O le Tusi Lona Lua o Tupu

14 O le tausaga lona lua o le nofoaiga a Ioasa+ le atalii o Ioasasa le tupu o Isaraelu, na fai ai ma tupu Amasia le atalii o Ioasa le tupu o Iuta. 2 E 25 tausaga o Amasia ina ua avea o ia ma tupu, ma e 29 tausaga na ia pule ai mai i Ierusalema. O le igoa o lona tinā, o Ioatina mai i Ierusalema.+ 3 Na ia faia pea mea ua tonu i le silafaga a Ieova, ae e leʻi pei o lona augātamā o Tavita.+ Na ia faia e pei o mea uma na faia e lona tamā o Ioasa.+ 4 Peitaʻi, e leʻi aveesea mea maualuluga,+ ma na faia pea e le nuu taulaga ma faamū taulaga i luga o mea maualuluga.+ 5 Ina ua ia faatumauina lana pule i le malo, ona ia fasiotia loa lea o ana auauna na fasiotia lona tamā le tupu.+ 6 Ae e na te leʻi fasiotia fanau a ē na fasiotia lona tamā, e tusa ai ma le poloa‘iga a Ieova o loo i le tusi o le Tulafono a Mose e faapea: “Aua neʻi fasiotia tamā e sui ai atalii, aua foʻi neʻi fasiotia atalii e sui ai tamā; ae e taʻitasi le tagata ma fasiotia ona o lana lava agasala.”+ 7 Na ia fasiotia tagata Etoma+ e toʻa 10,000 i le vanu o Masima,+ ma puʻea foʻi le aai o Sela i le taua,+ ua faaigoa foʻi lea mea o Iokatielu e oo mai i aso nei.

8 Ona aauina atu lea e Amasia o avefeʻau iā Ioasa le tupu o Isaraelu, le atalii o Ioasasa le atalii o Ieʻu e faapea: “Inā sau ia e ta te tau.”*+ 9 Ae ua auina mai e Ioasa le tupu o Isaraelu se feʻau iā Amasia le tupu o Iuta, ua faapea mai: “Na auina atu e le vao tuitui i Lepanona se feʻau i le laau o le arasi i Lepanona, ua faapea atu: ‘Inā aumaia lou afafine i loʻu atalii e fai ma ana avā.’ Peitaʻi, na ui ane se manufeʻai o le vao sa i Lepanona ma soli le vao tuitui. 10 E moni na e fasia Etoma,+ ma ua faamaualuga ai lou loto. O lea, inā olioli ia i lou mamalu ae ia e nofo pea i lou fale. Aiseā e te faatupuina ai mala ma e paʻū ai, faatasi ma Iuta o loo iā te oe?” 11 Ae e leʻi faalogo Amasia.+

Ona alu aʻe lea o Ioasa le tupu o Isaraelu, ua la tau ma Amasia le tupu o Iuta i Pete-semesa,+ le aai o Iuta.+ 12 Ua faatoʻilaloina Iuta e Isaraelu, ma ua taʻitasi le tagata ma sola i lona fale.* 13 Ua puʻea foʻi i Pete-semesa e Ioasa le tupu o Isaraelu, o Amasia le tupu o Iuta, le atalii o Ioasa, o le atalii o Aasaia. Ona latou ō mai ai lea i Ierusalema, ma ua ia faaleagaina le pā o Ierusalema, e amata mai i le Faitotoʻa o Efaraima+ e oo atu i le Faitotoʻa o le Tulimanu,+ e 400 kupita.* 14 Ua ave foʻi e Ioasa auro ma siliva uma, o mea uma na maua i le fale o Ieova, o ʻoa i le fale o le tupu, ma ē na ave faamalosia. Ona toe foʻi atu lea o Ioasa i Samaria.

15 A o le olaga uma o Ioasa, o mea na ia faia, o lona malosi, ma la laʻua taua ma Amasia le tupu o Iuta, po ua lē o tusia ea i le tusi o le talafaasolopito o tupu o Isaraelu? 16 Ona taoto ai lea o Ioasa faatasi ma ona augātamā, ma ua tanu i Samaria+ faatasi ma tupu o Isaraelu, ona avea lea o Ierepoamo*+ lona atalii ma tupu e sui iā te ia.

17 E 15 tausaga na ola ai pea Amasia+ le atalii o Ioasa le tupu o Iuta, ina ua oti Ioasa+ le atalii o Ioasasa, le tupu o Isaraelu.+ 18 A o le olaga uma o Amasia, po ua lē o tusia ea i le tusi o le talafaasolopito o tupu o Iuta? 19 Mulimuli ane, ua iai se faufauga i Ierusalema e fouvale iā Amasia,+ ona sola ai lea o ia i Lakisa; ae ua latou aauina atu nisi e tuliloa o ia i Lakisa, ma ua fasiotia ai o ia i inā. 20 Ua latou ave o ia i solofanua, ma tanu i Ierusalema faatasi ma ona augātamā i le Aai a Tavita.+ 21 Ona ave lea o Asaraia*+ e le nuu uma o Iuta, o le taimi lenā ua 16 ona tausaga,+ ma ua latou fai o ia ma tupu e sui i lona tamā o Amasia.+ 22 Ua ia toe fausia Elata+ ma toe faafoʻi mai iā Iuta, ina ua taoto le tupu* faatasi ma ona augātamā.+

23 O le tausaga lona 15 o le nofoaiga a Amasia le atalii o Ioasa le tupu o Iuta, na fai ai ma tupu Ierepoamo+ le atalii o Ioasa le tupu o Isaraelu mai i Samaria, ma na pule o ia mo tausaga e 41. 24 Na ia faia pea mea leaga i le silafaga a Ieova. E leʻi liliuese o ia mai i agasala uma a Ierepoamo le atalii o Nepata, lea na faapogaia ai Isaraelu e agasala.+ 25 Na ia toe faafoʻisia le tuaoi o Isaraelu mai i Lepo-amato*+ e oo atu lava i le sami o Arapa,*+ e tusa ai ma le afioga a Ieova le Atua o Isaraelu, na fetalai mai ai e ala i lana auauna o Iona+ le atalii o Amitai, le perofeta mai Kataferu.+ 26 Auā ua silafia e Ieova le matuā tigā o Isaraelu.+ E leʻi iai se tagata na totoe, e oo lava i sē e leai se fesoasoani ma faatauvaa, e mafai ona fesoasoani iā Isaraelu. 27 Ae na folafola mai e Ieova e na te lē soloiesea le igoa o Isaraelu mai i le lalolagi.+ O lea, na ia faaolaina ai i latou e ala i lima o Ierepoamo le atalii o Ioasa.+

28 A o le olaga uma o Ierepoamo, o mea uma na ia faia, o lona malosi, o taua na ia tauina, ma lona toe faafoʻisia o Tamaseko+ ma Amato+ iā Iuta i Isaraelu, po ua lē o tusia ea i le tusi o le talafaasolopito o tupu o Isaraelu? 29 Ona taoto lea o Ierepoamo faatasi ma ona augātamā, o tupu o Isaraelu, ona avea lea o Sakaria+ lona atalii ma tupu e sui iā te ia.