ le atalii o Iotama le tupu o Iuta. 2 E 20 tausaga o Aasa ina ua fai o ia ma tupu, ma e 16 tausaga na ia pule ai mai i Ierusalema. E na te leʻi faia le mea ua tonu i le silafaga a Ieova lona Atua, e pei ona sa faia e Tavita lona augātamā.+ 3 Nai lo o lea, na savali o ia i ala o tupu o Isaraelu,+ ma na ia faaui* ane lona atalii i le afi,+ e tusa ai ma mea inosia na faia e nuu ese+ na tuliesea e Ieova mai i luma o le fanauga a Isaraelu. 4 Na ia faia pea taulaga ma faamū taulaga i mea maualuluga,+ ma luga o aʻega, ma lalo ifo o laau lauolaola uma.+

5 O le taimi lenā na ō aʻe ai Resina le tupu o Suria ma Peka le atalii o Remalia le tupu o Isaraelu, e tau ma Ierusalema.+ Ua la osofa‘ia Aasa, ae ua lē mafai ona laʻua faoa le aai. 6 O le taimi foʻi lenā na toe faafoʻi atu ai e Resina le tupu o Suria o Elata+ iā Etoma, ona ia tuliesea lea o tagata Iutaia* mai i Elata. Ua ō mai tagata Etoma i Elata ma nonofo ai pea i inā e oo mai i le aso nei. 7 Ona aauina atu lea e Aasa o avefeʻau iā Tikila-pilesa+ le tupu o Asuria, ua faapea atu: “O aʻu o lau auauna, o lou atalii. Inā sau ia ma faaola iā te aʻu mai i le lima o le tupu o Suria ma le lima o le tupu o Isaraelu, o ē ua siitaua mai iā te aʻu.” 8 Ua ave foʻi e Aasa siliva ma auro na iai i le fale o Ieova ma ʻoa i le fale o le tupu, ua avatu i le tupu o Asuria e fai ma meaalofa.+ 9 Ua talia e le tupu o Asuria lana talosaga, ona alu aʻe lea o le tupu o Asuria ma faoa Tamaseko, ma ua ia ave faapagota i Kiri+ tagata na iai, ma ua ia fasiotia foʻi Resina.+

10 Ona alu atu lea o le tupu o Aasa e faafeiloa‘i Tikila-pilesa le tupu o Asuria i Tamaseko. Ina ua iloa atu e le tupu o Aasa le fata faitaulaga o loo i Tamaseko, ona ia auina atu lea i le ositaulaga o Uria le ata o le fata faitaulaga ma lona fausaga, e tusa ma mea uma o loo faia ai.+ 11 Ona faia lea o le fata faitaulaga+ e Uria+ le ositaulaga, e tusa ma mea uma na poloaʻi mai ai le tupu o Aasa mai i Tamaseko. Ua uma ona fausia le fata faitaulaga e Uria le ositaulaga, a o le‘i toe fo‘i mai le tupu o Aasa mai i Tamaseko. 12 Ina ua sau le tupu mai i Tamaseko ma iloa atu le fata faitaulaga, ona ia faalatalata atu lea i le fata faitaulaga ma fai ai i luga taulaga.+ 13 Ua ia faaauau pea ona susunu lana taulaga mū ma lana taulaga i meaʻai, ma liligi atu lana taulaga i meainu, ma sausau le toto o ana taulaga faifaatasi i luga o lenā fata faitaulaga. 14 Ua ia aveese mai i luma o le fale, le fata faitaulaga ʻapamemea+ sa i luma o Ieova, lea na i le vā o lana fata faitaulaga ma le fale o Ieova, ma ua ia tuuina i le itu i mātū o lana fata faitaulaga. 15 Ona poloaʻi atu lea o le tupu o Aasa iā Uria+ le ositaulaga e faapea: “Ia e faia i luga o le fata faitaulaga sili+ o le taulaga mū i le taeao, o le taulaga i meaʻai i le afiafi,+ o le taulaga mū a le tupu ma lana taulaga i meaʻai, faapea taulaga mū, o taulaga i meaʻai, ma taulaga i meainu a tagata uma o le nuu. Ia e sausau foʻi i ona luga le toto uma o le taulaga mū, ma le toto uma o isi taulaga. A o le fata faitaulaga ʻapamemea, seʻi oʻu mafaufau po o le ā le mea e fai i ai.” 16 Ua faia e Uria le ositaulaga e tusa ma mea uma na poloaʻi atu ai le tupu o Aasa.+

17 Ua vaevae ninii foʻi e le tupu o Aasa puipui i autafa o taavale toso+ ma aveese mai ai faatanoa;+ ua ia aveese foʻi le faatanoa vai telē* mai i luga o povi poʻa ʻapamemea,+ ma tuu i luga o le paepae maa.+ 18 Ua ia aveesea le faapaologa sa faaaogā i le Sapati, lea na fausia e lata ane i le malumalu, ma tapunia le ala o le tupu i le fale o Ieova. Na ia faia faapea ona o le tupu o Asuria.

19 A o le olaga uma o Aasa ma mea na ia faia, po ua lē o tusia ea i le tusi o le talafaasolopito o tupu o Iuta?+ 20 Ona taoto lea o Aasa faatasi ma ona augātamā, ma ua tanu faatasi ma ona augātamā i le Aai a Tavita; ona avea lea o Esekia*+ lona atalii ma tupu e sui iā te ia.