Teuteronome

27 Ona poloaʻi atu lea o Mose ma toeaina o Isaraelu i le nuu e faapea: “Ia outou tausia poloaʻiga uma ua ou tuuina atu iā te outou i le asō. 2 Pe a oo i le aso tou te sopo atu ai Ioritana ma ō atu i le laueleele ua tuuina mai e Ieova lou Atua iā te oe, ia e faatūina ni maa tetele ma ia vali pa‘epa‘e.*+ 3 Ona e tusia lea i ia maa o upu uma o lenei Tulafono, pe a e sopo atu ina ia e oo atu i le laueleele ua tuuina mai e Ieova lou Atua iā te oe, o se laueleele o loo tafe ai le suāsusu ma le meli, e pei ona folafola mai e Ieova le Atua o ou augātamā iā te oe.+ 4 Pe a outou sopoʻia Ioritana, ia outou faatutūina nei maa i le mauga o Evalu+ ma ia vali pa‘epa‘e nei maa,* e pei ona ou poloaʻi atu ai iā te outou i le asō. 5 E ao fo‘i ona e faia se fata faitaulaga i inā iā Ieova lou Atua, o le fata e fai i maa. Aua e te faaaogā ai se meafaigaluega uʻamea i nei maa.+ 6 Ia e fausia le fata faitaulaga a Ieova lou Atua i maa atoatoa, ma ia e ofoina atu taulaga mū iā Ieova lou Atua i luga o lea fata faitaulaga. 7 E ao ona e faia ai taulaga faifaatasi+ ma ʻai ai i inā,+ ma o le a e olioli ai i luma o Ieova lou Atua.+ 8 Ia manino lelei ona e tusia i nei maa o upu uma o lenei Tulafono.”+

9 Ona fai atu lea o Mose ma ositaulaga sa Levī iā Isaraelu uma e faapea: “Isaraelu e, ia fifilemu ma faalogo mai. O le asō ua avea ai oe ma nuu o Ieova lou Atua.+ 10 Ia e faalogo i le siʻufofoga o Ieova lou Atua ma tausia ana poloaʻiga ma ana tulafono,+ ua ou poloaʻi atu ai iā te oe i le asō.”

11 Ona poloaʻi atu lea o Mose i le nuu i lenā aso e faapea: 12 “O ituaiga nei o le a tutū i le mauga o Keresema+ e faamanuia atu i le nuu pe a outou sopoʻia atu Ioritana: o Simeona, o Levi, o Iuta, o Isakara, o Iosefa, ma Peniamina. 13 A o ituaiga nei o le a tutū i le mauga o Evalu+ e faamalaia atu: o Reupena, o Kato, o Asera, o Sepulona, o Tanu, ma Nafatali. 14 O le a tali atu fo‘i ma le leotetele le ʻau sa Levī i tagata uma o Isaraelu:+

15 “‘E malaia le tagata e na te faia se faatusa ua tā,+ po o se tupua uʻamea,+ o le mea lea e inosia e Ieova,+ o le galuega a lima o se tufuga,* ma na ia tuu ai i se mea lilo.’ (Ona tali mai lea o le nuu uma e faapea, ‘Amene!’*)

16 “‘E malaia le tagata e manatu faatauvaa i lona tamā po o lona tinā.’+ (Ona tali mai lea o le nuu uma e faapea, ‘Amene!’)

17 “‘E malaia le tagata e na te tuu i tua le pine o le fanua a lona tuaoi.’+ (Ona tali mai lea o le nuu uma e faapea, ‘Amene!’)

18 “‘E malaia le tagata e na te faasesēina le mea e alu i ai le tauaso.’+ (Ona tali mai lea o le nuu uma e faapea, ‘Amene!’)

19 “‘E malaia le tagata e na te faapiʻoina le faamasinoga+ o le tagata ese e aumau iā te outou, o le tama e leai se tamā,* po o le fafine ua oti lana tane.’+ (Ona tali mai lea o le nuu uma e faapea, ‘Amene!’)

20 “‘E malaia le tagata e momoe ma le avā a lona tamā, auā ua ia faalumaina lona tamā.’*+ (Ona tali mai lea o le nuu uma e faapea, ‘Amene!’)

21 “‘E malaia le tagata e momoe ma se manu.’+ (Ona tali mai lea o le nuu uma e faapea, ‘Amene!’)

22 “‘E malaia le tagata e momoe ma lona tuafafine, o le afafine o lona tamā po o le tama teine a lona tinā.’+ (Ona tali mai lea o le nuu uma e faapea, ‘Amene!’)

23 “‘E malaia le tagata e momoe ma le tinā o lana avā.’+ (Ona tali mai lea o le nuu uma e faapea, ‘Amene!’)

24 “‘E malaia le tagata e na te faapō ma fasiotia lona tuaoi.’+ (Ona tali mai lea o le nuu uma e faapea, ‘Amene!’)

25 “‘E malaia le tagata e na te taliaina se foaʻi ina ia fasiotia se tagata e lē sala.’+ (Ona tali mai lea o le nuu uma e faapea, ‘Amene!’)

26 “‘E malaia le tagata e lē faamamaluina upu o lenei Tulafono ona e lē o usiusitaʻi i ai.’+ (Ona tali mai lea o le nuu uma e faapea, ‘Amene!’)