Esekielu

1 O le 30 o tausaga,* i le aso lona lima o le masina lona fā, a o oʻu iai faatasi ma tagata na ave faapagota+ i tala ane o le vaitafe o Kepara,+ na matala ai le lagi ona ou vaaia lea o faaaliga mai i le Atua. 2 O le aso lona lima o le masina, o le tausaga lona lima lea talu ona ave faapagota le tupu o Ioakina,+ 3 na oo mai ai le afioga a Ieova iā Esekielu* le atalii o Posai le ositaulaga, a o iai i le nuu o tagata Kaletaia+ i tala ane o le vaitafe o Kepara. O i inā na oo mai ai i ona luga le aao o Ieova.+

4 A o oʻu vaai atu, na ou iloa ai se matagi malosi+ o loo sau mai i le itu i mātū, o loo iai foʻi se ao telē ma le afi mumū*+ ua siʻomia i le malamalama, ma ua emoemo mai i totonu o le afi se mea e pei ua fefiloi ai le auro ma le siliva.+ 5 I totonu o le afi, ua iai i latou e pei o ni foafoaga agaga se toʻafā,+ ma o o latou foliga ua pei o foliga o se tagata. 6 Ua taʻitasi i latou ma ona foliga e fā ma apaʻau e fā.+ 7 O o latou vae e sasa‘o, ma o latou alofivae, ua pei o alofivae o se tamaʻi povi, ma ua iila o latou vae e pei o le pupula o ʻapamemea ua faaiilaina.+ 8 I lalo ifo o o latou apaʻau taʻitasi e fā ua iai le lima o le tagata, ma ua taʻitasi i latou e toʻafā ma ona foliga ma apaʻau. 9 O o latou apaʻau e papaʻi le tasi i le isi. E lē liliu i latou pe a ō atu; e taʻitasi i latou ma alu saʻo i luma.+

10 E faapea o latou foliga: Ua iā i latou e toʻafā foliga o le tagata, o foliga o le leona+ i le itu taumatau, o foliga o le povi poʻa+ i le itu tauagavale, ma ua iā i latou e toʻafā o foliga+ o le aeto.+ 11 O o latou foliga na. Ua faaloloa i luga o latou apaʻau. Ua tofu i latou ma apaʻau e lua e paʻi le tasi apaʻau i le isi, a o isi apaʻau e lua ua ufitia ai o latou tino.+

12 Ua taʻitasi i latou ma alu saʻo i luma. Po o fea lava e uunaʻia i latou e le agaga e ō atu i ai, e latou te ō atu lava i ai.+ E lē liliu i latou a o ō atu. 13 O foliga vaaia o foafoaga agaga, e pei o malala ola o le afi o loo mumū. E iai se mea e foliga mai o ni sulu o le afi ua fefoʻifoʻiaʻi i le vā o foafoaga agaga, ma ua emo mai le uila mai i le afi.+ 14 Pe a ō atu foafoaga agaga ma toe ō mai, e pei a latou gaoioiga o le emo o le uila.

15 A o oʻu vaavaai pea i foafoaga agaga, na ou vaaia ai se uili i le lalolagi i autafa o foafoaga agaga taʻitasi e iai foliga e fā.+ 16 O uili ma o latou fausaga, e tai pei o le pupula o le tasesa, ma e tutusa uma foliga o ia uili e fā. O foliga o uili ma o latou fausaga, e pei ua faalava le isi uili i totonu o le isi uili. 17 Pe a taavavale uili, e mafai ona taavavale atu i itu uma e fā. E lē liliu i se isi itu pe a taavavale atu. 18 E maualuluga uili ma e faapogaia ai le mataʻu, ua soo foʻi le pito i fafo o uili e fā i mata ua li‘o uma ai.+ 19 O so o se taimi e ō atu ai foafoaga agaga, e taavavale atu ai foʻi ma uili i o latou autafa, ma pe a siitia aʻe foafoaga agaga mai i le laueleele, e siitia aʻe foʻi uili.+ 20 E ō atu foafoaga agaga i so o se mea e uunaʻia i latou e le agaga e ō atu i ai. E siitia aʻe foʻi uili faatasi ma i latou, auā o le agaga lea o loo uunaʻia ai foafoaga agaga, ua iai foʻi i uili. 21 A ō foafoaga agaga, e taavavale foʻi uili; a tutū foafoaga agaga, e tutū foʻi uili; ma pe a siitia aʻe i latou mai i le laueleele, e siitia aʻe foʻi uili faatasi ma i latou, auā o le agaga lea o loo uunaʻia ai foafoaga agaga, ua iai foʻi i uili.

22 I luga aʻe o ulu o foafoaga agaga, ua iai se mea e pei o se fola e fe‘ilafi e pei o se aisa matagofie ma mataʻina, ua folasia i luga aʻe o o latou ulu.+ 23 I lalo ifo o le fola, ua faaloloa ai o latou apaʻau ma e paʻi le tasi apaʻau i le isi. E tofu i latou ma apaʻau e lua e ufiufi ai le tasi itu o o latou tino, ma isi apaʻau e lua e ufiufi ai le isi itu. 24 Ina ua ou faalogo i le taalili o o latou apaʻau, na pei o le taalili o vai e tele, e pei o le taalili o Lē e ona le malosi uma lava.+ Pe a latou ō atu, e pei o le pisapisaō o se ʻautau. Pe a tutū i latou, ona tuu lea i lalo o latou apaʻau.

25 Ua iai le siʻufofoga i luga o le fola lea o loo i luga aʻe o o latou ulu. (Pe a tutū i latou, ona tuu lea i lalo o latou apaʻau.) 26 I luga aʻe o le fola lea o loo i luga o o latou ulu, ua iai se mea e foliga mai e pei o se maa safaira,+ lea e pei o se nofoālii.+ I luga o le nofoālii, ua afio ai lē e foliga e pei o se tagata.+ 27 Ua ou vaaia se mea e pei o le pupula o le auro ua fefiloi ma le siliva+ ma e pei o se afi ua mumū, mai i le mea e foliga mai o ona puimanava e agaʻi i luga; ma mai i ona puimanava e agaʻi i lalo, ua ou vaaia ai se mea e pei o se afi.+ Ua iai le pupula ua siʻomia ai o ia 28 e pei o se nuanua+ i se ao i le aso timuga. O foliga na o le matuā pupula ua siʻomia ai. E foliga mai e pei o le mamalu o Ieova.+ Ina ua ou vaai i ai, ona ou faapaʻū faō lea, ma ua ou faalogoina le siʻufofoga o se tasi o loo fetalai mai.