O le Tusi Lona Lua o Nofoaiga a Tupu

30 Ona alu atu lea o le feʻau a Esekia iā Isaraelu uma+ ma Iuta, ua ia tusia foʻi ni tusi iā Efaraima ma Manase,+ ina ia ō mai i le fale o Ieova i Ierusalema e faia ai le Paseka iā Ieova le Atua o Isaraelu.+ 2 Peitaʻi, ua filifili le tupu, o ona perenise, ma le faapotopotoga uma i Ierusalema e faia le Paseka i le masina lona lua,+ 3 auā e leʻi mafai ona latou faia le Paseka i le taimi masani,+ ona e leʻi lava ositaulaga na faapaiaina i latou lava,+ ma e leʻi faapotopotoina foʻi le nuu i Ierusalema. 4 Ua tonu lea mea i le manatu o le tupu ma le faapotopotoga uma. 5 Ona latou filifili lea e faaoo atu le valaaulia i Isaraelu uma, e amata mai i Peresepa e oo atu i Tanu,+ ina ia ō mai i Ierusalema e fai le Paseka iā Ieova le Atua o Isaraelu, auā e latou te le‘i faia faapea o se faapotopotoga e tusa ai ma mea ua tusia.+

6 Ona ō atu lea o avefeʻau* ma tusi mai i le tupu ma ona perenise, ua latou ō i Isaraelu uma ma Iuta, e tusa ai ma le poloaʻiga a le tupu e faapea: “O outou le fanauga a Isaraelu e, inā toe foʻi mai ia iā Ieova le Atua o Aperaamo, o Isaako, ma Isaraelu, ina ia toe foʻi mai ai o ia i ē ua totoe ua sao mai i lima o tupu o Asuria.+ 7 Aua neʻi outou pei o o outou augātamā, po o o outou uso na lē faamaoni iā Ieova le Atua o o latou augātamā, lea na ia faia ai i latou ma mea e mata‘u ai, e pei ona outou vāai i ai.+ 8 O lenei, aua tou te faauamaaa e pei o o outou augātamā.+ Ia outou gauaʻi iā Ieova, ma ia ō mai i lona malumalu+ lea na ia faapaiaina e faavavau, ma ia auauna iā Ieova lo outou Atua, ina ia liliuese ai lona toʻasā tele mai iā te outou.+ 9 Afai tou te toe foʻi mai iā Ieova, ona alolofa mutimutivale lea o ē na puʻea o outou uso ma o outou atalii iā i latou,+ ma faataga i latou e toe foʻi mai i lenei nuu,+ auā e alofa fua ma e alofa mutimutivale Ieova lo outou Atua,+ ma e lē liliuese ona fofoga mai iā te outou, pe afai tou te toe foʻi mai iā te ia.”+

10 Ona ō atu lea o avefeʻau* i lea aai ma lea aai i le nuu atoa o Efaraima ma Manase,+ e oo lava i Sepulona, ae ua aamu ma faifai mai tagata iā i latou.+ 11 Peita‘i, na iai nisi mai i Asera, o Manase, ma Sepulona, na faamaulalo i latou ma ō mai i Ierusalema.+ 12 Na iai foʻi le aao o le Atua moni iā Iuta ina ia autasia i latou* e fai le poloaʻiga a le tupu ma perenise, e tusa ai ma le afioga a Ieova.

13 Ua faapotopoto faatasi le nuu e matuā toʻatele lava i Ierusalema, ina ia faia le Tausamiga o Falaoa e Lē Faafefeteina+ i le masina lona lua;+ o se faapotopotoga e matuā toʻatele lava. 14 Ua latou tutū i luga ma aveese fata faitaulaga sa i Ierusalema,+ ua latou aveesea foʻi fata faitaulaga uma e faamū ai mea manogi,+ ma lafo i le vanu o Ketarono. 15 Ona latou fasia lea o manu mo le Paseka i le aso lona 14 o le masina lona lua. Ua māsiasi le ʻauositaulaga ma le ‘au sa Levī, o lea ua latou faapaiaina ai i latou lava ma aumai taulaga mū i le fale o Ieova. 16 Ua latou tutū i o latou tulaga masani, e tusa ai ma le Tulafono a Mose le tagata o le Atua moni; ona sausau lea e ositaulaga o le toto+ na aumai mai i lima o le ‘au sa Levī. 17 E toʻatele i latou i le faapotopotoga e leʻi faapaiaina. O lea, na vaavaaia ai e le ‘au sa Levī le fasiga o manu o le Paseka mo ē uma ua lē mamā,+ ina ia mamā ai i latou i luma o Ieova. 18 Auā e toʻatele tagata o le nuu, aemaise ē na ō mai mai i Efaraima, o Manase,+ o Isakara, ma Sepulona, e leʻi faamamāina ae ua latou aai i le Paseka, o se gaoioiga e lē tusa ma le mea ua tusia. Peita‘i, ua tatalo Esekia mo i latou, ua faapea atu: “Tau ina ia faamagalo e Ieova, o lē e lelei,+ 19 so o se tasi ua saunia lona loto e saʻili ai i le Atua moni+ o Ieova, o le Atua o ona augātamā, e ui e leʻi faamamāina o ia e tusa ma le faatulagaga o le mea paia.”+ 20 Ona faafofoga mai lea o Ieova iā Esekia, ma faamagalo* le nuu.

21 Ona faia lea ma le olioli tele+ e le fanauga a Isaraelu o ē na i Ierusalema, o le Tausamiga o Falaoa e Lē Faafefeteina+ mo aso e fitu, ma na vivii atu le ʻau sa Levī ma ositaulaga iā Ieova i lea aso ma lea aso, ma tā leotetele a latou meafaifaaili iā Ieova.+ 22 Ua tautala atu foʻi Esekia ma faamalosiau i le ‘au sa Levī uma, o ē na auauna ma le matuā faautauta iā Ieova. Ua latou aai foʻi i le tausamiga mo aso e fitu,+ ma faia taulaga faifaatasi,+ ma avatu le faafetai iā Ieova le Atua o o latou augātamā.

23 Ona filifili lea o le faapotopotoga uma e fai le tausamiga mo isi aso e fitu, ona latou faia lea ma le olioli mo isi aso e fitu.+ 24 Ua foaʻi atu e Esekia le tupu o Iuta mo le faapotopotoga o povi poʻa e 1,000 ma mamoe e 7,000, ma ua foaʻi atu e perenise mo le faapotopotoga o povi poʻa e 1,000 ma mamoe e 10,000;+ ua faapaiaina foʻi e ositaulaga e matuā toʻatele i latou lava.+ 25 Ua olioli pea le faapotopotoga uma o Iuta, o ositaulaga, o le ‘au sa Levī, o le faapotopotoga uma na ō mai mai i Isaraelu,+ o tagata ese+ na ō mai mai i le nuu o Isaraelu, ma i latou na nonofo i Iuta. 26 Na iai foʻi le olioli tele i Ierusalema, auā e leʻi tupu se mea faapea i Ierusalema talu mai aso o Solomona le atalii o Tavita le tupu o Isaraelu.+ 27 Mulimuli ane, ona tutū lea i luga o ositaulaga sa Levī ma faamanuia i le nuu;+ ua faafofoga le Atua i o latou leo, ma ua oo atu a latou tatalo i lona afioaga paia i le lagi.