Faamasino

19 I na aso, sa leai se tupu i Isaraelu.+ Sa iai se tagata sa Levī sa aumau i se vaega maugā mamao o Efaraima,+ ma na fai ma ana avā se palake mai i Peteleema+ i Iuta. 2 Peita‘i ua lē faamaoni lana palake iā te ia, ona alu ese ai lea o lana palake ma alu i le aiga o lona tamā i Peteleema i Iuta. Na nofo ai pea i inā mo masina e fā. 3 Ona alu atu lea o lana tane iā te ia ina ia tauanau o ia e toe fo‘i mai; sa iai fo‘i i lana tane o se auauna tane ma asini e lua. Ua aumaia o ia e le fafine i le fale o lona tamā. Ina ua vaai mai le tamā o le fafine iā te ia, ona olioli ai lea ina ua la feiloaʻi. 4 Ua tauanau o ia e le tamā o lana avā, o le tamā o le fafine talavou, ina ia latou nonofo mo ni aso se tolu; ua la aai ma inu, ma nonofo ai i inā i le pō.

5 Ua oo i le aso lona fā, ina ua latou feala aʻe i le taeaopō e ō, ona faapea mai lea o le tamā o le fafine talavou i le tane a lona afafine: “Inā ʻai ia ina ia e maua ai le malosi,* ona outou ō ai lea.” 6 Ona la nonofo lea i lalo, ua aai ma inu faatasi; ina ua uma, ona faapea atu lea o le tamā o le fafine talavou i le tamāloa: “Faamolemole, seʻi o tatou toe nonofo i lenei pō, ma ia faafiafia lou loto.” 7 Ina ua tulaʻi le tamāloa o le a alu, ona ʻaiʻoi atu pea lea o le tamā o lana avā iā te ia, ma ua toe nofo ai o ia i lenā pō.

8 Ina ua ia ala aʻe i le taeaopō o le aso lona lima e alu, ona faapea mai lea o le tamā o le fafine talavou iā te ia: “Faamolemole, inā ʻai ia ina ia e maua ai le malosi.”* Ona la faatuatuai lea seʻia oo i le afiafi, ma ua la aai pea. 9 Ua tulaʻi le tamāloa e ō ma lana palake ma lana auauna; ae ua fai mai le tamā o lana avā, o le tamā o le fafine talavou iā te ia: “Faauta! Ua leva le aso o le a pō. Faamolemole, tatou toe nonofo i lenei pō. O le a uma le aso. Seʻi tatou nonofo i le pō, ma ia faafiafia lou loto. Ona outou feala lea i le taeaopō mo la outou malaga, ma e alu ai i lou aiga.”* 10 Peitaʻi, e leʻi mana‘o le tamāloa e toe nofo ai i le pō, ua tulaʻi o ia ma alu se‘ia oo atu i Iepuse, o Ierusalema lea.+ Sa iā te ia o asini e lua ua uma ona faanofoa, o lana palake, ma lana auauna.

11 Ua latou lata atu i Iepuse, ma ua mou atu le malamalama. Ona faapea mai lea o le auauna i lona matai: “Pe e tatou te afe ane i lenei aai o tagata Iepusē ma nonofo ai i le pō?” 12 Ae ua fai atu lona matai iā te ia: “Aua neʻi o tatou afe ane i se aai o tagata ese e lē o ni tagata Isaraelu. Ia tatou ō seʻia oo atu i Kipea.”+ 13 Ona fai atu lea o ia i lana auauna: “Ō maia seʻi o tatou taumafai e ō atu i se tasi o na nofoaga; e tatou te nonofo i le pō i Kipea po o Rama.”+ 14 Ua latou ō atu i lo latou ala, ua goto ifo le lā a o latou latalata i Kipea, lea e i Peniamina.

