Isaia
58 “Ia alaga leotele ae aua le leo laʻitiiti; aua foʻi le taofiofia!
Ia e leotele e pei o se pū.
Ia taʻu atu i loʻu nuu lo latou fouvale,+
Ma taʻu atu i le aiga o Iakopo a latou agasala.
2 Ua latou saʻili mai iā te aʻu i lea aso ma lea aso,
Ma faailoa mai lo latou manana‘o e fia iloa o‘u ala,
E peisea‘ī o se nuu na faia pea le amiotonu
Ma e le‘i tuulafoa‘ia le faamasinogatonu a lo latou Atua.+
Ua latou talosaga mai iā te aʻu mo le faamasinogatonu,
E peisea‘ī e manana‘o e faalatalata atu i le Atua.+
3 Ua latou faapea mai: ‘Aiseā ua e lē silasila mai ai pe a matou anapopogi?+
Ma aiseā ua e lē ano mai ai pe a matou faapuapuagatia i matou lava?’+
Talu ai ua outou faia o outou lava loto i le aso o le anapogi,
Ma faatigāina a outou tagata faigaluega.+
4 E faai‘u a outou anapogi i le femisaaʻi ma le fetauaʻi,
Ma e tou te sasau atu ma le sauā a outou tuʻi.*
E lē mafai ona outou anapopogi i lenei auala, ma faatalitalia e faalogoina o outou leo i le lagi.
5 Pe e tatau ona faapea le anapogi na ou filifilia,
E pei o se aso e faapuapuagatia ai e le tagata o ia lava,
E punou ai lona ulu e pei o vao ʻutuʻutu,
Ma ia fofola le ʻie talatala ma le lefulefu e fai ma ona moega?
Po o le mea ea lenei ua outou taʻua o le anapogi ma le aso e talileleia ai e Ieova?
6 E leai, o le anapogi lenei na ou filifilia:
Ia tatala fusi o le amioleaga,
Ia tatala foʻi noataga o le amo,+
Ia faasaʻoloto ē ua nutimomoia,+
Ma gauluaina amo uma.
7 Ia tufa atu au meaʻai i lē ua fia ʻai,+
Ia aumai i lou fale lē e mativa ma lē ua leai se mea e nofo ai,
Ia faaofu se isi e lē lavalavā, pe a e vaaia o ia,+
Ma aua e te lafi mai i tagata o lou lava aiga.
8 Ona susulu mai ai lea o lou malamalama e pei o le tafa mai o ata,+
Ma e vave foʻi ona toe faafoʻisia lou malosi.
O le a savali lau amiotonu i ou luma,
Ma o le a puipuia oe mai i ou tua,+ e le mamalu o Ieova.
9 Ona e valaau lea iā Ieova, ma o le a tali mai o ia;
O le a e alaga atu mo se fesoasoani, ona faapea mai lea o ia, ‘O aʻu lenei!’
Afai e te aveesea mai iā te oe le amo,
Ma tuu le tusitusilima ma le tautala i mea e faatigā,+
10 Afai fo‘i e te avatu i lē ua fia ʻai le mea foʻi lea e te fiafia i ai,+
Ma faamalieina ē ua puapuagatia,
Ona susulu atu lea o lou malamalama i le pōuliuli
Ma e pei lou pogisa o le tutonu o le lā.+
11 O le a taʻitaʻiina pea oe e Ieova
Ma faamalieina oe e oo lava i le laueleele ua leai ni vai;+
O le a ia faamalosia ou ivi,
Ma e avea foʻi oe e pei o le togālaau ua faasūsūina lelei,+
E pei foʻi o se puna o vai e lē taitai mate.
12 Ona o lau faatonuga o le a toe fausia ai e tagata mea na faatafunaina anamua,+
Ma e te toe faia foʻi faavae na faaleagaina i tupulaga ua mavae.+
O le a taʻua oe o lē e toe faaleleia pā ua solo,+
O lē e faafouina ala i mea e nonofo ai.
13 Afai o le Sapati ua māfua ai ona e lē faia lou lava loto i loʻu aso paia,+
Ma ua e taʻua le Sapati o se mea e matuā fiafia i ai, o se aso paia iā Ieova, o se aso e faamamaluina,+
Ma ua e faamamaluina nai lo o le faia o lou lava loto ma tautala i upu lē aogā,
14 Ona e matuā fiafia ai lea iā Ieova,
Ma o le a ou faatiʻetiʻe oe i luga o mea maualuluga o le lalolagi.+
O le a ou fafaga foʻi oe mai i le tofi o Iakopo lou augātamā,+
Auā ua fetalai mai ai le fofoga o Ieova lava ia.”