Esekielu

7 Ua toe fetalai mai Ieova iā te aʻu, e faapea: 2 “A o oe, le atalii e o le tagata, o le fetalaiga lenei a le Alii Pule Silisili Ese o Ieova i le laueleele o Isaraelu: ‘O le iʻuga! Ua oo mai le iʻuga i itu e fā o le laueleele. 3 Ua oo mai le iʻuga iā te oe, ma o le a ou faaoo atu loʻu ita iā te oe, ou te faamasino foʻi iā te oe e tusa ma ou ala ma taui atu iā te oe ona o au gaoioiga inosia uma. 4 Ou te lē faapelepele iā te oe, po ou te alofa mutimutivale iā te oe,+ auā o le a ou taui atu iā te oe e tusa ma ou ala, ma o le a e mafatia ona o āuga o au gaoioiga inosia.+ Ona outou iloa ai lea o aʻu lava o Ieova.’+

5 “O le fetalaiga lenei a le Alii Pule Silisili Ese o Ieova: ‘Faauta! o loo sau se mala, o se mala uigaese.+ 6 O loo faaloloʻi mai le iʻuga. E oo mai lava le iʻuga; e oo faafuaseʻi mai iā te oe. Faauta! o loo faaloloʻi mai. 7 O oe lenā o lē e nofo i le laueleele, ua oo mai lou taimi. Ua lata mai le taimi, ua latalata mai le aso.+ Ua iai le vāvāō, ae e lē o le alaga fiafia i mauga.

8 “‘E lē o toe umi ona ou sasaa atu lea o loʻu ita tele iā te oe,+ ma o le a ou matuā faaoo atu loʻu ita iā te oe,+ ou te faamasino foʻi iā te oe e tusa ma ou ala ma taui atu iā te oe ona o au gaoioiga inosia uma. 9 Ou te lē faapelepele po ou te alofa mutimutivale.+ O le a ou taui atu iā te oe e tusa ma ou ala, ma o le a e mafatia ona o āuga o au lava gaoioiga inosia. Ona outou iloa ai lea o aʻu lava o Ieova o loo oʻu taia outou.+

10 “‘Faauta! O loo faaloloʻi mai le aso!+ Ua oo mai lou taimi; ua fuga mai le tootoo ma ua tupu olaola le faamaualuga. 11 Ua tuputupu aʻe le sauā ma ua avea ma tootoo e faasala ai le amioleaga.+ E lē faasaoina i latou, o o latou tamaoaiga, o i latou lava, po o latou tulaga aloaʻia. 12 O le a oo mai le taimi, o le a oo mai le aso. Ia aua neʻi fiafia lē e faatau mai, ma aua neʻi faanoanoa lē e faatau atu, auā ua iai le ita tele faasaga iā i latou uma.*+ 13 Auā e lē toe foʻi le tagata i le mea na ia faatauina atu, e tusa pe e faasaoina lona ola, auā o le faaaliga e mo le nuu atoa. E leai se tasi e toe foʻi atu, ma ona o lana lava mea sesē, o le a leai se tasi e faasaoina lona ola.

14 “‘Ua latou ilia le pū+ ma ua sauniuni uma tagata, ae e leai se tasi e alu atu i le taua, auā ua iai loʻu ita tele faasaga i tagata uma o le nuu.+ 15 Ua i fafo le pelu,+ ae ua i totonu le faamaʻi ma le oge. O lē ua i le fanua e oti o ia i le pelu, ma o ē o loo i le aai e faaumatia i latou i le faamaʻi ma le oge.+ 16 O ē e sao mai ma mafai ona sosola, o le a ō atu i mauga; ma e pei o lupe i vanu, e ōi i latou taʻitoʻatasi ona o lana mea sesē.+ 17 O o latou lima uma e tautau i lalo, ma o o latou tuli uma ua sisina ifo ai le vai.*+ 18 E latou te oofu i ʻie talatala,+ ma ua oo iā i latou le gatete.* O le a faamāsiasiina i latou, ma o le a tula o latou ulu uma.*+

19 “‘O le a latou lafo a latou siliva i auala, ma e fai a latou auro ma mea e ʻinoʻino i ai. E lē mafai e a latou siliva po o a latou auro ona laveaʻiina i latou i le aso o le toʻasā o Ieova.+ O le a lē faamalieina i latou, e lē maoona foʻi o latou laualo, auā ua avea lo latou tamaoaiga ma mea e tautevateva ai ma māfua ai ona latou faia mea sesē. 20 Ua latou mimita i le matagofie o a latou teuga, ma ua latou faaaogā auro ma siliva e faia ai faatusa inosia, o a latou tupua inosia.+ O le mea lea, o le a ou faia ai ia mea ma mea leaga iā i latou. 21 O le a ou tuuina atu siliva ma auro i lima o tagata ese ina ia ave faamalosi, ma i tagata amioleaga o le lalolagi e fai ma vete,* ma e latou te faaleagaina ai na mea.

22 “‘O le a liliuese oʻu mata mai iā i latou,+ o le a latou faaleagaina loʻu nofoaga lilo,* ma o le a ō atu i ai ē e faomea ma faaleagaina.+

23 “‘Ia faia se filifili,*+ auā ua tumu le nuu i faamasinoga e iʻu ai i le faamasaatoto,+ ua tumu foʻi le aai i le sauā.+ 24 O le a ou aumaia ē e aupito sili ona leaga o nuu+ ma o le a fai mo i latou o latou fale,+ ou te faamutaina le mimita o ē e malolosi, ma o le a faaleagaina o latou potu paia.+ 25 Pe a oo mai o latou puapuaga, o le a latou saʻili mo le filemu ae e lē maua.+ 26 O le a fafa mai le isi malaia i luga o le isi malaia, e sosoo mai foʻi le isi tala ma le isi tala, e saʻili e le nuu se faaaliga mai i se perofeta,+ ae o le a lē toe iai le tulafono* mai i le ositaulaga ma le fautuaga* mai i toeaina.+ 27 O le a faavauvau le tupu,+ e ofu foʻi le taʻitaʻi i le mafatia,* ma o le a gatete lima o tagata o le nuu ona o le fefefe. O le a ou feutagaʻi ma i latou e tusa ma o latou ala, ma ou te faamasinoina i latou e tusa ma a latou faamasinoga. Ona latou iloa ai lea o aʻu lava o Ieova.’”+