Numera

5 Ua toe fetalai mai pea Ieova iā Mose e faapea: 2 “Ia e fai atu i le fanauga a Isaraelu ia aauina ese mai i le mea ua faatutū ai faleʻie i latou uma e lepela,+ ma so o se tasi e sau se sua+ mai i lona tino, ma so o se tasi e lē mamā ona na paʻi i se tagata oti.+ 3 E tusa lava po o se tane po o se fafine e ao ona outou aauina ese atu i latou. E ao ona outou aauina ese i latou i tua o le togālauapi, ina neʻi pisia i latou+ o loo i faleʻie auā ou te nofo* faatasi ma i latou.”+ 4 Ona faia lea faapea e le fanauga a Isaraelu, ua aauina ese i latou i tua o le togālauapi. Ua faia e le fanauga a Isaraelu e pei ona fetalai mai ai Ieova iā Mose.

5 Ua fetalai atili mai Ieova iā Mose e faapea: 6 “Ia e fai atu i le fanauga a Isaraelu, ‘Afai e faia e se tane po o se fafine se tasi o agasala e masani ona faia e tagata, ma faia se gaoioiga lē faamaoni iā Ieova, e nofosala lenā tagata.+ 7 E ao ona ia* taʻutino atu+ lana* agasala na fai, ma e toe faafoʻi atu le taui atoa mo lana agasala, ma faaopoopo i ai le tasi vaelima i lea taui;+ e ao ona ia avatu i lē na ia agasala i ai. 8 Ae afai ua oti lē na ia agasala i ai ae e leai sona aiga vavalalata e avatu i ai le taui o le agasala, ona avatu lea iā Ieova o le taui o lana agasala ma e fai lea mo le ositaulaga, e ese mai i le tamaʻi mamoe poʻa lea e faia ai e le ositaulaga le togisala mo ia.+

9 “‘O foaʻi paia+ uma lava a le fanauga a Isaraelu e avatu i le ositaulaga, e fai ia mo ia.+ 10 E tumau pea ona fai mo ia mea paia uma ua avatu e tagata taʻitoʻatasi. Po o ā lava mea ua avatu e tagata taʻitoʻatasi i le ositaulaga, o mea na a le ositaulaga.’”

11 Ua toe fetalai mai Ieova iā Mose e faapea: 12 “Ia e fai atu i le fanauga a Isaraelu, ma faapea atu iā i latou, ‘O le mea lenei e fai pe a liliuese se avā a se tane ma lē faamaoni iā te ia, 13 ma ua feusua‘i ma se isi tamāloa+ ae ua natia lenei mea mai i lana tane ma ua lilo pea, ua ia faia se mea e leaga ai o ia ae ua leai se molimau faasaga iā te ia, ma e leʻi maua foʻi o ia: 14 Afai e fuā le tane ma ua ia masalomia le faamaoni o lana avā ina ua ia faia se mea e leaga ai o ia lava, po ua fuā o ia ma masalomia le faamaoni o lana avā, ae e leʻi faia e le avā se mea e leaga ai o ia, 15 e ao i le tamāloa ona aumai lana avā i le ositaulaga faatasi ma le taulaga a lana avā, o le tasi vaesefulu o le efa* o le falaoamata e faia i le karite. E na te lē sasaa i ai se suāuu pe tuu i ai se lipano,* auā o le taulaga i meaʻai ona o le fuā, o le taulaga i meaʻai e faamanatu ai le agasala.

16 “‘E aumaia e le ositaulaga le avā i luma ma faatū i luma o Ieova.+ 17 Ona aumaia lea e le ositaulaga le vai paia i le ipu omea, e ave foʻi e le ositaulaga ni efuefu ua i luga o le fola o le faleʻie paia ma tuu i le vai. 18 E faatū e le ositaulaga le fafine i luma o Ieova ma tatala i lalo le lauulu o le fafine ma tuu i ona alofilima le taulaga i meaʻai e faamanatu ai, o le taulaga lea i meaʻai ona o le fuā,+ ma e uu i le lima o le ositaulaga le vai oona e malaia ai.+

19 “‘Ona faatautō lea o ia e le ositaulaga, ma fai atu i le fafine: “Afai e lua te leʻi feusua‘i ma se isi tamāloa a o e iai pea i le pule a lau tane+ ma e te leʻi liliuese ma faia se mea e leaga ai, ia lē afāina oe mai i lenei vai oona e malaia ai. 20 Ae afai ua e liliuese a o e iai pea i le pule a lau tane, e ala i le faia o se mea e te leaga ai, ma ua lua feusua‘i ma se isi tamāloa+ ae e lē o ia o lau tane​—” 21 Ona faatautō lea e le ositaulaga le fafine i se tautoga e faamalaia ai, ma e fai atu le ositaulaga i le fafine: “Ia faia e Ieova oe ma faataʻitaʻiga o le malaia, ma o se tautoga i totonu o lou nuu pe a faapaʻū ese* e Ieova lou ogāvae* ma fula ai lou manava. 22 E oo lenei vai e malaia ai i lou gaʻau ina ia fula ai lou manava ma paʻū ese* ai lou ogāvae.”* E ao ona faapea mai le fafine: “Amene! Amene!”*

23 “‘Ona tusia lea e le ositaulaga o nei malaia i se tusi ma tapē ese ai i le vai oona. 24 E na te faainu le fafine i le vai oona e malaia ai, ona oo lea i totonu iā te ia o le vai e malaia ai ma onā ai o ia. 25 E ave e le ositaulaga le taulaga i meaʻai ona o le fuā+ mai i le lima o le fafine, ma lūlū i le isi itu ma le isi itu le taulaga i meaʻai i luma o Ieova, ma avatu ai e latalata ane i le fata faitaulaga. 26 E ave e le ositaulaga se luuga o le taulaga i meaʻai e fai ma sui o le taulaga atoa* ma susunu i luga o le fata faitaulaga,+ mulimuli ane ona ia faainu ai lea o le fafine i le vai. 27 Pe a ia faainu o ia i le vai, afai sa ia faia se mea e leaga ai o ia ma faia se gaoioiga lē faamaoni i lana tane, e oo i totonu iā te ia le vai lea e malaia ai ma onā ai o ia, ona fula ai lea o lona manava ma paʻū ese* ai lona ogāvae,* ma e taʻua foʻi lea fafine e tagata o lona nuu pe a faia a latou faamalaia. 28 Peita‘i, afai e leʻi faia e le fafine se mea e leaga ai ma ua mamā o ia, e sao o ia mai i lenā faasalaga, ma e mafai ona maʻitō o ia ma fanauina ni fanau.

29 “‘O le tulafono lenei i le fuā,+ pe a liliuese se fafine ma faia se mea e leaga ai o ia a o iai pea i le pule a lana tane, 30 pe afai foʻi ua fuā se tamāloa ma masalosalo ua lē faamaoni lana avā iā te ia; e ao ona ia faatū le avā i luma o Ieova, ma e ao i le ositaulaga ona faatinoina lenei tulafono i le avā. 31 E sao le tamāloa mai i le agasala, ae e tali atu lana avā i lana agasala.’”