15 Ona latou afe ane lea i inā ma ō atu e nonofo ai i le pō i Kipea. Ua latou ō atu ma saofafaʻi i le nofoaga faitele o le aai, ae ua leai se tasi e taliaina i latou i lona fale e nonofo ai i le pō.+ 16 Mulimuli ane i lenā afiafi, ua sau se toeaina sa galue i le fanua. E sau o ia mai i le vaega maugā o Efaraima,+ ma sa aumau o ia i Kipea mo sina taimi; a o tagata o le aai o tagata o Peniamina.+ 17 Ina ua ia tepa aʻe i luga ma iloa ai le tagata malaga o loo i le nofoaga faitele o le aai, ona faapea mai lea o le toeaina: “O fea e te alu i ai, a o fea foʻi e te sau ai?” 18 Ua tali atu o ia: “Na matou ō mai mai i Peteleema i Iuta e ō atu i se vaega maugā mamao o Efaraima, o i inā ou te sau ai. Na ou alu i Peteleema i Iuta,+ ma o le a ou alu i le fale o Ieova.* Ae e leai se tasi e taliaina aʻu i lona fale. 19 O loo lava vao mamago ma meaʻai mo a matou asini,+ faapea meaʻai+ ma uaina mo aʻu, le fafine, ma la ma auauna. E leai se mea o oʻu mativa ai.” 20 Ae ua fai mai le toeaina: “Ia iā te oe le filemu! O le a ou saunia so o se mea e tou te mana‘omia. Ae aua neʻi outou momoe i le nofoaga faitele.” 21 Ua ia ave o ia i lona fale ma fafaga i asini. Ona latou mulumuluina lea o o latou vae, ma ua aai ma feinu.

22 A o latou fiafia, ua siʻomia e tagata amioleaga o le aai le fale ma latou tatu‘i le faitotoʻa, ma fai mai pea i le toeaina e ona le fale: “Aumai i fafo le tamāloa lea na sau i lou fale se‘i o matou momoe.”+ 23 Ona alu atu lea i fafo o lē e ona le fale ma faapea atu iā i latou: “Leai oʻu uso e, aua neʻi outou faia se mea leaga. Faamolemole, o loo o‘u talimālō i lenei tamāloa i loʻu fale. Aua neʻi outou faia lenei mea matagā. 24 O loʻu afafine taupou lea ma le palake a le tamāloa. Ou te aumaia i laʻua i fafo, ma e mafai ona tou faaleagaina i laʻua pe a tou manana‘o i ai.*+ Ae aua tou te faia lenei mea matagā i le tamāloa.”

25 Ae e leʻi fia faalogo tagata iā te ia, ona tago atu lea o le tamāloa i lana palake+ ma tuu atu i fafo iā i latou. Ua latou toso faamalosi ma faaleaga o ia i le pō atoa seʻia oo i le taeao. Ona latou auina ese atu lea o ia ina ua tafa mai ata. 26 Ua oo i le taeaopō, ona sau lea o le fafine ma faapaʻū i le faitotoʻa o le fale o le tamāloa lea sa iai lona matai, ma taoto ai se‘ia oo ina malamalama. 27 Ua tulaʻi lona matai i le taeao ma tatala le faitotoʻa o le fale o le a faaauau lana malaga, ona ia vaaia lea o le fafine, o lana palake, ua taoto i le faitotoʻa o le fale, ma o loo tuu ona lima i le faitotoʻa. 28 Ona ia fai atu lea iā te ia: “Tū ia i luga tatou ō.” Ae e leʻi tali ane o ia. Ona tago atu lea o le tamāloa, ua faaee o ia i luga o le asini, ma ua alu i lona aiga.

29 Ina ua taunuu o ia i lona fale, ona ia tago lea i le naifi ma taofi i lana palake, ona pena lea o ia ma ona ivi i vaega e 12, ma tufa atu vaega ta‘itasi i itu uma o Isaraelu. 30 Ua faapea ane i latou uma na vāai i ai: “E leʻi tupu pe vaaia lava se mea faapenei, talu mai le aso na ō aʻe ai le fanauga a Isaraelu mai i le nuu o Aikupito e oo mai i le asō. Ia manatunatu i ai,* ia filifili,+ ma faailoa mai le mea e fai.”