Isaia
31 Oi talofa iā i latou e ō ifo i Aikupito mo se fesoasoani,+
O ē e faalagolago i solofanua,+
O ē e faatuatuaina kariota o le taua, auā ua tele ia mea,
Ma faatuatuaina solofanua* ona e malolosi.
Ae e latou te lē faamoemoe atu i Lē e Paia o Isaraelu
Ma ua lē saʻili atu iā Ieova.
2 Ae e atamai o ia, ma o le a ia faaoo mai le malaia,
Ma e na te lē toe faafoʻi mai ana afioga.
O le a ia faasala aiga o ē e fai mea leaga,
Ma ē o loo fesoasoani i tagata o loo faia mea leaga.+
3 O tagata o Aikupito ua na o ni tagata ae e lē o le Atua;
O a latou solofanua o tino ia ae e lē o ni agaga.+
Pe a faaloaloa e Ieova lona aao,
E tautevateva le nuu e ofoina atu le fesoasoani,
E paʻū foʻi le nuu e mauaina le fesoasoani;
O le a faaumatiaina uma i latou i le taimi e tasi.
4 Auā o loo faapea ona fetalai mai Ieova iā te aʻu:
“E pei ona gū le leona, o se tamaʻi leona malosi,* i lana manu ua fasia,
Pe a ō atu faatasi se vaega o leoleo mamoe e tulia o ia,
E lē fefe o ia i o latou leo,
Pe faavaivai ona o lo latou pisapisaō,
O le a faapea foʻi ona afio ifo Ieova o ʻau e faasagatau atu
Ona o le mauga o Siona ma lona aʻega.
5 E pei ona faapepepepe o se manulele e puipuia lana toloaʻi, e faapea foʻi ona puipuia Ierusalema e Ieova o ʻau.+
O le a ia puipuia o ia ma laveaʻiina o ia.
O le a ia faasaoina o ia ma faaola iā te ia.”
6 “O outou le fanauga a Isaraelu e, ia toe foʻi i Lē na outou matuā fouvale i ai.+ 7 Auā o lea aso o le a taʻitoʻatasi outou ma teena ona atua siliva lē aogā ma ona atua auro e lē aogā, na faia e o outou lava lima ma outou agasala ai.
8 E oti le Asuria i le pelu, e lē o se pelu a le tagata;
Ma o le a faaumatia o ia i se pelu, ae e lē o se pelu a se tagata.+
E sola o ia ona o le pelu
Ma o le a faatigāina ona tauleleʻa i galuega mamafa.