O le Tusi Lona Tolu a Ioane

1 O aʻu o le toeaina, ua ou tusi atu iā Kaio le uso pele, o lē ou te alofa faapelepele i ai.

2 Le uso pele e, ou te tatalo ia faaauau ona e manuia i mea uma lava ma e maua le soifua mālōlōina, e pei ona manuia o lou olaga i le taimi lenei. 3 Auā ua ou matuā olioli lava ina ua ō mai uso ma faamatala mai lou faamaoni i le upu moni, ma ua ou olioli foʻi ona o loo e savali pea i le upu moni.+ 4 E leai se isi mea e sili ona ou olioli ai,* nai lo o loʻu faalogo atu o loo savavali pea laʻu fanau i le upu moni.+

5 Le uso pele e, o loo e galue faamaoni i so o se mea o loo e faia mo uso e te lē masani ai,+ 6 o ē na molimau atu i luma o le faapotopotoga e faatatau i lou alofa. Faamolemole, ia tapena la latou malaga e tusa ai ma le finagalo o le Atua.+ 7 Auā na latou ō atu ona o le suafa o le Atua, e latou te leʻi aveina foʻi ni mea+ mai i tagata o nuu ese. 8 O le mea lea, e tatau ai ona tatou talimālō i tagata faapena,+ ina ia tatou galulue faatasi ai i le upu moni.+

9 Na ou tusi atu iā te outou uma i le faapotopotoga, a o Tioterifi o lē e fiasili iā te outou,+ e na te lē talia ma le faaaloalo se mea mai iā i matou.+ 10 Afai ou te alu atu, o le a ou faailoa atu ana gaoioiga o loo faia pea, o le faasalalau atu o tala taufaaleaga* e faatatau iā i matou.+ O le lē faamalieina o ia i lenā mea, ua musu ai fo‘i e talia ma le faaaloalo uso.+ O ē foʻi e mananaʻo e taliaina uso, e taumafai o ia e taofi ma faateʻaese mai i le faapotopotoga.

11 Le uso pele e, ia faaaʻoaʻo i mea lelei, ae lē o mea leaga.+ O lē e faia mea lelei e mai i le Atua lava ia.+ A o lē e faia mea leaga, e leʻi vaai* lava o ia i le Atua.+ 12 O loo molimau uso uma e faatatau iā Temetiu, ma ua molimau foʻi le auala o loo ola ai o ia e tusa ma le upu moni. O loo matou molimau foʻi, ma ua outou iloa e moni la matou molimau.

13 E tele ni mea na ou fia taʻu atu iā te oe, ae ou te lē manaʻo e tusi atu i se tusi. 14 Ae ou te faamoemoe e vave ona ta feiloaʻi, ma ta talatalanoa faatasi.

Tau ina ia e maua le filemu.

O loo alolofa atu le ʻauuso. Ia momoli atu oʻu alofaaga i uso taʻitoʻatasi.