O le Tusi Muamua o Tupu

3 Ua osia e Solomona se aiga ma Farao le tupu o Aikupito i lona faaipoipo atu i le afafine o Farao,+ ma aumaia o ia i le Aai a Tavita,+ seʻia māeʻa ona fausia lona lava fale,+ o le fale o Ieova,+ ma le pā e si‘o ai Ierusalema.+ 2 Ae na faia pea e le nuu taulaga i mea maualuluga,+ auā e leʻi faia se fale mo le suafa o Ieova+ e oo mai i na aso. 3 Na faaauau foʻi ona alofa Solomona iā Ieova i lona savali i faatonuga a Tavita lona tamā, seʻi vaganā ai lona faamūina pea o taulaga i mea maualuluga.+

4 Ona alu atu lea o le tupu i Kipeona e fai taulaga ai i inā, auā o le mea maualuga+ lenā e sili ona tāua. Na ofo atu e Solomona manu e 1,000 e fai ai taulaga mū i luga o lenā fata faitaulaga.+ 5 Na faaali Ieova iā Solomona i se miti i le pō i Kipeona; na fetalai mai le Atua: “Inā talosaga mai ia i se mea ou te avatua iā te oe.”+ 6 Ona faapea atu lea o Solomona: “Na e matuā alofa faamaoni i lau auauna o Tavita loʻu tamā, a o savali o ia i ou luma i le faamaoni, ma le amiotonu, atoa ma le lotosa‘o. Ua faaauau foʻi ona e faaalia lenei matuā alofa faamaoni iā te ia e oo mai i le asō, e ala i le foaʻi mai iā te ia o se atalii e nofo i lona nofoālii.+ 7 O lenei, Ieova e, loʻu Atua, o oe na faia lau auauna ma tupu e sui iā Tavita loʻu tamā, e ui ua na o aʻu o se talavou,* ma e leai soʻu poto masani.*+ 8 O lau auauna foʻi o se vaega o lou nuu na e filifilia,+ o le nuu e toʻatele lava ma e lē mafaitaulia. 9 O lenei, ia e foaʻi mai i lau auauna se lotousiusitaʻi e faamasino ai lou nuu,+ ma ina ia ou iloa ai le lelei ma le leaga;+ auā o ai ea e mafai ona faamasino i lou nuu e matuā toʻatele?”*

10 Ua fiafia foʻi le finagalo o Ieova ona ua talosaga atu Solomona i lenei mea.+ 11 Ona fetalai mai lea o le Atua iā te ia: “Talu ai ua e talosaga mai i lenei mea, ma ua e lē talosaga mai ina ia faafualoa lou ola,* pe mo ni ʻoa, pe fasiotia ou fili, ae ua e talosaga mai ia e maua le malamalama e faia ai faaiʻuga saʻo* i faamasinoga,+ 12 o lenei, ou te faia lava e tusa ma au upu.+ O le a ou foaʻi atu iā te oe se loto e atamai ma malamalama,+ ma e pei lava ona leai se tasi na muamua atu e tusa ma oe, o le a lē toe iai foʻi se tasi e mulimuli mai e tusa ma oe.+ 13 E lē gata i lea, o le a ou foaʻi atu iā te oe+ mea e te leʻi talosaga mai ai, o le ʻoa ma le mamalu,+ ina ia leai se isi tupu e tusa ma oe i ou aso uma.+ 14 Afai foʻi e te savali i oʻu ala i le tausia o aʻu tulafono ma aʻu poloaʻiga, e pei ona savali ai o lou tamā o Tavita,+ ou te faafualoaina lou ola.”*+

15 Ina ua ala Solomona, na ia iloa ai na fai lana miti. Ona alu atu lea o ia i Ierusalema ma tū i luma o le atolaau o le feagaiga a Ieova, ua ia ofoina atu foʻi taulaga mū ma taulaga faifaatasi,+ ma ia saunia ai se faigaʻai mo ana auauna uma.

16 Ona ō mai lea o ni fafine talitane se toʻalua i le tupu, ma tutū i ona luma. 17 Ua fai mai le fafine muamua: “Faamolemole loʻu alii e, e tasi le fale e ma te nonofo ai ma lenei fafine, ma na ou fanau a o iai o ia i le fale. 18 Ina ua mavae aso e tolu talu ona ou fanau, na fanau ai foʻi lenei fafine. Sa ma faatasi na o i maʻua, ma e leʻi iai se isi tagata i le fale. 19 Ona oti ai lea o le tama a lenei fafine i le pō, auā na taomia iā te ia a o moe. 20 Ona tulaʻi lea o ia i le vaeluapō, ua aveese laʻu tama mai i oʻu tafatafa a o moe lau auauna teine, ma faataoto iā te ia i lona fatafata, ae ua faataoto mai e ia lana tama ua oti i loʻu fatafata. 21 Ina ua ou ala aʻe i le taeao e faasusu laʻu tama, ona ou iloa ai lea ua oti o ia. Na ou iloilo lelei o ia i le taeao, ma ou iloa ai e lē o laʻu tama lea na ou fanaua.” 22 Ae ua fai mai le isi fafine: “E leai, o loo ola laʻu tama, ae ua oti lau tama!” Ae ua fai mai le fafine muamua: “E leai, ua oti lau tama ae o loo ola laʻu tama.” O le auala lenā ua la fefinaua‘i ai i luma o le tupu.

23 Ona fai atu lea o le tupu: “Ua fai mai le tasi, ‘O loo ola laʻu tama, ae ua oti lau tama!’ ae ua fai mai le isi, ‘E leai, ua oti lau tama ae o loo ola laʻu tama!’” 24 Ua faapea atu le tupu: “Ia aumai se pelu iā te aʻu.” Ona latou aumaia lea o le pelu i le tupu. 25 Ua faapea mai le tupu: “Ia isilua le tama o loo ola, ma ia avatu le ʻafa i le tasi fafine, ae avatu le isi ʻafa i le isi fafine.” 26 Ona talosaga mai lea i le tupu o le fafine o loo ola lana tama, auā ua mutimutivale lona alofa i lana tama. Ua fai mai o ia: “Faamolemole, loʻu alii e! Ia outou avatu iā te ia le tama o loo ola. Aua lava neʻi fasiotia o ia.” Ae ua fai mai le isi fafine: “Aua le aumaia le tama iā te aʻu, aua foʻi le avatua iā te oe. Ia outou isilua o ia!” 27 Ona tali atu lea o le tupu: “Aua neʻi outou fasiotia le tama. Ia outou avatu le tama o loo ola i le fafine muamua, auā o ia o lona tinā.”

28 Ua faalogo Isaraelu uma i le iʻuga o le faamasinoga na faia e le tupu, ona latou maofa* ai lea ona o le tupu,+ auā ua latou iloa o loo iā te ia le atamai o le Atua e faia ai faamasinoga tonu.+