Numera

6 Ua fetalai mai foʻi Ieova iā Mose e faapea: 2 “Ia e fai atu i le fanauga a Isaraelu ma faapea atu iā i latou, ‘Afai e faia e se tane po o se fafine se tautoga faapitoa e avea ma se Naseri*+ iā Ieova, 3 e lē tatau ona ia inu i le uaina po o se isi ʻava malosi. E lē tatau ona ia inu i le vineta o le uaina po o le vineta o se isi ʻava malosi.+ E lē tatau ona ia inu i se sua ua faia mai i le vine, pe ʻai foʻi i ni vine mata pe mamago. 4 O aso uma e avea ai o ia o se Naseri, e lē tatau ona ʻai i so o se mea e faia mai i le laau o le vine, e aofia ai fua moto atoa foʻi ma paʻu.

5 “‘O aso uma ua faia ai lana tautoga o se Naseri, aua neʻi oo se tafi i lona ulu.+ E ao ona paia lava o ia e ala i le faauumi o lona lauulu seʻia oo ina atoa aso ua vavaeese ai o ia mo Ieova. 6 E lē tatau ona faalatalata atu o ia i se tino oti i aso uma ua vavaeese ai o ia lava mo Ieova. 7 Aua neʻi lē mamā o ia ona o lona tamā po o lona tinā, po o lona uso, po o lona tuafafine pe a maliliu i latou,+ auā ua avea lona lauulu ma faailoga o lona avea ma Naseri i lona Atua.

8 “‘E paia lava o ia iā Ieova i aso uma e avea ai o ia ma Naseri. 9 Ae afai e oti faafuaseʻi se tasi i ona autafa+ ma lē mamā ai lona ulu lea ua iai le faailoga o lona vavaeese mo le Atua,* e ao ona ia tafi lona ulu+ i le aso e faamamāina ai o ia. E ao ona ia tafi lona ulu i le aso lona fitu. 10 Ae i le aso lona valu, e ao ona ia aumaia ai ni manutagi se lua po o ni tamaʻi lupe se lua i le ositaulaga i le faitotoʻa o le faleʻie o le feiloaʻiga. 11 E fai e le ositaulaga le tasi ma taulaga o agasala, a o le isi e fai ma taulaga mū ma faia ai le togisala mo ia,+ auā ua ia agasala ona o le tino oti. E ao ona ia faapaia lona lava ulu i lea aso. 12 E ao ona toe amata ona vavaeese o ia mo Ieova i aso uma e avea ai o se Naseri, e na te aumaia foʻi se tamaʻi mamoe poʻa faatoʻā atoa le tausaga e fai ma taulaga o le nofosala. Peita‘i, e lē toe faitaulia aso ua mavae auā ua ia faaleagaina lona avea ma Naseri.

13 “‘O le tulafono lenei e faatatau i le Naseri: I le aso e atoa ai ona aso e fai ai ma Naseri,+ e aumaia o ia i le faitotoʻa o le faleʻie o le feiloaʻiga. 14 O manu ia e na te aumaia e fai ai ana taulaga iā Ieova: o se tamaʻi mamoe poʻa faatoʻā atoa le tausaga e matuā lelei lava e fai ma taulaga mū,+ o se tamaʻi mamoe fafine faatoʻā atoa le tausaga e matuā lelei lava e fai ma taulaga o agasala,+ o se mamoe poʻa e matuā lelei lava e fai ai le taulaga faifaatasi,+ 15 o le ato o falaoa lapotopoto e lē faafefeteina ua fai i le falaoamata lelei ua iai sina suāuu, o falaoa manifinifi e lē faafefeteina ua nini i le suāuu, faatasi ma taulaga i meaʻai+ ma taulaga i meainu.+ 16 E aumaia e le ositaulaga na mea i luma o Ieova, ma faia ai lana taulaga o agasala ma lana taulaga mū. 17 E na te ofo atu iā Ieova le mamoe poʻa o le taulaga faifaatasi atoa ma le ato o falaoa e lē faafefeteina, ma e avatu e le ositaulaga le taulaga i meaʻai+ ma taulaga i meainu faatasi ma le mamoe poʻa.

18 “‘E ao i le Naseri ona tafi lona ulu*+ i le faitotoʻa o le faleʻie o le feiloaʻiga, e na te ave foʻi ona lauulu na tutupu a o avea o ia ma Naseri, ma tuu i luga o le afi lea ua i lalo o le taulaga faifaatasi. 19 E aumaia e le ositaulaga le alagalima o le mamoe poʻa ua uma ona saka,+ o le falaoa lapotopoto e lē faafefeteina e tasi mai i le ato, o le falaoa manifinifi e lē faafefeteina e tasi, ma tuu i alofilima o le Naseri ina ua uma ona tafiese le faailoga o lona avea ma Naseri. 20 E ao i le ositaulaga ona lūlū ia mea mai i le isi itu i le isi itu e fai ma taulaga lūlū iā Ieova.+ O se mea lea e paia i le ositaulaga, faatasi ma le fatafata o le taulaga lūlū, ma le vae ua tuu ese e fai ma foaʻi.+ Mulimuli ane, e mafai ona inu le Naseri i le uaina.

21 “‘O le tulafono lea e faatatau i le Naseri+ e faia se tautoga: Afai e tautō o ia ma gafatia le faia o se taulaga iā Ieova e faaopoopo i taulaga e ao ona ia faia o se Naseri, e ao ona ia faataunuu lana tautoga e tusa ma le tulafono o le avea o ia o se Naseri.’”

22 Ona fetalai mai lea o Ieova iā Mose: 23 “Ia e fai atu iā Arona ma ona atalii e faapea, ‘O le auala lenei e tou te faamanuia+ ai i le fanauga a Isaraelu, ia faapea atu iā i latou:

24 “Tau ina ia faamanuia outou+ e Ieova ma tausia outou.

25 Tau ina ia susulu atu le malamalama o fofoga o Ieova iā te outou+ ma ia finagalo malie iā te outou.

26 Tau ina ia silasila atu fofoga o Ieova iā te outou ma tuuina atu le filemu iā te outou.”’+

27 E latou te taʻu atu foʻi loʻu igoa i luga o le fanauga a Isaraelu,+ ina ia ou faamanuia atu ai iā i latou.”+