Isaia
54 “Inā alaga fiafia ia oe le fafine pā e lē fanau!+
Inā olioli ia ma alaga fiafia ma le leotele,+ o oe le fafine e leʻi tigā i le tigā a fanau,+
Auā e toʻatele atu le fanau a* lē ua tuulafoaʻiina
Nai lo o le fanau a le fafine ua iai lana tane,”*+ ua fetalai mai ai Ieova.
2 “Ia faalautele atu le mea e tū ai lou faleʻie.+
Ia falō ʻie o lou faleʻie paia sili.
Aua e te faaitiitia, ae ia faauumi maea o lou faleʻie,
Ma ia malolosi pine o lou faleʻie.+
3 Auā o le a faalautele atu ou tuaoi i le itu taumatau ma le itu tauagavale.
O le a fai ma lau fanau atunuu,
Ma o le a latou nofoia aai ua faatafunaina.+
O le a galo iā te oe le mā i le taimi o lou talavou,
Ma e te lē toe manatua le faalumaina o lou nofo o se fafine ua oti lana tane.”
5 “Auā o Lē Silisili na faia oe,+ ua pei o se tane* iā te oe,+
O Ieova o ʻau lona suafa,
Ma o Lē e Paia o Isaraelu o Lē na toe faatauina oe.+
E taʻua o ia o le Atua o le lalolagi uma.+
6 Auā na valaau Ieova iā te oe e pei o se avā na tuulafoaʻiina ma matuā faavauvau,+
E pei foʻi o sē na avea ma avā a o talavou, ae mulimuli ane tuulafoaʻiina,” ua fetalai mai ai lou Atua.
7 “Auā na ou tuulafoaʻiina oe mo sina taimi,
Ae o le alofa mutimutivale tele o le a ou aoaoina mai ai oe.+
8 Na ʻalo oʻu mata mai iā te oe mo sina taimi e ala i le sasaaina atu o loʻu ita,+
Ae o le a ou alofa mutimutivale iā te oe, i le alofa faamaoni e faavavau,”+ ua fetalai mai ai Ieova o Lē e toe faatauina mai oe.+
9 “Ua pei lenei mea iā te aʻu o aso o Noa.+
E pei ona ou tautō atu e lē toe lofia le lalolagi i vai e pei o aso o Noa,+
Ua faapena foʻi ona ou tautō atu ou te lē toe ita iā te oe pe aʻoaʻi malosi iā te oe.+
10 Auā e mafai ona aveesea mauga,
Ma maluelue aʻega,
Ae e lē aveesea loʻu alofa faamaoni mai iā te oe,+
Pe maluelue foʻi laʻu feagaiga o le filemu,”+ ua fetalai mai ai Ieova o Lē e alofa mutimutivale iā te oe.+
11 “Le fafine mafatia e,+ ua afātia ma ua lē faamāfanafanaina,+
O loo oʻu atiina ou maa i le paluga e sosoo ai maa,
Ma ou te faia lou faavae i safaira.+
12 O le a ou faia tumutumu o ou ʻolo i salikea,
Ma ou faitotoʻa i maa tāua e fe‘ilafi,
Ma ou tuaoi uma i maa tāua matagofie.
14 O le a faamausalīina oe i le amiotonu.+
O le a mamao oe mai i sauāga,+
O le a e lē fefe i se isi ma e leai se mea e te mataʻu ai,
Auā o le a lē latalata mai iā te oe se mea e mataʻu ai.+
15 Afai ae osofaʻia oe e se isi,
E lē māfua ona o saʻu faatonuga.
O so o se isi e osofaʻia oe o le a paʻū lava ona o oe.”+
16 “Faauta! O aʻu lava na foafoaina le tufuga,
O lē e feula le afi ua faia i malala ola,
Ma fausia se auupega i lana galuega.
O aʻu foʻi na ou faia le tagata e faaleagaina mea, e na te faaumatiaina mea.+
17 O so o se auupega ua faia e faasagatau iā te oe e lē manuia,+
Ma o so o se laulaufaiva e tetee atu iā te oe i le faamasinoga e te taʻusalaina.
O le tofi lenei o auauna a Ieova,
Ma o la latou amiotonu e mai iā te aʻu,” ua fetalai mai ai Ieova.+