Esekielu

8 I le tausaga lona ono, i le masina lona ono, i le aso lima o le masina, a o ou nofo i loʻu fale, ma ua nonofo toeaina o Iuta i oʻu luma, ua oo mai ai le aao o le Alii Pule Silisili Ese o Ieova i oʻu luga. 2 A o ou vaavaai, na ou iloa ai se mea e foliga e pei o se afi; e mai i le mea e foliga mai o ona puimanava e agaʻi i lalo ua iai le afi,+ ma e mai i ona puimanava e agaʻi i luga, ua pupula e pei o le iila o le auro ua fefiloi ma le siliva.+ 3 Ona ia tuu mai lea o se mea e pei o se lima ma tago mai i se vaega o loʻu lauulu, ma ua aveina aʻe aʻu e le agaga i le vā o le lalolagi ma le lagi, ma avatu aʻu i Ierusalema e ala i faaaliga mai i le Atua, i le mea e ulufale atu ai i le faitotoʻa o le pā pito i totonu+ lea e faasaga i le itu i mātū, o le mea ua iai le faatusa* o le fuā lea e tupu ai le fuā o le Atua.+ 4 Faauta foʻi, ua iai i inā le mamalu o le Atua o Isaraelu,+ e pei o le vaaiga na ou vaaia i le fanua laugatasi.*+

5 Ona ia fetalai mai lea iā te aʻu: “Faamolemole, le atalii e o le tagata, inā tepa aʻe ia ou mata i le itu i mātū.” Ona tepa aʻe lea o oʻu mata i le itu i mātū, ma ua iai i inā i le itu i mātū o le faitotoʻa o le fata faitaulaga, le faatusa* o le fuā i le mea e ulufale atu ai. 6 Ua ia fetalai mai iā te aʻu: “Le atalii e o le tagata, po ua e vaai atu ea i mea matagā ma inosia o loo faia e le aiga o Isaraelu i inei,+ lea ua ou faamamao ese ai mai i loʻu malumalu?+ Ae o le a e toe vaai atu i mea inosia e sili atu ona matagā.”

7 Ona ia aumaia lea o aʻu i le mea e ulu atu ai i le lotoā, ona ou vaai atu lea, faauta foʻi! o se pū i le pā. 8 Ua ia fetalai mai iā te aʻu: “Faamolemole, le atalii e o le tagata, inā eli ia i le pā.” Ona ou elia lea o le pā, ma ua ou vaaia ai se mea e ulufale atu ai. 9 Ua ia fetalai mai iā te aʻu: “Ia e ulu atu i totonu ma e vaai i mea leaga ma inosia o loo latou faia ai i inā.” 10 Ona ou ulu atu lea i totonu ma vaai, ona ou iloa ai lea o ata eseese uma o mea fetolofi ma manu inosia uma,+ ma tupua inosia* uma a le aiga o Isaraelu,+ ua vaneina e soo uma ai le pā. 11 O loo tutū i luma o ia mea toeaina e toʻa 70 o le aiga o Isaraelu, ma o loo tū ai foʻi Iaasenaia le atalii o Safana+ faatasi ma i latou. Ua tofu i latou ma lana ipu i lona lima e faamū ai mea manogi, ma ua alu aʻe le asu manogi lelei.+ 12 Ua ia fetalai mai iā te aʻu: “Le atalii e o le tagata, po ua e vaai atu i mea o loo faia e toeaina o le aiga o Isaraelu i le pōuliuli, ua taʻitasi ma alu i le potu pito i totonu ua iai ana tupua ua tā? Auā ua latou faapea ane, ‘E lē o silasila mai Ieova iā i tatou. Ua tuua e Ieova le atunuu.’”+

13 Ua ia toe fetalai mai iā te aʻu: “O le a e toe vaai atu i mea inosia e sili atu ona matagā o loo latou faia.” 14 Ona ia ave lea o aʻu i le mea e ulu atu ai i le faitotoʻa o le pā o le fale o Ieova, lea o loo i le itu i mātū, ma ua ou vaaia ai i inā ni fafine o loo nonofo ma fetagisi ona o le atua o Tamusa.

15 Ua ia toe fetalai mai iā te aʻu: “Le atalii e o le tagata, po ua e vaai atu ea i lea mea? O le a e toe vaai atu i mea inosia e sili atu ona matagā nai lo o ia mea.”+ 16 Ona ia ave lea o aʻu i le lotoā pito i totonu o le fale o Ieova.+ I inā, i le mea e ulu atu ai i le malumalu o Ieova, i le vā o le faapaologa ma le fata faitaulaga, ua iai ni tamāloloa pe ā ma le toʻa 25, ua ū o latou tua i le malumalu o Ieova, ae e faasaga o latou mata i le itu i sasaʻe ma ua latou ifo atu i le lā i le itu i sasaʻe.+

17 Ua ia fetalai mai iā te aʻu: “Le atalii e o le tagata, po ua e vaai atu ea i lea mea? Po o se mea māmā ea i le aiga o Iuta le faia o nei mea inosia, faatumuina le atunuu i sauāga+ ma faatigā mai pea i loʻu loto? A o lenei, ua latou tuu mai le lālā laau* i loʻu isu. 18 O lea, o le a ou gaoioi ai ma loʻu ita tele. Ou te lē faapelepele po ou te alofa mutimutivale foʻi.+ E ui lava e latou te alalaga leotetele mai i oʻu taliga, ou te lē faalogo atu lava iā i latou.”+