O le Tusi Muamua o Tupu

10 Ua faalogo le tupu tamaʻitaʻi mai i Seepa i le tala e uiga i le lauiloa o Solomona, lea na faamamaluina ai le suafa o Ieova.+ Ona sau ai lea o ia e tofotofo iā Solomona i fesili faigatā.*+ 2 Ua taunuu o ia i Ierusalema ma se ʻaumalaga e matuā toʻatele lava,+ o kamela o loo aumai ai suāuu pasama,+ ma le matuā tele o auro ma maa tāua. Ua sau o ia iā Solomona ma talanoa mai iā te ia i mea uma ua naunau i ai lona loto. 3 Ona taliina lea e Solomona o ana fesili uma. E leai se mea na faigatā* i le tupu, ma na ia faamatala atu mea uma iā te ia.

4 Ina ua iloa e le tupu tamaʻitaʻi mai i Seepa le atamai uma o Solomona,+ o le fale na ia faia,+ 5 o meaʻai i lana laulau,+ o le nonofo a ana auauna i le laulau, o le tautua a ana auauna ma o latou ofu, o ē e laulauina ana meainu, ma ana taulaga mū e faia e lē aunoa i le fale o Ieova, ona matuā maofa ai lea o ia.* 6 Ona ia fai mai lea i le tupu: “Ua moni lava upu na ou faalogo ai i loʻu nuu e uiga i mea na e faia* ma lou atamai. 7 Ae ou te leʻi talitonu i na upu seʻia ou sau ma vaai i ai oʻu mata; faauta! e itiiti lava mea na taʻu atu iā te aʻu. Ua matuā sili atu lava lou atamai ma lou manuia, nai lo o mea na ou faalogo i ai. 8 E fiafia ou tagata ma e fiafia au auauna o ē o loo tutū e lē aunoa i ou luma, ma faalogo i lou atamai!+ 9 Ia viia Ieova lou Atua,+ o lē ua fiafia mai iā te oe i lona faanofo o oe i le nofoālii o Isaraelu. Auā o le alofa e lē mavae o Ieova iā Isaraelu, ua ia tofia ai oe e avea ma tupu e faia faamasinoga ma le amiotonu.”

10 Ona ia foaʻi mai lea i le tupu o Solomona o taleni* auro e 120, ma le matuā tele lava o suāuu pasama,+ ma maa tāua.+ E leʻi toe aumaia lava ni suāuu pasama se tele, e pei o nei suāuu na foaʻi mai e le tupu tamaʻitaʻi mai i Seepa i le tupu o Solomona.

11 Na aumaia e vaa a Hiramo o auro mai i Ofeira,+ na aumai ai foʻi mai i Ofeira o laupapa alemuka+ e matuā tele lava ma maa tāua.+ 12 Ona faia lea e le tupu mai i laupapa alemuka o pā puipui mo le fale o Ieova ma le fale o le tupu, atoa foʻi ma kitara,* ma meafaifaaili e iai uaua mo tagata pepese.+ E leʻi toe aumaia lava pe toe vaaia ni laupapa alemuka e pei o nei laupapa, e oo mai i aso nei.

13 Ua foaʻi atu foʻi e le tupu o Solomona i le tupu tamaʻitaʻi mai i Seepa, o mea uma na mana‘o ma talosaga mai ai, ae e lē taulia ai mea na foaʻi atu iā te ia e le tupu o Solomona, ona o lona limafoaʻi.* Mulimuli ane, ona liliu atu lea o ia ma toe foʻi i lona nuu faatasi ma ana auauna.+

14 O le mamafa o le auro na aumaia iā Solomona i tausaga taʻitasi, e 666 taleni auro,+ 15 ae e lē taulia ai polofiti mai i tagata femalagaaʻi, o tagata fefaataua‘i, o tupu uma o Arapi, ma kovana o le nuu.

16 Ua faia foʻi e le tupu o Solomona o talipupuni tetele e 200, i auro+ ua saunia faapitoa (e 600 sekeli* auro na ufitia ai luga o talipupuni taʻitasi),+ 17 ma talita* e 300 e faia i auro ua saunia faapitoa (e tolu mina* auro na ufitia ai luga o talita taʻitasi). Ona tuu lea e le tupu o na mea i le Fale o le Vaomatua o Lepanona.+

18 Ua faia foʻi e le tupu se nofoālii+ mata‘ina i nifo elefane, ma ufitia i auro ua faamamāina.+ 19 E ono faasitepu i le nofoālii, ma i tua o le nofoālii e iai se mea faaofuofu, e iai foʻi faalagolago o lima i itu e lua o le mea e nofo ai, e tutū ai foʻi faatusa e lua o leona+ i tafatafa o faalagolago o lima. 20 E 12 faatusa o leona na tutū i faasitepu e ono, e ta‘itasi i itu o faasitepu e ono. E leai lava se isi malo na faia se mea faapea.

21 O ipu inu uma foʻi a le tupu o Solomona o auro ia, o auro māoʻi foʻi ipu uma lava o le Fale o le Vaomatua o Lepanona.+ E leai se mea na faia i le siliva, auā na manatu i le siliva o se mea e matuā faatauvaa lava i aso o Solomona.+ 22 Na iai i le tupu ni vaa o Tasesa,+ ma na iai i le sami faatasi ma vaa a Hiramo. E faatasi i tausaga ta‘itolu ona ō mai vaa o Tasesa e aumai auro, o siliva, o nifo elefane,+ o manukī ma tuki.*

23 Na sili atu le tupu o Solomona i ʻoa+ ma le atamai+ nai lo o isi tupu uma o le lalolagi. 24 Ua saʻili foʻi tagata o le lalolagi uma e fia feiloa‘i iā Solomona, ina ia faalogo i le atamai na tuuina e le Atua i lona loto.+ 25 I tausaga taʻitasi, e latou te aumaia ai e taʻitasi ma lana meaalofa o mea siliva, o mea auro, o ofu, o auupega, o suāuu pasama, o solofanua ma asini.*

26 Ua faapotopoto mai pea e Solomona o kariota ma solofanua;* ua iā te ia o kariota e 1,400, ma solofanua* e 12,000,+ ua ia tuu foʻi na mea i aai o kariota e latalata ane i le tupu i Ierusalema.+

27 Ua faia e le tupu o mea siliva i Ierusalema ia matuā tele lava e pei o maa, ua ia faia foʻi laupapa arasi ia matuā tele lava e pei o laau o le sukamoru i Sefila.*+

28 Na aumaia solofanua a Solomona mai i Aikupito, ma na faatau mai e le ʻaufaatauʻoa a le tupu le tele o solofanua* i se tau faatulagaina.+ 29 E 600 sekeli siliva le tau o le kariota e tasi na faatauina mai ai i Aikupito, ae e 150 sekeli siliva le tau o le solofanua; ona latou toe faatauina atu lea i tupu uma o tagata Hetī+ ma tupu o Suria.