O le Tusi i Faapotopotoga i Kalatia

1 O aʻu o Paulo, o le aposetolo, e lē mai i tagata pe na tofia e se tagata, ae na tofia e Iesu Keriso+ ma le Atua le Tamā,+ o lē na faatūina o ia mai i le oti, 2 ma le ʻauuso uma ua faatasi ma aʻu, o le tusi lenei i faapotopotoga i Kalatia:

3 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso. 4 Na foaʻiina mai e ia o ia lava mo a tatou agasala,+ ina ia laveaʻi e ia i tatou mai i le faiga leaga o mea*+ o loo iai nei e tusa ai ma le finagalo o lo tatou Atua, o le Tamā lea,+ 5 o lē e tatau ona faamamaluina e faavavau, faavavau lava. Amene.

6 Ou te ofo ona ua vave ona outou liliuese* mai i Lē na valaauina outou i le agalelei faifua o Keriso, ma outou faalogo atu i se isi tala lelei.+ 7 E leai lava se isi tala lelei; ae e iai nisi ua faalavelave atu iā te outou,+ ma mananaʻo e mimilo sesē le tala lelei i le Keriso. 8 Peitaʻi, e tusa lava pe e faailoa atu e se tasi o i matou, po o se agelu mai i le lagi iā te outou se tala lelei e ese mai i le tala lelei lea na matou faailoa atu iā te outou, ia malaia o ia. 9 E pei ona matou fai atu muamua, ou te toe fai atu nei foʻi, Po o ai lava se tasi e folafola atu se tala lelei e ese mai i lea na outou taliaina, ia malaia o ia.

10 Po o tagata ea o loo oʻu taumafai e faatalitonu po o le Atua? Po o oʻu taumafai ea e faafiafia i tagata? Pe ana ou faafiafia pea i tagata, e lē avea la aʻu ma pologa a Keriso. 11 Ou te manaʻo e faailoa atu iā te outou le ʻauuso e, o le tala lelei lea na ou folafola atu, e lē o se tala lelei mai i tagata;+ 12 auā ou te leʻi mauaina mai i tagata, ma e leʻi aʻoaʻoina ai foʻi aʻu, ae na faaali mai e Iesu Keriso iā te aʻu.

13 O le mea moni, na outou faalogo i laʻu amio na iai a o oʻu auai i le lotu Iutaia,+ sa ou matuā sauā pea i le faapotopotoga a le Atua ma faataugā i ai;+ 14 na sili loʻu agaʻigaʻi i luma i le lotu Iutaia nai lo o le toʻatele o la matou tupulaga i loʻu atunuu, na sili foʻi loʻu maelega i tū masani a oʻu tamā.+ 15 A o le Atua o lē na māfua ai ona ou fanau mai i le manava o loʻu tinā,* ma na valaauina aʻu ona o lona agalelei faifua,+ na ia finagalo e lelei ona 16 faaalia mai lona Alo e ala iā te aʻu, ina ia ou folafola atu le tala lelei iā te ia i nuu ese,+ ae ou te leʻi alu loa e fesili atu i se isi tagata mo ni fautuaga; 17 ou te leʻi alu aʻe foʻi i Ierusalema i ē na muamua avea ma aposetolo iā te aʻu, ae na ou alu atu i Arapi, ma toe foʻi mai ai i Tamaseko.+

18 Ina ua mavae le tolu tausaga, ona ou alu aʻe lea i Ierusalema+ e asiasi iā Kefa,*+ ma na ma nonofo ai mo le 15 aso. 19 Ae ou te leʻi vaai i isi o le ʻauaposetolo, e na o Iakopo+ le uso o le Alii. 20 O mea ua ou tusi atu ai iā te outou, ou te taʻutino atu i luma o le Atua ou te lē pepelo.

21 Mulimuli ane, ona ou alu atu lea i nuu o Suria ma Kilikia.+ 22 Ae e leʻi vāai lava iā te aʻu faapotopotoga i Iutaia, ia ua autasi iā Keriso. 23 Ua na ona latou faalogo e faapea: “O le tagata lea na sauā muamua iā i tatou+ ma faataugāina faapotopotoga,*+ ua ia folafola atu nei le tala lelei.” 24 Ona latou faamamaluina lea o le Atua ona o aʻu.