O le Tusi Lona Lua i le Faapotopotoga i Korinito

13 O le a faatolu ona ou alu atu iā te outou. “E faamaonia mataupu uma i le molimau a* le toʻalua po o le toʻatolu.”+ 2 E ui ou te lē o iai ma outou i le taimi nei, ae e peiseaʻī ua ou iai faalua ma outou, ma ua ou muaʻi tuuina atu laʻu lapataʻiga i ē na agasala muamua ma ē uma o totoe, pe afai ou te toe alu atu, ou te lē faapalepale lava iā i latou, 3 talu ai ua outou saʻilia se faamaoniga ua fetalai mai Keriso e ala mai iā te aʻu, ua lē vaivai Keriso iā te outou, ae ua malosi iā te outou. 4 O le mea moni, na tutuʻi o ia i luga o le laau ona o le vaivai,* ae ua soifua o ia ona o le mana o le Atua.+ E moni foʻi, e ui ina matou vaivai e pei ona sa vaivai o ia, ae e matou te ola faatasi ma ia+ ona o le mana o le Atua ua iā te outou.+

5 Ia tofotofo pea iā te outou po o outou iai i le faatuatua; ia suʻesuʻe ifo pea iā te outou po o faapeʻī outou.+ Pe e tou te lē iloa ea o loo outou autasi ma Iesu Keriso? Ae seʻi vaganā ai e lē o taliaina outou. 6 Ou te faamoemoe o le a outou iloa, ua taliaina i matou.

7 E matou te tatalo i le Atua ina ia outou lē faia se mea sesē, e lē ina ia vaai ai isi iā i matou o ni ē e taliaina, ae ina ia outou faia ai le mea lelei e tusa pe e lē taliaina i matou e isi. 8 Auā e lē mafai ona matou faia se mea e tetee ai i le upu moni, ae e na o mea e lagolagoina ai le upu moni. 9 E matou te olioli pe a outou malolosi e ui ina matou vaivai. O la matou tatalo foʻi lea, ina ia toe faasaʻoina o outou manatu. 10 O le mea lea ua ou tusi atu ai i nei mea a o oʻu lē iai ma outou, ina ia ou lē faia ma le ʻinaʻinā se mea pe a ou iai, e tusa ma le pule ua tuuina mai e le Alii iā te aʻu+ e atiaʻe ai outou, ae ina ia lē faavaivai ai.

11 O laʻu toe upu lenei le ʻauuso e, ia faaauau ona outou olioli, ia toe faasaʻo o outou manatu, ia faamāfanafanaina+ outou, ia tutusa o outou mafaufau,+ ia nonofo ma le filemu,+ ona faatasi lea iā te outou o le Atua o le alofa ma le filemu.+ 12 Ia faafeiloaʻi e le tasi le isi i le sogi paia. 13 O loo alolofa uma atu lava le ʻaupaia iā te outou.

14 Ia iā te outou uma le agalelei faifua o le Alii o Iesu Keriso ma le alofa o le Atua, ma ia outou maua faatasi aogā mai i le agaga paia.