O le Tusi i le Faapotopotoga i Roma

2 O le mea lea ua e lē mautali ai, o oe le tagata e, po o ai lava oe,+ pe a e faamasino atu; auā pe a e faamasinoina se isi, ua e faasalaina ai oe lava, auā o oe o lē e faamasino atu o loo e faia na lava mea.+ 2 O lenei, ua tatou iloa o le faamasinoga a le Atua e ōgatusa lea ma le upu moni, e faasaga i ē e faia na mea.

3 Le tagata e, po o lou manatu ea e te sao mai le faamasinoga a le Atua, pe a e faamasino atu iā i latou o loo faia na mea, ae o loo e faia foʻi? 4 Po ua e manatu faatauvaa ea i le tele o lona agalelei,+ faapalepale,+ ma le onosaʻi,+ auā ua e lē iloa o le agalelei o le Atua ua taumafai ai e taʻitaʻiina oe i le salamō?+ 5 Peitaʻi ona o lou faauamaaa ma le lē salamō o lou loto, ua e faatupu ai iā te oe le toʻasā i le aso o le toʻasā, ma le faaalia mai o le faamasinogatonu a le Atua.+ 6 O le a ia tauia foʻi tagata taʻitoʻatasi e tusa ma ana galuega:+ 7 o le ola e faavavau mo ē e saʻilia le mamalu, le viiga, ma le tino e lē pala,+ e ala i le tumau i galuega lelei; 8 peitaʻi, o ē e finauvale ma lē usiusitaʻi i le upu moni, ae faia le amiolētonu, e oo i ai le toʻasā ma le toʻatamaʻi.+ 9 O le a oo puapuaga ma mea tigā i tagata uma e faia mea leaga, e muamua le Iutaia atoa foʻi ma le Eleni; 10 ae o le mamalu, le viiga ma le filemu mo ē uma e faia mea lelei, e muamua le Iutaia+ atoa foʻi ma le Eleni.+ 11 Auā e lē faailoga tagata le Atua.+

12 O i latou uma e agasala e aunoa ma le tulafono, e fano lava e aunoa ma le tulafono.+ A o ē e agasala a o iai i le tulafono, e faamasinoina i latou e tusa ai ma le tulafono.+ 13 Auā o ē e faalogologo i le tulafono, e lē amiotonu i latou i le silafaga a le Atua, a o ē e tausia le tulafono, e taʻuamiotonuina i latou.+ 14 Auā pe a masani ona faia e tagata o nuu ese o mea e tusa ma le tulafono e ui e lē o iai i le tulafono,+ ua avea i latou ma tulafono iā i latou lava. 15 O i latou na ua faaalia ai ua tusia le tulafono i o latou loto, ma ua molimau o latou lotofuatiaifo iā i latou, ma faasalaina pe taʻutonuina i latou i o latou lava manatu. 16 E tupu lenei mea i le aso e faamasinoina ai e le Atua e ala iā Keriso Iesu o mea lilo a tagata,+ e tusa ai ma le tala lelei o loo oʻu folafolaina.

17 O lenei, afai ua taʻua oe o se Iutaia+ ma o loo e faalagolago i le tulafono ma mitamita i le Atua, 18 ma ua e iloa lona finagalo ma talia mea e sili ona lelei, auā ua aʻoaʻoina* ai oe i le Tulafono,+ 19 ma ua e talitonu o oe o le taʻitaʻi i tagata tauaso, o le malamalama i ē o loo i le pōuliuli, 20 o lē e faasaʻoina o ē e lē faautauta, o le faiaʻoga o tamaiti, ma ua e maua le faavae o le poto ma le upu moni i le Tulafono, 21 o lea la, o oe o lē e aʻoaʻo atu i le isi tagata, e te lē aʻoaʻo ea oe iā te oe?+ O oe o lē e talaʻi atu “Aua le gaoi,”+ pe e te gaoi ea? 22 O oe o lē e fai atu “Aua le mulilua,”+ pe e te mulilua ea? O oe o lē e ʻinoʻino i tupua, pe e te faoa ea mea o le malumalu? 23 O oe o lē e mitamita i le tulafono, pe e te faalumaina ea le Atua ona o lou solia o le Tulafono? 24 Auā e pei ona tusia, ua “upuleagaina le suafa o le Atua i tagata o nuu ese ona o outou.”+

25 E faatoʻā aogā le peritomeina+ pe afai e te tausia le tulafono;+ ae e lē aogā le peritome pe afai e te solia le tulafono. 26 Ae afai e tausia e se tagata lē peritomeina+ upu tonu o le Tulafono, pe e lē manatu ea ua peritomeina o ia, e ui lava e leʻi peritomeina o ia?+ 27 O le tagata e lē peritomeina i le tino, e na te faamasinoina oe auā ua ia tausia le Tulafono, a o oe ua e solia le tulafono e ui o loo iā te oe le tulafono na tusia ma ua peritomeina oe. 28 Auā e lē o ia o se Iutaia i le tino ua vaaia,+ e lē o ia foʻi ua peritomeina i le tino.+ 29 A o ia o le Iutaia i totonu e lē vaaia,+ ma ua peritomeina i lona loto+ e ala i le agaga, ae e lē tusa ma le tulafono na tusia.+ O lona viiga, e mai i le Atua ae e lē mai i tagata.+