O le Tusi Lona Lua o Nofoaiga a Tupu

19 Ona toe foʻi atu lea o Iosefatu le tupu o Iuta ma le saogalemu*+ i lona fale i Ierusalema. 2 Ona sau lea o Ieʻu+ le atalii o Hanani+ o lē e faamatalaina faaaliga e faafetaui le tupu o Iosefatu, ma ua faapea mai: “Pe e tatau ona e fesoasoani+ i ē e amioleaga, ma pe e tatau ea ona e alofa iā i latou o ē e ita iā Ieova?+ O le mea lea, ua toʻasā ai Ieova iā te oe. 3 Peitaʻi, ua maua mea lelei iā te oe,+ auā na e aveeseina pou paia* mai i le nuu, ma na e saunia foʻi lou loto* e saʻili i le Atua moni.”+

4 Ua nofo pea Iosefatu i Ierusalema, ma ua toe alu atu o ia i le nuu e amata mai i Peresepa e oo i vaega maugā o Efaraima,+ ina ia toe faafoʻi mai i latou iā Ieova le Atua o o latou augātamā.+ 5 Ua ia tofia foʻi faamasino i le nuu atoa i aai malupuipuia uma o Iuta, o lea aai ma lea aai.+ 6 Ona ia fai atu lea i faamasino: “Ia uaʻi lelei i mea o loo outou faia, auā e tou te lē o faamasino mo se tagata, a o Ieova; o loo faatasi o ia ma outou pe a outou faia ni iʻuga faafaamasinoga.+ 7 O lenei, ia iā te outou le mataʻu iā Ieova.+ Ia outou gaoioi ma le faaeteete, auā e leai se amiolētonu iā Ieova lo tatou Atua,+ po o se faailoga tagata,+ po o ni faiga faaalatua.”+

8 Ua tofia foʻi e Iosefatu i Ierusalema nisi o sa Levī, o ositaulaga, ma nisi o alii sili o aiga o tamā o Isaraelu, e auauna o ni faamasino mo le suafa o Ieova, ma faia faaiʻuga o mataupu faaletulafono a tagata o loo nonofo i Ierusalema.+ 9 Ua ia poloaʻi atu foʻi iā i latou, e faapea: “O le mea lenei e ao ona outou faia ona o le mataʻu iā Ieova, ma ia faia ma le faamaoni ma le lotoatoa:* 10 O so o se taimi e aumaia ai e o outou uso o ē o loo nonofo i o latou aai, se mataupu faaletulafono e aofia ai le faamasaatoto,+ po o se fesili e faatatau i se tulafono, o se poloaʻiga, o tuutuuga, po o iʻuga o faamasinoga, e ao ona outou lapataʻia i latou ina ia aua ai neʻi o latou nofosala iā Ieova; auā a leai, o le a oo mai le toʻasā iā te outou ma o outou uso. O le mea lea e ao ona outou faia, ina ia outou lē nofosala ai. 11 O lenei, o Amaria le ositaulaga sili e pule iā te outou, e fesoasoani iā te outou ina ia iloa le finagalo o Ieova e faatatau i mataupu uma.+ O Sepatia le atalii o Isamaeli, o le taʻitaʻi lea o le aiga o Iuta ma galuega a le tupu. O le a auauna foʻi sa Levī o ni leoleo mo outou. Ia faamalolosi ma ia gaoioi, ia faatasi foʻi Ieova i ē o loo faia mea lelei.”+