Isaia
23 O le feʻau e faasaga iā Turo:+
Inā tagiauē ia outou vaa o Tasesa!+
Auā ua faatafunaina le mea e taula ai vaa; ma e lē mafai ona ulu atu ai.
Ua faailoaina atu lea mea mai i le atunuu o Kitimo.+
2 O outou o ē e nonofo i gataifale, aua tou te pisa.
Auā ua faatumulia oe e tagata faatauʻoa o Saitonu,+ o ē o loo sopoʻia mai le sami.
3 Ua auina atu fatu o Seora*+ ma le seleselega o le vaitafe o le Naila
I luga o vai e tele, ma ua maua ai e Turo le polofiti.
O lea mea ua maua ai e nuu le polofiti.+
4 Saitonu e, ia māsiasi oe, o oe o le mea malupuipuia o le sami,
Auā ua faapea mai le sami:
“E leʻi oo iā te aʻu le tigā a fanau, ou te leʻi fanau,
Ma ou te leʻi tausia aʻe foʻi ni tauleleʻa po o ni teine talavou.”*+
5 E pei ona tigā tagata i le tala e uiga iā Aikupito,+
O le a faapea foʻi ona matuā tigā tagata ona o le tala iā Turo.+
6 Ia sopo atu i Tasesa!
Ia tagiauē outou o ē o nonofo i le gataifale!
7 Po o lo outou aai ea lea sa olioli mai i aso ua leva, e mai lava i lona amataga?
Sa masani ona ave o ia e ona vae i atunuu mamao e aumau ai.
8 O ai ea ua faia lenei faaiʻuga faasaga iā Turo,
O lē e tuuina atu palealii,
O ona faatauʻoa o perenise i latou,
Ma o ona tagata fefaatauaʻi e faaaloalogia i le lalolagi uma?+
9 O Ieova o ʻau lava ia ua ia faia lenei faaiʻuga,
Ina ia faalēaogāina ai le mimitavale o Turo i lona matagofie uma,
Ma faalumaina tagata uma na faaaloalogia i le lalolagi uma.+
10 Le tama fafine a Tasesa e, inā sopo atu ia i lou laueleele e pei o le vaitafe o le Naila.
Ua lē toe iai ni uafu e taula ai vaa.+
11 Ua faaloaloa atu lona aao i luga o le sami;
Ua ia faavevesiina malo.
Ua poloaʻia e Ieova le faatama‘iaga o mea malupuipuia a Foinie.+
12 Ua ia fetalai mai: “O le a e lē toe olioli,+
O oe o lē ua puapuagatia, o le tama fafine a Saitonu.
Inā tū ia i luga ma sopo atu i Kitimo.+
Peitaʻi e te lē maua lava se mālōlōga i lea mea.”
13 Faauta foʻi! O le atunuu o tagata Kaletaia.+
O tagata Kaletaia, ae e lē o tagata Asuria,+
Lea ua faia lenei aai ma mea e nonofo ai manu o le toafa.
Ua latou faatutū o latou ʻolo mo osofaʻiga;
Ua latou faatamaʻia ona ʻolo malolosi,+
Ma faia lenei aai ma faupuʻega o mea ua faaleagaina.
15 O lea aso, o le a galo ai Turo mo tausaga e 70,+ e pei o aso o le tupu e toʻatasi. Pe a mavae tausaga e 70, o le a pei Turo o le fafine talitane lea na usu i ai le pese:
16 “O oe le fafine talitane ua faagaloina, ia ave le kitara, ma ia fealuaʻi i le aai.
Ia e tāina ma le tomai lau kitara;
Ia faatele au pese,
Ina ia latou toe manatua ai oe.”
17 Pe a mavae le 70 tausaga, ona toe liliu atu ai lea o Ieova iā Turo, ma e toe maua e le aai lona totogi, ma ia faia faiga faatalitane ma malo uma o le lalolagi o loo i le fogāeleele. 18 Ae o le a avea ana polofiti ma lona totogi o se mea paia iā Ieova. O le a lē teuina pe faaputuina, auā o lona totogi o le a fai mo i latou o ē o nonofo i luma o Ieova, ina ia latou aai ai ia maoona ma oofu ai i ofu matagofie.+