O le Tusi Lona Lua o Nofoaiga a Tupu

2 Ua faatonuina e Solomona le fausiaina o se fale mo le suafa o Ieova,+ ma se fale mo lona malo.+ 2 Ona filifilia lea e Solomona o tagata e toʻa 70,000 o ē e faia galuega masani,* e toʻa 80,000 o ē e tipi maa i le mauga,+ ma le toʻa 3,600 o ē e taʻimua iā i latou.+ 3 Ua auina atu foʻi e Solomona se feʻau iā Hiramo+ le tupu o Turo, e faapea: “Ia e faia mo aʻu e pei ona e faia i loʻu tamā o Tavita, ina ua e aumaia iā te ia laupapa arasi e fausia ai se fale mo ia e nofo ai.+ 4 A o lenei ua ou faia se fale e faamamaluina ai le suafa o Ieova loʻu Atua, ina ia faapaiaina mo ia, ia faamū ai mea manogi+ i ona luma, ma ia iai e lē aunoa falaoa ua faaputuina,*+ ma faia ai taulaga mū i le taeao ma le afiafi,+ i Sapati+ ma masina faatoʻā vaaia,+ ma tausamiga+ iā Ieova lo matou Atua. O le faatonuga lenei mo Isaraelu e oo i le faavavau. 5 O le fale o le a ou fausia e sili lava, auā o lo matou Atua e silisili nai lo o isi atua uma. 6 O ai ea e iai sona malosi e fausia ai se fale mo ia? Auā e lē ofi o ia i le lagi ma le lagi o lagi;+ o lea, o ai ea aʻu nei ou te faia ai se fale mo ia? O le fale ua ou faia ua na o se mea e faamūina ai taulaga i ona luma. 7 O lenei, seʻi e auina mai iā te aʻu se tagata tomai e galue i le auro, le siliva, le ʻapamemea,+ le uʻamea, o fulufulu mamoe lanu violē ma le mūmū sesega, ma le filo lanu moana, ma e iloa foʻi vane teuteu. O le a galue o ia i Iuta ma Ierusalema faatasi ma ē e tomai o loo iā te aʻu, o ē na filifilia e loʻu tamā o Tavita.+ 8 Ia aumai foʻi iā te aʻu ni laupapa arasi, o perosi,+ ma alemuka+ mai i Lepanona, auā ua ou iloa lelei e tomai au auauna i le tātuuina i lalo o laau o Lepanona.+ O le a galulue faatasi aʻu auauna ma au auauna+ 9 e sauniunia ina ia matuā tele ni laupapa mo aʻu, auā o le fale o le a ou fausia e matuā sili lava. 10 Faauta! ou te avatua saito e aai ai au auauna+ o ē e tātuuina laau: e 20,000 kori* o saito, e 20,000 kori o karite,* e 20,000 paita* o le uaina, ma le 20,000 paita o le suāuu.”

11 Ona tusia lea e Hiramo le tupu o Turo o lenei tusi ma auina atu iā Solomona, e faapea: “O le alofa o Ieova i lona nuu, ua ia fai ai oe ma o latou tupu.” 12 Ua faapea mai Hiramo: “Ia viia Ieova le Atua o Isaraelu, o lē na faia le lagi ma le lalolagi, auā ua ia foaʻi mai i le tupu o Tavita se atalii atamai,+ e iai le faautaga mamao ma le malamalama,+ o lē o le a fausia se fale mo Ieova ma se fale mo lona lava malo. 13 O lenei, ou te auina atu se tagata tomai ua lava lona malamalama, o Hiramo-api,+ 14 o le tama a le fafine mai i le fanauga a Tanu, ae o lona tamā o se tagata Turo; e tomai o ia e galue i auro, o siliva, o ʻapamemea, o uʻamea, o maa, o laupapa, o fulufulu mamoe lanu violē, o filo lanu moana, o ʻie mūmū sesega ma ‘ie lelei.+ E tomai foʻi i le vaneina o so o se teuteu, ma le tusiaina o so o se ata e tuuina atu iā te ia.+ O le a galulue faatasi o ia ma ou tagata tomai, ma tagata tomai a loʻu alii o Tavita lou tamā. 15 O lenei, ia aumai i au auauna o saito, o karite, o suāuu ma uaina na folafola mai e loʻu alii.+ 16 E matou te tātuuina foʻi i lalo laau mai i Lepanona+ e tusa ma mea uma ua e manaʻomia, ona matou saisaiina faatasi lea o laau ma faatafea atu i le sami i Iopa,+ ona e aveina aʻe lea i Ierusalema.”+

17 Ona faitauina lea e Solomona o tamāloloa uma o ē o ni tagata ese sa i le nuu o Isaraelu,+ ina ua uma ona faitauina i latou e Tavita lona tamā,+ ma e toʻa 153,600 i latou. 18 Ona ia tofia lea o le toʻa 70,000 o i latou e avea ma ē e faia galuega masani,* e toʻa 80,000 e tipi maa+ i le mauga, ma le toʻa 3,600 e taʻimua i tagata o loo faia le galuega.+